ភ្នំពេញៈ លោក សម សេរី ប្រធានរណស្សិរំដោះជាតិខែ្មរ (KNLF) កាលពីម្សិលមិញបានបង្ហាញពីជំនឿរបស់លោកថា នឹងទទួលបានព្រះរាជទានលើកលែងទោសពីព្រះមហាក្សត្រនៃព្រះរាជាណាចក្រកម្ពុជាក្រោយពីបានប្រកាសថាគ្រោងវិលចូលមកក្នុងស្រុកដើម្បីធ្វើនយោបាយវិញ ខណៈមន្ត្រីជាន់ខ្ពស់រាជរដ្ឋាភិបាលប្រកាសស្វាគមន៍ពីគម្រោងចុះបញ្ជីឲ្យទៅជាគណបក្សនយោបាយថ្មីរបស់លោក។
លោក សម សេរី ប្រធានរណស្សិរំដោះជាតិខ្មែរ (KNLF) បាននិរទេសខ្លួនឯងទៅកាន់ប្រទេសដាណឺម៉ាក ហើយទទួលបានសិទ្ធិជ្រកកោន និងនៅឆ្នាំ ២០១៦ បានបង្កើតរដ្ឋាភិបាលនិរទេសមួយនៅទឹកដីនោះ ហើយបានពាក់ព័ន្ធនឹងការចោទប្រកាន់អំពីសំណុំរឿងជួញដូរអាវុធ និងអំពើភេរវកម្មជាច្រើនករណី។ លោក សម សេរី ត្រូវបានចោទប្រកាន់ថាជាមេឧទ្ទាមប្រដាប់អាវុធប្រឆាំងនឹងរាជរដ្ឋាភិបាលកម្ពុជា។
លោកបានប្រាប់ភ្នំពេញប៉ុស្តិ៍កាលពីម្សិលមិញថា លោកមាន «សេចក្ដីរីករាយ» ចំពោះការស្វាគម៍គម្រោងនៃការចុះបញ្ជីគណបក្សរំដោះជាតិខ្មែរ (KNLP) ពីសំណាក់មន្ត្រីក្រសួងមហាផ្ទៃ និងមន្ត្រីរាជរដ្ឋាភិបាលកម្ពុជា។
លោកថ្លែងថា៖ «ខ្ញុំពិតជាមានសេចក្តីរីករាយដែលដឹងដំណឹងថា ភាគី (រដ្ឋាភិបាល) លោក ហ៊ុន សែន ស្វាគមន៍នូវការចុះបញ្ជីគណបក្សរំដោះជាតិខ្មែររបស់យើងខ្ញុំ»។
លោក សេរី ថ្លែងថា៖ «រដ្ឋាភិបាលបានផ្តល់ភ្លើងខៀវឲ្យយើងចុះបញ្ជីគណបក្ស និងអាចឈានតាមនីតិវិធីច្បាប់ដោះលែងសមាជិក និងលើកលែងទោសដល់ខ្ញុំ»។
លោក សេរី បានអះអាងថាមន្ត្រីរបស់លោកនឹងទៅចុះបញ្ជិកាគណបក្សរំដោះជាតិខ្មែរនៅក្រសួងមហាផ្ទៃនៅថ្ងៃទី ១២ ខែធ្នូ ឆ្នាំ ២០១៨ យោងតាមការគ្រោងទុក ក្រោយពីបានរៀបចំរចនាសម្ព័ន្ធដឹកនាំគណបក្ស និងលក្ខន្តិកៈគណបក្សរួចមក។
លោក សេរី ថ្លែងថា៖ «ពួកយើងបានរៀបចំឯកសារពាក់ព័ន្ធសមាជិកស្ថាបនិកចំនួន ៨០ នាក់រួចអស់ហើយ ហើយត្រៀមនឹងយកទៅដាក់ជូនក្រសួងមហាផ្ទៃពិនិត្យ។ អ្វីដែលខ្ញុំធ្វើនេះគឺចេញពីបេះដូងពិតប្រាកដចង់ឲ្យប្រទេសមានសន្តិភាព»។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃថ្លែងថាក្រសួងស្វាគមន៍ ១០០ ភាគរយចំពោះការចុះបញ្ជីគណបក្សនយោបាយថ្មីនៅកម្ពុជា ដោយក្រសួងនឹងមិនជំទាស់ទេ តែស្នើឲ្យពួកគេគោរពទៅតាមច្បាប់ស្ដីពីគណបក្សនយោបាយ។
លោក សុភ័គ ថ្លែងថា៖ «ការចុះ ឬមិនចុះអាហ្នឹងគឺជារឿងរបស់គាត់ ចុះបាន ឬមិនបានអាហ្នឹងគឺជារឿងផ្សេងមួយទៀត ក្រោយយើងពិនិត្យមើលសិន។ ទោះយ៉ាងណាយើងស្វាគមន៍ទាំងអស់គណបក្សនយោបាយណាដែលត្រឹមត្រូវតាមច្បាប់ យើងមិនជំទាស់អីទេ ព្រោះពួកគេ «មានសិទ្ធិ» ក្នុងការចុះបញ្ជីគណបក្សនយោបាយថ្មីស្របទៅតាមច្បាប់ស្ដីពីគណបក្សនយោបាយ និងអនុវត្តឲ្យបានត្រឹមត្រូវតាមនីតិវិធីច្បាប់ដែលបានចែង។ ឲ្យតែធ្វើត្រឹមត្រូវតាមច្បាប់ស្ដីពីគណបក្សនយោបាយទៅ យើងស្វាគមន៍ ១០០ ភាគរយ បើខុសពីច្បាប់មិនដឹងធ្វើម៉េច ឧទាហរណ៍បើច្បាប់មិនអនុញ្ញាត តើក្រសួងមហាផ្ទៃឯណាដែលធំជាងច្បាប់?»។
លោក ផៃ ស៊ីផាន អ្នកនាំពាក្យរាជរដ្ឋាភិបាលកាលពីដើមសប្ដាហ៍នេះក៏បានបង្ហើបឲ្យដឹងពីការស្វាគមន៍ចំពោះការប្រែក្លាយក្រុមឧទ្ទាម មកជាគណបក្សនយោបាយ ព្រោះថាទណ្ឌិតដែលទទួលស្គាល់កំហុសក៏អាចបើកផ្លូវឲ្យមានការលើកលែងទោសផងដែរ។
អ្នកនាំពាក្យរាជរដ្ឋាភិបាលរូបនេះថ្លែងថា៖ «ដូច្នេះការសម្រេចចិត្តក្លាយទៅជាគណបក្ស ល្អបំផុតរួមរស់ រួមសុខ ជាមួយមហាជន...។ យើងដឹងថាមានតែទណ្ឌិតទាំងអស់នោះទទួលបានការសម្រេចចុងក្រោយរបស់តុលាការ ហើយទណ្ឌិតទាំងអស់នោះទទួលស្គាល់ទោសកំហុសរបស់ខ្លួន និងមិនប្រឆាំងសាលដីកានោះនឹងបើកផ្លូវជូនសម្ដេចតេជោប្រើប្រាស់បុព្វសិទ្ធិរបស់លោកស្នើសុំទៅព្រះមហាក្សត្រទទួលការកាត់បន្ថយទម្ងន់ទោស ឬក៏ (តម្រូវឲ្យមានការដោះលែង) ឲ្យមានសេរីភាពឡើងវិញ»៕