ភ្នំពេញ: លោកនាយករដ្ឋមន្ត្រី ហ៊ុន សែន បានចូលរួមរំលែកទុក្ខ រដ្ឋាភិបាលជប៉ុន ចំពោះគ្រោះទឹកជំនន់ដ៏អាក្រក់ ដែលបានសម្លាប់ជីវិតមនុស្សយ៉ាងហោចណាស់ ១៧៩ នាក់ និងបាត់ខ្លួនជាច្រើននាក់ គិតមកដល់ត្រឹមថ្ងៃទី ១១ ខែកក្កដា ឆ្នាំ ២០១៨។
នៅក្នុងលិខិតផ្ញើទៅកាន់លោក ស៊ីនហ្សូ អាបេ នាយករដ្ឋមន្ត្រី ជប៉ុន ចុះថ្ងៃទី ១០ ខែកក្កដា ដែលទើបតែត្រូវបានផ្សព្វផ្សាយនៅថ្ងៃទី ១១ ខែកក្កដានេះ លោក ហ៊ុន សែន បានសម្តែងការសោកស្តាយ ជាពន់ពេក នៅពេលទទួលបានព័ត៌មានអំពីការបាត់បង់ជីវិត មនុស្សជាច្រើនក្នុងគ្រោះទឹកជំនន់ និងបាក់ដីដោយសារភ្លៀងធ្លាក់ខ្លាំង ដែលបានបង្កការខូចខាត យ៉ាងធ្ងន់ធ្ងរនៅប៉ែកខាងត្បូង និងខាងលិចប្រទេសជប៉ុន តាំងពីចុងសប្តាហ៍មុនមក។
លិខិតរបស់លោក ហ៊ុន សែន បានបញ្ជាក់ថា៖«តាងនាមរាជរដ្ឋាភិបាល និងប្រជាជនកម្ពុជា ខ្ញុំសូមសម្តែងនូវការចូលរួមមរណទុក្ខដ៏ក្រៀមក្រំបំផុតចំពោះឯកឧត្តម និងប្រជាជនជប៉ុន ពិសេសគ្រួសារនៃសព ក្នុងគ្រាទុក្ខសោកដោយការបាត់បង់ដ៏ធំធេងនេះ»។
អ្នកនាំពាក្យរដ្ឋាភិបាល បានឲ្យដឹងនៅថ្ងៃទី ១១ ខែកក្កដានេះថា ចំនួនអ្នកស្លាប់ដោយសារជំនន់ទឹកភ្លៀង និងបាក់ដី ដែលបានបំផ្លិចបំផ្លាញផ្នែកជាច្រើន នៃប្រទេសជប៉ុន បានកើនឡើងដល់ ១៧៩ នាក់។
កិច្ចប្រតិបត្តិការរុករក និងជួយសង្រ្គោះ កំពុងបន្ត ក្រោយពីទឹកជំនន់និងបាក់ដី បណ្តាលមកទឹកភ្លៀង ហើយប្រព័ន្ធផ្សព្វផ្សាយសង្គម បានឲ្យដឹងថា មនុស្សរាប់សិបនាក់ទៀត នៅបាត់ខ្លួននៅក្នុងមហន្តរាយទាក់ទងនឹងអាកាសធាតុដ៏អាក្រក់បំផុត អស់រយៈពេលជាច្រើនទសវត្សរ៍ហើយនៅក្នុងប្រទេសដែលមានសេដ្ឋកិច្ចជឿនលឿនមួយនេះ៕