ភ្នំពេញៈ ក្រសួងមហាផ្ទៃចេញសេចក្ដីសម្រេចស្តីពីការបង្កើតក្រុមការងារ រៀបចំខ្លឹមសារនៃកិច្ចប្រជុំ ពន្លឿននីតិវិធីជំនុំជម្រះក្តី និងចេញសាលក្រម ឬ សាលដីកាស្ថាពរដើម្បីដោះស្រាយបញ្ហា និងក្តីបារម្ភទាក់ទងនឹងពន្ធនាគារណាដែលកំពុងមានភាពចង្អៀតណែនខ្លាំង។
លោក ស ខេង រដ្ឋមន្ត្រីក្រសួងមហាផ្ទៃកាលពីថ្ងៃទី ២៧ ខែវិច្ឆិកា ឆ្នាំ ២០១៨ បានចុះហត្ថលេខាសម្រេចបង្កើតក្រុមការងារបញ្ហាចង្អៀតណែននៅក្នុងពន្ធនាគារ។ អគ្គលេខាធិការនៃអគ្គលេខាធិការដ្ឋាន អគ្គស្នងការនៃអគ្គស្នងការដ្ឋាននគរបាលជាតិ អគ្គនាយកនៃអគ្គនាយកដ្ឋានរដ្ឋបាល អគ្គនាយកនៃអគ្គនាយកដ្ឋានពន្ធនាគារ អង្គភាពពាក់ព័ន្ធ និង សាមីខ្លួន ត្រូវទទួលបន្ទុកអនុវត្តសេចក្ដីសម្រេចនេះចាប់ពីថ្ងៃចុះហត្ថលេខាតទៅ។
យោងតាមសេចក្តីសម្រេចនេះបានឲ្យដឹងថា៖ «ក្រុមការងារនេះមានតួនាទីភារកិច្ចរៀបចំ តាក់តែង ចងក្រង ឯកសារ ពាក់ព័ន្ធដល់ដំណើរការនៃកិច្ចប្រជុំក្នុងគោលដៅជំរុញពិនិត្យនីតិវិធីឱ្យសាលាជម្រះក្តីគ្រប់ជាន់ថ្នាក់ពន្លឿននីតិវិធីជំនុំជម្រះក្តី និងចេញសាលក្រម ឬ សាលដីកាស្ថាពរ។ ក្រោយពីរៀបចំឯកសាររួចរាល់ ប្រធានក្រុមការងារត្រូវដាក់ឆ្លងឯកសារនេះ គោរពជូន សម្តេចក្រឡាហោម ស ខេង ដើម្បីពិនិត្យ និងសម្រេច»។
លោក ជិន ម៉ាលីន បានថ្លែងថាការបង្កើតក្រុមការងារនេះគឺធ្វើតាមការឯកភាពពីលោកនាយករដ្ឋមន្ត្រី ហ៊ុន សែន។
សមាសភាពក្រុមការងារនេះមានលោក សក់ សេដ្ឋា រដ្ឋលេខាធិការក្រសួងមហាផ្ទៃជាប្រធានក្រុមការងារនេះលោក ប៉ាវ ហមផាន រដ្ឋលេខាធិការក្រសួងមហាផ្ទៃ និង លោក កើត រិទ្ធ រដ្ឋលេខាធិការក្រសួងយុត្តិធម៌ជាអនុប្រធាន និងមានសមាជិក ១០ រូបទៀតមានលោក ប៊ុន ហុន រដ្ឋលេខាធិការក្រសួងមហាផ្ទៃលោក ឡាំ ជា រដ្ឋលេខាធិការក្រសួងមហាផ្ទៃលោក ជិន ម៉ាលីន អនុរដ្ឋលេខាធិការក្រសួងយុត្តិធម៌លោក នាយឧត្តមសេនីយ៍ នេត សាវឿន អគ្គស្នងការនគរបាលជាតិ និង លោក នាយឧត្តមសេនីយ៍ ចាន់ គីមសេង អគ្គនាយកនៃអគ្គនាយដ្ឋានពន្ធនាគារ។
លោក ជិន ម៉ាលីន អ្នកនាំពាក្យក្រសួងយុត្តិធម៌បានឲ្យដឹងថា ក្រុមការងារដែលបង្កើតនេះនឹងរៀបចំលើខ្លឹមសារ និងយន្តការ និងសេណារីយោមួយចំនួនហើយនឹងដាក់ចូលក្នុងកិច្ចប្រជុំដែលដឹកនាំដោយលោក ស ខេង រដ្ឋមន្ត្រីក្រសួងមហាផ្ទៃជាមួយស្ថាប័នពាក់ព័ន្ធក្នុងនោះមានមន្ត្រីក្រសួងយុតិ្តធម៌ដូចជា មន្ត្រីសាលាដំបូងរាជធានី-ខេត្ត ស្ថាប័ន អយ្យការអមសាលាដំបូងរាជធានីខេត្តដើម្បីដោះស្រាយបញ្ហាចង្អៀតនៃអ្នកជាប់ឃុំក្នុងពន្ធនាគារ។
លោកបញ្ជាក់ថា៖ «មុននឹងឈានដល់កិច្ចប្រជុំដែលដឹកនាំដោយសម្តេចក្រឡាហោម វាចាំបាច់ត្រូវបង្កើតក្រុមការងារមួយដើម្បីសិក្សាស្រាវជ្រាវទៅលើខ្លឹមសារ។ ក្រុមនេះនឹងធ្វើការប្រជុំឆាប់ៗ ដើម្បីធ្វើការស្រាវជ្រាវ និងរៀបចំនូវសេណារីយោ និងយន្តការមួយចំនួនក្នុងការដោះស្រាយហ្នឹង ហើយបន្ទាប់មកនៅពេលដែលយើងរៀបចំលើខ្លឹមសារ និងយន្តការ និងសេណារីយោមួយចំនួនហើយនឹងដាក់ចូលក្នុងកិច្ចពិភាក្សានៃកិច្ចប្រជុំដែលដឹកនាំដោយសម្តេចក្រឡាហោម»។
លោកបន្ថែមថាបន្ទាប់ពីកិច្ចប្រជុំដែលដឹកនាំដោយរដ្ឋមន្ត្រីក្រសួងមហាផ្ទៃ និងការដាក់ចេញទៅយន្តការណាមួយដើម្បីអនុវត្តដោះស្រាយការចង្អៀតណែនក្នុងពន្ធនាគារ ហើយក្រុមការងារនេះអាចនឹងជួបគ្នាសប្តាហ៍ក្រោយដើម្បីពិភាក្សា ព្រោះពេលនេះក្រសួងកំពុងសិក្សាស្រាវជ្រាវជាមួយភាគីពាក់ព័ន្ធទៅលើច្បាប់មួយចំនួនដូចជាទោសសហគមន៍ជាដើម ដើម្បីដោះស្រាយបញ្ហាចង្អៀតណែន។
កាលដើមខែធ្នូ ឆ្នាំ ២០១៨ តាមរបាយការណ៍ចេញដោយអង្គការសិទ្ធិមនុស្សលីកាដូបានបង្ហាញថា ចំនួនអ្នកជាប់ឃុំបានឡើងដល់កម្រិតខ្ពស់ដែលមិនធ្លាប់មានពីមុនមកដោយធ្វើឲ្យមានភាពចង្អៀតណែន និងពុករលួយបង្កឲ្យមានផលប៉ះពាល់ទៅលើអ្នកជាប់ឃុំផ្តល់ផលវិបាកដល់មន្ត្រីពន្ធនាគារ និងសង្គមជាតិទាំងមូលហើយថា ការរំលោភបំពានសិទិ្ធជនជាប់ចោទ និងអំពើពុករលួយរីករាលដាលនៅក្នុងប្រព័ន្ធពន្ធនាគារបានធ្វើឲ្យស្ថានភាពពន្ធនាគារយ៉ាប់យ៉ឺន ហើយបានស្នើឲ្យប្រើប្រាស់នីតិវិធីដោះលែងឲ្យនៅក្រៅឃុំបណ្តោះអាសន្នឲ្យបានត្រឹមត្រូវសម្រាប់បទល្មើសតូចៗដែលមិនមានហិង្សា និងផ្តល់ប្រយោជន៍ដល់ប្រព័ន្ធយុត្តិធម៌ព្រហ្មទណ្ឌជារួម។ នេះនឹងលើកទឹកចិត្តឲ្យមានការចាត់អាទិភាពនៃរឿងក្តីទៅតាមភាពធ្ងន់ធ្ងររបស់ករណីនីមួយៗ និងកាត់បន្ថយការងារច្រើនហួសហេតុរបស់ស្ថាប័នតុលាការ។
លោក ជិន ម៉ាលីន បានថ្លែងថាក្រសួងពាក់ព័ន្ធមិនអាចធ្វើតាមការស្នើសុំរបស់អង្គការ សង្គមស៊ីវិលទេ ព្រោះវានឹងធ្វើឲ្យប៉ះពាល់ដល់ដំណើរការនៃការស៊ើបអង្កេត និងធ្វើឲ្យចលាចលនៅក្នុងសង្គម។
លោកបានអះអាងថាទោះជាយ៉ាងណាក៏ដោយក្រុមការងារនេះមិនអាចដាក់បញ្ជូលក្រុមអង្គការសង្គមស៊ីវិលបានទេ ដោយសារតែក្រុមនេះគឺជាក្រុមជំនាញ និងបច្ចេកទេសទាក់ទងនឹងការអនុវត្តច្បាប់របស់មន្ត្រីនគរបាលយុត្តិធម៌ និងតុលាការ។
លោកបញ្ជាក់ថា៖ «ក្នុងនាមមន្ត្រីអនុវត្តច្បាប់យើងពិបាកនឹងធ្វើដោយសារអ្វីដែលយើងធ្វើគឺទៅតាមបញ្ញតិ្តច្បាប់មុននឹងឃុំខ្លួនគេ បណ្តោះអាសន្នគេត្រូវបំពេញលក្ខណៈមួយចំនួនក្នុងច្បាប់ហើយចៅក្រមស៊ើបសួរគាត់បានពិនិត្យទៅមើលឃើញ ថាមានលក្ខណៈមួយចំនួនដែលមិនអាចឲ្យអ្នកហ្នឹងនៅក្រៅឃុំបាន គាត់សម្រេចឲ្យឃុំខ្លួនបណ្តោះអាសន្ន។ ដូច្នេះអ្វីដែលគាត់ស្នើសុំដើម្បីដោះបញ្ហាចង្អៀតណែនតាមរយៈការដោះលែងអ្នកទាំងអស់នោះ និងឃុំខ្លួនបណ្តោះអាសន្នតិចវាមិនឆ្លើយតបទៅគោលនយោបាយព្រហ្មទណ្ឌរបស់យើង។ បើយើងធ្វើបែបហ្នឹងវានឹងបង្កអសន្តិសុខនៅក្នុងសង្គមកាន់តែខ្លាំង»។
លោក សន កែវ អ្នកនាំពាក្យនាយកដ្ឋានពន្ធនាគារបានឲ្យដឹងថា ក្រុមការងារនេះអាចនឹងជួយដោះស្រាយបញ្ហាចង្អៀតណែននៃអ្នកជាប់ឃុំនៅក្នុងពន្ធនាគារដែលបច្ចុប្បន្ននេះមានអ្នកជាប់ឃុំក្នុងពន្ធនាគារប្រមាណ ៣១០០០ នាក់ដែលអាចផ្ទុកតាមស្តង់ដារបានត្រឹមតែប្រមាណពី ១១០០ នាក់ទៅ ២០០០ នាក់ជាង ខណៈពេលដែលមណ្ឌលអប់រំកែប្រែ ម១ មានអ្នកជាប់ឃុំប្រមាណជាង ៧០០០ នាក់ តែមណ្ឌលនេះអាចផ្ទុកបានត្រឹមតែប្រមាណ ២០០០ នាក់ជាង ដូច្នេះបង្កឲ្យមានបញ្ហាជាច្រើនទាំងសុខភាព និងការអប់រំ។
លោកបានបញ្ជាក់ថា៖ «ជាក់ស្តែងកន្លងមកយើងបានដោះស្រាយភាពចង្អៀតណែនតាម ២ រូបភាព។ ទាំងថ្នាក់ក្រសួង ទាំងរាជរដ្ឋាភិបាលគឺបានរៀបចំសាងសង់ពន្ធនាគារថ្មីតាមរយៈថវិកាជាតិផង និងក្រសួងផង។ ជាក់ស្តែងយើងបានសាងសង់ពន្ធនាគារថ្មីមួយចំនួនដូចជានៅខេត្តតាកែវ ក្រចេះហើយ ២ ទៅ ៣ កន្លែងទៀត និងបានសាងសង់ ៨ អគារនៅមណ្ឌលអប់រំកែប្រែ ៤»។
ការបង្កើតក្រុមការងារនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានឯកភាពឱ្យក្រសួងមហាផ្ទៃ ក្រសួងយុត្តិធម៌ និងស្ថាប័នពាក់ព័ន្ធទាំងអស់រៀបចំកិច្ចប្រជុំដោះស្រាយបញ្ហាណែនចង្អៀតនៅក្នុងពន្ធនាគារតាមសំណើរបស់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានបង្ហាញក្ដីបារម្ភអំពីចំនួនទណ្ឌិតនៅទូទាំងប្រទេសមានការកើនឡើងកាន់តែច្រើន និងអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាលោកស្រី រ៉ូណា ស្ម៊ីត កាលពីដើមខែធ្នូឆ្នាំ ២០១៨ និង អង្គការសង្គមស៊ីវិលបានលើកឡើងពីភាពចង្អៀតណែននៅក្នុងពន្ធនាគារ។
កាលពីថ្ងៃទី ៧ ខែធ្នូលោក ស ខេង បានថ្លែងប្រាប់លោកស្រី ស្ម៊ីត ថាការបង្ក្រាបគ្រឿងញៀនជាកត្តាធ្វើឲ្យចំនួនអ្នកទោសនៅពន្ធនាគារមានការកើនឡើងខ្ពស់៕