.jpg)
អ្នកចូលរួមនៅក្នុងពិធីបិទមហាសន្និបាតអាណត្តិទី ២ សមាគមជាតិក្រុមប្រឹក្សារាជធានី ខេត្តកាលពីថ្ងៃម្សិលមិញ។ ហេង ជីវ័ន
ភ្នំពេញៈ ថវិកាសម្រាប់ការអភិវឌ្ឍ ឃុំ-សង្កាត់នីមួយៗ និងចំណាយរដ្ឋបាលមូលដ្ឋាននឹងកើនឡើងរហូតដល់ជាង ១០ ម៉ឺនដុល្លារ សម្រាប់ឆ្នាំ ២០២០ និងជិត ២០ ម៉ឺនដុល្លារ សម្រាប់ឆ្នាំ ២០២៣។ ជាមួយគ្នានេះលោក ស ខេង រដ្ឋមន្ត្រីក្រសួងមហាផ្ទៃបានជំរុញឲ្យមន្ត្រីក្រុមប្រឹក្សា ឃុំ-សង្កាត់ត្រូវប្រើប្រាស់ថវិកានេះប្រកបដោយប្រសិទ្ធភាព តម្លាភាព និងការទទួលខុសត្រូវខ្ពស់។
លោក ស ខេង បានលើកឡើងបែបនេះនៅក្នុងពិធីបិទមហាសន្និបាត អាណត្តិទី ២ របស់សមាគមជាតិក្រុមប្រឹក្សារាជធានី-ខេត្តកាលពីព្រឹកម្សិលមិញនៅសណ្ឋាគារភ្នំពេញដែលមានការចូលរួមពីប្រធាន ក្រុមប្រឹក្សារាជធានី-ខេត្តអភិបាលរាជធានី-ខេត្ត និងអ្នកពាក់ព័ន្ធប្រមាណជាង ៣០០ នាក់។
លោកបានថ្លែងថា ក្នុងនាមក្រសួងមហាផ្ទៃ និងក្នុងនាមគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) លោកសូមអបអរសាទរចំពោះរដ្ឋបាល ថ្នាក់ឃុំ សង្កាត់ ដែលត្រូវបានរាជរដ្ឋាភិបាលផ្តល់ការទុកចិត្ត និងមានភាពជឿជាក់លើការដឹកនាំរបស់ក្រុមប្រឹក្សាឃុំ សង្កាត់ ក្នុងការចូលរួមផ្តល់សេវា និងអភិវឌ្ឍមូលដ្ឋានដើម្បីឆ្លើយតបទៅនឹងបញ្ហា និងតម្រូវការចាំបាច់នានារបស់ប្រជាពលរដ្ឋក្នុងដែនសមត្ថកិច្ចរបស់ខ្លួនដែលធ្វើឲ្យរាជរដ្ឋាភិបាលបានសម្រេចបង្កើនថវិកាសម្រាប់អភិវឌ្ឍ និងរដ្ឋបាលមូលដ្ឋានសម្រាប់ឆ្នាំ ២០២០ នឹងកើនរហូតដល់ជាង ១០ ម៉ឺន និងជិត ២០ ម៉ឺនដុល្លារ សម្រាប់នៅឆ្នាំ ២០២៣។
លោកបញ្ជាក់ថា៖ «តាមពិតទៅ ១ ឃុំជាង ១០ ម៉ឺន ១ ឆ្នាំទាំងថវិកាអភិវឌ្ឍទាំងថវិកា ចំណាយរដ្ឋបាលទូទៅ គឺចាប់ផ្តើមមានតាំងពីឆ្នាំ ២០២០ ទៅហើយរហូតដល់ឆ្នាំ ២០២៣ គឺជិត ២០ ម៉ឺនឯណោះ ទាំងថវិកាអភិវឌ្ឍន៍ ទាំងថវិកា ចំណាយរដ្ឋបាល»។
លោកបានជំរុញដល់មន្ត្រីក្រុមប្រឹក្សា ឃុំ-សង្កាត់ត្រូវបន្តយកចិត្តទុកដាក់ក្នុងការគ្រប់គ្រងចាត់ចែង និងប្រើប្រាស់ថវិកាទាំងនេះឲ្យកាន់តែមានប្រសិទ្ធភាព តម្លាភាព និងគណនេយ្យភាពស្របតាមគោលការណ៍ និងនីតិវិធីដែលបានកំណត់ ហើយថាបើកាលណាការចំណាយមិនមានប្រសិទ្ធភាព តម្លាភាព និងគណនេយ្យភាពគឺនឹងធ្វើឲ្យរាជរដ្ឋាភិបាលក្រសួងស្ថាប័ន និងប្រជាពលរដ្ឋបាត់បង់នូវទំនុកចិត្តទៅលើមន្ត្រីក្រុមប្រឹក្សាឃុំ-សង្កាត់។
លោក ស ខេង រដ្ឋមន្ត្រីក្រសួងមហាផ្ទៃនៅក្នុងមហាសន្និបាតកាលពីម្សិលមិញ។ហេង ជីវ័ន
លោកញ្ជាក់ថា៖ «ដូច្នេះបើសិនណាលទ្ធភាព និងសមត្ថភាពរបស់ក្រុមប្រឹក្សា ឃុំ មិនឆ្លើយតបបាននូវការចាត់ចែងនឹងការប្រើប្រាស់ថវិកានេះទេ យើងនឹងជួបបញ្ហា ហើយនឹងបាត់បង់នូវការជឿទុកចិត្ត មិនត្រឹមតែពីរដ្ឋាភិបាលពីក្រសួងស្ថាប័ននោះទេថែមទាំងពីប្រជាពលរដ្ឋនៅក្នុងដែនសមកិច្ចរបស់ខ្លួនផងដែរ»។
លោកបន្តថា៖ «ពីមុនបន្ទោសថា មកពីគ្មានលុយ តែឥឡូវឲ្យលុយហើយ ហេតុអ្វីទៅធ្វើមិនកើត ដូច្នេះហើយពេលនេះយើងត្រូវខិតខំទាំងអស់គ្នា ដើម្បីប្រើប្រាស់លុយឲ្យអស់ មិនមែនមានន័យថាចេះតែប្រើដោយពុំមានតម្លាភាព និងគណនេយ្យភាពនោះទេ»។
លោកក៏បានជំរុញដល់មន្ត្រីក្រសួង និងស្ថាប័នពាក់ព័ន្ធ រាជធានី ខេត្ត ក្រុង ស្រុកខណ្ឌ ឲ្យបន្តផ្តល់ការគាំទ្រផ្នែកវិជ្ជាជីវៈ ផ្នែកបច្ចេកទេស និងការអភិវឌ្ឍសមត្ថភាពដល់ក្រុមប្រឹក្សាឃុំ-សង្កាត់ ដើម្បីធានាដល់ការចាត់ចែង និងប្រើប្រាស់ថវិកានេះឲ្យបានត្រឹមត្រូវប្រកបដោយការទទួលខុសត្រូវ បើទោះបីជាខ្លួនបានធ្វើការផ្ទេរអំណាច និងធនធានទៅមូលដ្ឋានរួចហើយក៏ដោយ។
លោក ស ខេង បញ្ជាក់ថា៖ «គាត់ (ថ្នាក់ជាតិ) នៅតែទទួលខុសត្រូវចំពោះប្រមុខរាជរដ្ឋាភិបាល និងរដ្ឋសភា អត់គេចទៅណារួចទេ ដោយសារច្បាប់យើងចែងដូចនេះ ហើយពិសេសច្បាប់រដ្ឋធម្មនុញ្ញ។ នៅពេលដែលផ្ទេរពីខ្ញុំទៅហើយ ខ្ញុំលែងទទួលខុសត្រូវហើយ ការគិតបែបនេះគឺជាការគិតមិនត្រឹមត្រូវដោយសារតែគាត់ចង់ក្តោបសិទ្ធិអំណាចទាំងឡាយនេះ ដើម្បីឲ្យគាត់បានកាន់លុយចាយ។ វាគឺជាទស្សនៈខុសឆ្គងដែលយើងមិនអាចទទួលយកបានទេ ពីព្រោះយើងត្រូវចែករំលែកផលទាំងអស់គ្នា»។
អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិលោក អ៊ូ ច័ន្ទរ័ត្ន បានស្វាគមន៍នូវវិធានការរបស់រាជរដ្ឋាភិបាលដែលនឹងបញ្ជូនមូលនិធិថវិកាជាតិ ដល់ឃុំ-សង្កាត់បន្ថែមទៀតហើយបានចាត់ទុកវិធានការនេះថានឹងជួយអភិវឌ្ឍឃុំ-សង្កាត់ និងភូមិ ព្រមទាំងជួយបង្កើនប្រសិទ្ធភាពក្នុងការអភិវឌ្ឍនៅថ្នាក់មូលដ្ឋាន។
លោកបញ្ជាក់ថា៖ «យើងស្វាគមន៍ គោលនយោបាយថ្មីរបស់គណបក្សប្រជាជន និងរាជរដ្ឋាភិបាល។ វាគឺជារឿងល្អ...វាជំរុញការអភិវឌ្ឍនៅមូលដ្ឋានទាំងផ្តល់ការងារហើយកាត់បន្ថយអំពើពុករលួយផងដែរ»។
លោក ង៉ាន់ ចំរើន អនុរដ្ឋលេខាធិការ ក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) មិនអាចទាក់ទងសុំអធិប្បាយបានទេកាលពីម្សិលមិញ។
លោក សឿង សារឿន ប្រធានអង្គការគណៈកម្មាធិការសហប្រតិបត្តិការ ដើម្បីកម្ពុជាបានចាត់ទុកការផ្តល់ថវិកាដល់រដ្ឋបាលថ្នាក់ក្រោមជាតិនេះថានឹងជួយក្នុងការអភិវឌ្ឍនៅថ្នាក់មូលដ្ឋាន ហើយអាជ្ញាធរមូលដ្ឋានត្រូវធ្វើការពិភាក្សាជាមួយប្រជាពលរដ្ឋ និងអង្គការសង្គមស៊ីវិលពាក់ព័ន្ធ ដើម្បីធានាថាថវិកាទាំងនេះត្រូវបានប្រើប្រាស់ប្រកបដោយប្រសិទ្ធភាព និងតម្លាភាព។
លោកថា៖ «យើងអបអរសាទរក្នុងការរីកចម្រើនក្នុងការផ្ទេរថវិកាដល់ថ្នាក់ឃុំ-សង្កាត់តែយើងចង់មើលឃើញការប្រើប្រាស់ថវិកាដោយតម្លាភាព និងគណនេយ្យភាពដោយមានការចូលរួមពីប្រជាពលរដ្ឋ និងអង្គការសង្គមស៊ីវិលក្នុងការសម្រេចធ្វើផែនការថវិកា»។
លោក សក់ សេដ្ឋា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប បានឲ្យដឹងកាលពីម្សិលមិញថា សព្វថ្ងៃនេះក្នុងមួយឃុំ-សង្កាត់ទទួលបានថវិកាជាមធ្យមប្រមាណជា ៣ ម៉ឺនដុល្លារ ក្នុង ១ ឆ្នាំ សម្រាប់ធ្វើការអភិវឌ្ឍ៕
