.jpg)
លោក ផៃ ស៊ីផាន អ្នកនាំពាក្យរាជរដ្ឋាភិបាលកាលពីម្សិលមិញ។ ហេង ជីវ័ន ហេង ជីវ័ន
ភ្នំពេញៈ លោក ផៃ ស៊ីផាន អ្នកនាំពាក្យរដ្ឋាភិបាលបានថ្លែងថា ការអំពាវនាវរបស់ក្រសួងការបរទេសអាមេរិកឲ្យមានការទម្លាក់បទចោទប្រកាន់លោក កឹម សុខា គឺធ្វើឡើងតាម «អារម្មណ៍»។
លោក ផៃ ស៊ីផាន បានប្រតិកម្មចំពោះការអំពាវនាវរបស់ក្រសួងការបរទេសអាមេរិកដែលស្នើឲ្យមានការដោះលែងលោក កឹម សុខា ពីបទក្បត់ជាតិដោយលោកថ្លែងថា ការអំពាវនាវនោះគឺ «គ្មានមូលដ្ឋាន»។
លោកស្រី Morgan Ortagus អ្នកនាំពាក្យក្រសួងការបរទេសអាមេរិក បានធ្វើការអំពាវនាវឲ្យមានការដោះលែងលោក កឹម សុខា នៅក្នុងវីដេអូខ្លីបមួយដែលបង្ហោះនៅលើទំព័រហ្វេសប៊ុករបស់ស្ថានទូតអាមេរិកក្នុងរាជធានីភ្នំពេញ កាលពីថ្ងៃអង្គារ។
លោកស្រីបានថ្លែងថា រដ្ឋាភិបាលកម្ពុជាមិនទាន់បានកាត់ទោសលោក កឹម សុខា ឬមានភ័ស្តុតាងណាមួយដែលអាចជឿជាក់បានដើម្បីគាំទ្រការអះអាងរបស់ខ្លួនដែលប្រើនៅក្នុងការរំលាយគណបក្សសង្គ្រោះជាតិដែលជាគណបក្សប្រឆាំងដ៏ធំបំផុត និងនៅក្នុងការដកតំណែងតំណាងគណបក្សជាង ៥០០០ ដែលជាប់ឆ្នោត។ លោកស្រីបានថ្លែងថាសកម្មភាពបែបនេះ «បន្ទាបប្រជាធិបតេយ្យសេរីពហុបក្សដែលចែងនៅក្នុងរដ្ឋធម្មនុញ្ញកម្ពុជា»។
លោកស្រី Morgan Ortagus បានថ្លែងថា៖ «ជាថ្មីម្តងទៀតសហរដ្ឋអាមេរិកអំពាវនាវឲ្យរដ្ឋាភិបាលកម្ពុជាលើកលែងការចោទប្រកាន់លោក កឹម សុខា ស្តារសិទ្ធិស៊ីវិល និងសិទ្ធិនយោបាយឡើងវិញ និងដោះលែងសកម្មជនដែលជាប់ឃុំទាំងអស់» ។
លោក កឹម សុខា ត្រូវបានចាប់ខ្លួននៅយប់ថ្ងៃទី ០៣ ខែកញ្ញា ឆ្នាំ ២០១៧ នៅផ្ទះរបស់លោកក្នុងខណ្ឌទួលគោក រាជធានីភ្នំពេញ។ លោកត្រូវបានចោទប្រកាន់ពីបទ «ឃុបឃិតជាមួយបរទេស» ជាបទចោទប្រកាន់មួយដែលអាចធ្វើឲ្យលោកជាប់ពន្ធនាគារពី ១៥ ទៅ ៣០ ឆ្នាំប្រសិនបើរកឃើញថា មានទោស។ លោកត្រូវបានដោះលែងឲ្យនៅក្រោមការត្រួតពិនិត្យរបស់តុលាការកាលពីខែកញ្ញា ឆ្នាំមុន។
ក្រសួងការបរទេសអាមេរិកក៏បានជំរុញរដ្ឋាភិបាលកម្ពុជាឲ្យចាត់វិធានការលើកកម្ពស់ការសម្រុះសម្រួលដោយអនុញ្ញាតឲ្យប្រព័ន្ធផ្សព្វផ្សាយ និងសង្គមស៊ីវិលប្រតិបត្តិការដោយមិនមានការភ័យខ្លាចការបំភិតបំភ័យ ឬការធ្វើបាបចំពោះការប្រើសិទ្ធិសេរីភាព និងការបញ្ចេញមតិ និងការប្រមូលផ្តុំស្របទៅតាមច្បាប់។
លោក ផៃ ស៊ីផាន បានថ្លែងថា៖ «នោះគឺគ្រាន់តែជាអារម្មណ៍នៃអ្នកដែលបញ្ចេញមតិយោបល់ ។ មតិយោបល់នោះមិនស្របទៅនឹងការគោរពច្បាប់។ នៅពេលយើងនិយាយអំពីការគោរពច្បាប់ យើងផ្អែកទៅលើការពិត និងច្បាប់។ ដូច្នេះអ្វីដែលពួកគេនិយាយគឺធ្វើឡើងជាមួយរបៀបវារៈនយោបាយ»។
ដូចគ្នាដែរ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានថ្លែងកាលពីថ្ងៃអង្គារថា សហរដ្ឋអាមេរិកមានសិទ្ធិនិយាយដូច្នេះ ប៉ុន្តែកម្ពុជាជារដ្ឋអធិបតេយ្យឯករាជ្យ។
លោក ឥសាន ថ្លែងថា៖ «នីតិវិធីតុលាការមិនអាចជ្រៀតជ្រែកបានដោយនរណានោះទេ។ យើងទាំងអស់គ្នារួមទាំងបរទេសចង់មានតុលាការឯករាជ្យ។ ដូច្នេះ ឥឡូវនេះតុលាការកំពុងបំពេញភារកិច្ចរបស់ខ្លួនដោយឯករាជ្យ។ ហេតុអ្វីពួកគេចង់ជ្រៀតជ្រែកជាមួយកិច្ចការផ្ទៃក្នុងរបស់តុលាការ?»។
លោក មាស នី អ្នកវិភាគសង្គមបានថ្លែងថា វាមិនមែនជាលើកទី ១ ទេ ដែលអាមេរិកថ្លែងបែបនេះ ករណីលោក កឹម សុខា គឺមិនស្របទៅតាមបទប្បញ្ញត្តិអន្តរជាតិ ដោយសារមិនមានអ្វីគាំទ្រចំពោះការឃុំខ្លួនលោក កឹម សុខា រយៈពេលយូរ។
លោកបានថ្លែងថា៖ «ប៉ុន្តែនៅកម្ពុជា បើទោះបីជារដ្ឋាភិបាលនិយាយថា វាជាបញ្ហាច្បាប់ក៏ដោយ ក៏ការឃុំខ្លួនគាត់យូរបានធ្វើឲ្យគាត់ក្លាយជាអ្នកទោសនយោបាយ ។ នៅពេលគាត់ជាអ្នកទោសនយោបាយ គាត់មិនត្រូវបានអនុញ្ញាតឲ្យធ្វើនយោបាយ ដោយសារគណបក្សកាន់អំណាចភ័យ»។
លោកថា៖ «ដូច្នេះនៅពេលភាពតានតឹងនយោបាយធូរស្បើយ ឬនៅពេលអ្នកនយោបាយសម្រុះសម្រួលគ្នា ឬរីករាយ ពួកគេនឹងដោះលែងគាត់។ ប៉ុន្តែប្រសិនបើគ្មានអ្វីប្រយោជន៍សម្រាប់ពួកគេ (អ្នកនយោបាយ) ពួកគេនឹងឃុំគាត់រហូតដល់ ១០ ឆ្នាំ។ ខ្ញុំឃើញថា កឹម សុខា ឥឡូវនេះគឺជាអ្នកទោសនយោបាយ»។
លោក Arend Zwartjes អ្នកនាំពាក្យស្ថានទូតអាមេរិកប្រចាំរាជធានីភ្នំពេញ បានថ្លែងកាលពីថ្ងៃអង្គារថា លោកមិនមានមតិយោបល់អ្វីច្រើនជាងក្រសួងការបរទេសរបស់សហរដ្ឋអាមេរិកទេ៕ PS
វីដេអូ៖
