.jpg)
លោក ហ៊ុន ម៉ានី តំណាងរាស្ត្រ មណ្ឌលកំពង់ស្ពឺ។ សហការី
ភ្នំពេញៈ លោក ហ៊ុន ម៉ានី កូនប្រុសរបស់លោកនាយករដ្ឋមន្រ្តី ហ៊ុន សែន និងជាតំណាងរាស្រ្តមណ្ឌលខេត្តកំពង់ស្ពឺបានថ្លែងថា លោក «ហួសពីការភ្ញាក់ផ្អើល» ចំពោះអត្ថាអធិប្បាយរបស់នាយករដ្ឋមន្រ្តីប្រទេស សិង្ហបុរី លោក Lee Hsien Loong អំពីវត្តមានវៀតណាមក្នុងប្រទេស កម្ពុជា បន្ទាប់ពីរបបខ្មែរក្រហមត្រូវបានផ្តួលរំលំ។
ប្រតិកម្មរបស់លោក ម៉ានី បានធ្វើឡើងកាលពីថ្ងៃសុក្រ ជាការឆ្លើយតបទៅនឹងអត្ថាធិប្បាយរបស់លោក Lee Hsien Loong នៅលើទំព័រហ្វេសប៊ុករបស់លោក ដែលបានបង្ហាញការរំលែកទុក្ខ ចំពោះមរណភាពរបស់អតីតនាយករដ្ឋមន្រ្តីថៃ និងជាឧត្តមសេនីយ៍ លោក Prem Tinsulanonda។
លោកបានថ្លែងថា អត្ថាធិប្បាយរបស់លោក Hsien Loong អំពីការពិតនៃប្រវត្តិសាស្រ្តបង្ហាញតែជ្រុងមួយនៃស្ថានការណ៍ ជាពិសេសជំហររបស់ប្រទេសអាស៊ីអាគ្នេយ៍មួយចំនួនកាលពីពេលនោះ។
កាលពីថ្ងៃសុក្រ លោក Lee Hsien Loong បានថ្លែងថា ការដឹកនាំរបស់លោក Prem បានផ្តល់អត្ថប្រយោជន៍មិនត្រឹមតែប្រទេស ថៃ ទេ ប៉ុន្តែដល់តំបន់ទាំងមូល។ លោកថ្លែងថា កាលពេលលោក Prem ជានាយករដ្ឋមន្រ្តីថៃ (១៩៨០‑១៩៨៨) ស្របពេលជាមួយសមាជិកអាស៊ាន (កាលពេលនោះមានចំនួនប្រាំ) រួមគ្នាប្រឆាំងនឹងការចូលឈ្លានពានរបស់វៀតណាមទៅលើប្រទេស កម្ពុជា និងរដ្ឋាភិបាលកម្ពុជាដែលបានជំនួសខ្មែរក្រហម ។
លោកបញ្ជាក់ថា៖ «ប្រទេស (ថៃ) ជាអ្នកនៅខ្សែមុខដោយប្រឈមមុខនឹងកម្លាំងវៀតណាម ដែលឆ្លងកាត់ព្រំដែនរបស់ខ្លួនជាប់កម្ពុជា ។ ឧត្តមសេនីយ៍ Prem តាំងចិត្តមិនទទួលយកអ្នកជំនួសនេះហើយបានធ្វើការជាមួយដៃគូអាស៊ាននានាដើម្បីប្រឆាំងនឹងការកាន់កាប់របស់វៀតណាមនៅលើវេទិកាអន្តរជាតិ»។
លោក Hsien Loong បានថ្លែងថា៖ «នេះបានរារាំងមិនឲ្យមានការចូលឈ្លានពានយោធា និងការផ្លាស់ប្តូរនៅក្នុងតំបន់ពីភាពស្របច្បាប់។ វាបានការពារសន្តិសុខរបស់បណ្តាប្រទេសអាស៊ីអាគ្នេយ៍ដទៃៗទៀត ហើយជាការការពារតំបន់យ៉ាងមានប្រសិទ្ធភាព និងលឿន»។
លោក ហ៊ុន ម៉ានី ថ្លែងថា គេមិនគួរមើលរំលង និងបំភ្លេចអំពើព្រៃផ្សៃ និងឧក្រិដ្ឋកម្មប្រឆាំងមនុស្សជាតិ ជាពិសេស អំពើប្រល័យពូជសាសន៍ ដែលបានប្រព្រឹត្តដោយរបបខ្មែរក្រហមនោះទេ។ ជាងនេះផងដែរ ពិភពលោកមិនគួរភ្លេចការឈឺចាប់ របស់ប្រជាជនកម្ពុជាទេ។ លោកបានថ្លែងថា រយៈពេល ៣ ឆ្នាំ ៨ ខែនិង ២០ ថ្ងៃ ដោយសារពិភពលោកបិទភ្នែកមើលមិនឃើញខ្មែរ ជនរងគ្រោះស្លូតត្រង់ជិត ៣ លាននាក់បានស្លាប់ក្រោមកណ្តាប់ដៃរបស់ខ្មែរក្រហម។
លោកបានថ្លែងថា៖ «ខណៈអ្នករាល់គ្នាកំពុងលេងនយោបាយ ប្រជាជនកម្ពុជា បានបន់ស្រន់ថា មិនថា ការជួយមកពីនរណា និងមកពីណាទេ យើងចង់ឲ្យគេជួយសង្គ្រោះពីរបបប្រល័យពូជសាសន៍របស់ខ្មែរក្រហម។ ការជួយកើតឡើងនៅក្នុងទម្រង់គណបក្សប្រជាជនកម្ពុជា ដោយមានការជួយពីប្រទេសជិតខាងរបស់យើងគឺវៀតណាម»។
អ្នកប្រវត្តិសាស្រ្តកម្ពុជា លោក ឌៀប សុផល បានថ្លែងថា ជាការពិតនៃប្រវត្តិសាស្រ្ត ខ្មែរក្រហម និងវៀតណាមបានប្រយុទ្ធគ្នាអស់រយៈពេលជាយូរ បន្ទាប់ពីពួកគេបានបរាជ័យក្នុងការចរចាជាច្រើន។
លោកបានថ្លែងថា អ្វីដែលលោក Lee Hsien Loong បានថ្លែង គឺគ្រាន់តែជាជ្រុងម្ខាង នៃជម្លោះស្មុគស្មាញ រវាងកម្ពុជានិងវៀតណាម និងសង្គ្រាមត្រជាក់។ លោកថ្លែងថា បណ្តាប្រទេសអាស៊ានក្នុងអំឡុងពេលនោះ ជាពិសេសថៃនិងសិង្ហបុរី គឺបារម្ភអំពីអំណាចរបស់វៀតណាម និងរបបកុម្មុយនីស្ត ប៉ុន្តែពួកគេមិនបានខ្វល់ខ្លាំងអំពីស្ថានភាពក្នុងប្រទេសទេ។
លោកបានថ្លែងថា៖ «អ្វីទាំងអស់នេះយើងមិនគួរមើលតែជ្រុងម្ខាងទេ។ យើងត្រូវតែមើលទៅជំហាននៃសង្គ្រាមត្រជាក់ដែលប្រទេសនានាបានប្រយុទ្ធគ្នា ដើម្បីសន្តិសុខ និងអត្ថប្រយោជន៍របស់ប្រទេសពួកគេ»។
លោកបានថ្លែងថា នៅក្នុងគោលនយោបាយការបរទេស អ្នកនយោបាយនិយាយសម្រាប់បុព្វហេតុប្រទេសរបស់ពួកគេខណៈបញ្ហាសន្តិសុខនៅក្នុងប្រទេសដទៃ គឺជារឿងបន្ទាប់បន្សំ។
លោកបន្តថា៖ «អ្វីដែលនាយករដ្ឋមន្រ្តីសិង្ហបុរីថ្លែងអំពីវត្តមានរបស់វៀតណាម [ក្នុងប្រទេស កម្ពុជា] ចំពោះខ្ញុំគឺគ្មានអ្វីសង្ស័យទេ»។
លោកបានថ្លែងថា៖ «គាត់ថ្លែងបែបនេះ ដើម្បីបង្ហាញថា គាត់មិនគាំទ្រវត្តមានរបស់វៀតណាមក្នុងប្រទេស កម្ពុជា ដោយសារវាប៉ះពាល់ដល់សន្តិសុខរបស់ប្រទេស ថៃ និងសន្តិសុខរបស់ប្រទេស សិង្ហបុរី ខណៈវៀតណាមជាប្រទេសខ្លាំងមួយ»។
លោក ឆាំង យុ នាយកមជ្ឈមណ្ឌលឯកសារកម្ពុជា បានថ្លែងថា មានតម្រូវការមួយឲ្យបង្កើតកម្មវិធីសន្តិភាពអាស៊ាន និងអប់រំសិទ្ធិមនុស្ស សម្រាប់តំបន់ ដោយចាប់ផ្តើមជាមួយប្រទេសសិង្ហបុរី។
មិនមានអ្វីច្រើនត្រូវបានអភិវឌ្ឍនាពេលថ្មីៗក្នុងការលើកកម្ពស់ការគោរពសិទ្ធិមនុស្ស នៅក្នុងតំបន់ រួមទាំងអនុសញ្ញាអាស៊ាន ស្តីពីសេចក្តីប្រកាសប្រឆាំងអំពើភេរវកម្ម សិទ្ធិមនុស្សអាស៊ាន និងសេចក្តីប្រកាសស្តីពីចលនាសកល នៃមជ្ឈន្តិកជន។
លោក ឆាំង យុ បានថ្លែងបញ្ជាក់ទៀតថា៖ «នៅពេលអ្នកមិនរៀនអំពីប្រវត្តិសាស្រ្ត អ្នកទំនងជាមិនមានអរិយធម៌ខ្លាំងនៅក្នុងពិភពលោកសម័យទំនើប»៕
