.jpg)
លោក ហ៊ុន សែន ថ្លែងទៅកាន់អ្នកគាំទ្រនៅសហរដ្ឋអាមេរិកកាលពីថ្ងៃទី ៣០ កញ្ញា។ រូបថត ហ្វេសប៊ុក SPM
សហរដ្ឋអាមេរិកៈ ជាមួយនឹងការបញ្ជាក់ខ្លាំងៗថាលោកស្អប់ខ្លាំងណាស់ចំពោះក្រុមចោរលួចកាប់ព្រៃឈើ លោកនាយករដ្ឋមន្ត្រី ហ៊ុន សែន ក៏បានព្រមានពីនាយសមុទ្រយ៉ាងម៉ឺងម៉ាត់មកថា ឲ្យចាប់ក្រុមចោរកាប់ឈើទាំងនោះ ហើយជាថ្មីម្តងទៀតបញ្ជាឲ្យឧទ្ធម្ភាគចក្រតាមដានជនដែលចូលលួចកាប់ព្រៃឈើ ហើយបាញ់ពីលើតែម្តង។
ការលើកឡើងរបស់លោក ហ៊ុន សែន បែបនេះ ខណៈលោកជួបសំណេះសំណាលជាមួយពលរដ្ឋខ្មែរ-អាមេរិកាំងនៅសហរដ្ឋអាមេរិកនាថ្ងៃទី ៣០ ខែកញ្ញា គ្រាដែលលោកទៅចូលរួមប្រជុំមហាសន្និបាតអង្គការសហប្រជាជាតិនាទីក្រុងញូវយ៉ក។ ការព្រមានរបស់លោក ហ៊ុន សែន នេះក៏ធ្វើឡើងក្រោយពីរដ្ឋមន្ត្រីក្រសួងមហាផ្ទៃលោក ស ខេង បានរិះគន់ច្បាប់ព្រៃឈើដោយថា ច្បាប់នេះមិនផ្តល់អំណាចឲ្យអាជ្ញាធរក្នុងការបង្ក្រាបបទល្មើសព្រៃឈើ។
លោកក៏បានស្តីបន្ទោសមន្ត្រីចំពោះការបណ្តោយឲ្យមានបទល្មើសព្រៃឈើ និងការប្រើលេសសម្អាតបាតអាងនៃទំនប់វារីអគ្គិសនីសេសានក្រោម ២ ទៅបំផ្លាញព្រៃឈើ ខណៈសកម្មជនការពារបរិស្ថានថ្មីៗនេះ ធ្លាប់រិះគន់ថា វិធានការមានភាពយឺតយ៉ាវ និងគ្មានប្រសិទ្ធភាព។
លោក ហ៊ុន សែន បានទទួលស្គាល់ការបាត់បង់ព្រៃឈើ ប៉ុន្តែអះអាងថាដោយសារចំនួនប្រជាពលរដ្ឋមានការកើនឡើងហើយថា ការកាប់ព្រៃឈើគឺជំនួសឲ្យការដាំចម្ការកៅស៊ូដោយលោកបញ្ជាក់ថា បានបញ្ជាឲ្យឧទ្ធម្ភាគចក្របាញ់ពីលើផងដែរ ។
លោកសង្កត់ធ្ងន់ថា៖ «គេថាបាត់បង់ព្រៃឈើ វាជាការត្រឹមត្រូវណាស់។ គេនិយាយពីការបាត់បង់ព្រៃឈើគឺត្រូវ ក៏ប៉ុន្តែខ្ញុំសួរថា តើព្រៃឈើដែលបានបាត់បង់ទៅជំនួសដោយដីអ្វី? (វា) គឺដីស្រែ ដីចម្ការ ដោយសារប្រជាជនយើងកើត យើងត្រូវរកដីឲ្យគាត់។ បើអ្នកឯងចិត្តសឿងឲ្យដីវិញមក! អ្នកឯងឲ្យដីមកវិញមក»។
លោកថ្លែងបែបនេះដោយភ្ជាប់នឹងការរិះគន់ក្រុមគណបក្សប្រឆាំងដែលលោកថាបានកាន់កាប់ដី និងជំរុញឲ្យក្រុមបក្សប្រឆាំងដែលកំពុងកាន់កាប់ដីប្រគល់ឲ្យរដ្ឋវិញដោយថា តាំងពីដើមមកមិនមានអ្នកណាមានដីនោះទេ។
លោកបន្ថែមថា៖ «ខ្ញុំទទួលស្គាល់អាចោរលួចកាប់ព្រៃឈើ ខ្ញុំកំពុងឲ្យឧទ្ធម្ភាគចក្របាញ់ពីលើផងឥឡូវហ្នឹង។ ខ្ញុំស្អប់អាចោរលួចកាប់ឈើ ក៏ប៉ុន្តែករណីរាប់លានហិកតាដែលប្រជាពលរដ្ឋទៅកាប់ដើម្បីធ្វើស្រែចម្ការ អាហ្នឹងវាជាការបាត់បង់ព្រៃឈើ។ ដីហ្នឹងអាណាជីកយកទៅណា វានៅហ្នឹង រាប់ទាំងពួកប្រឆាំងផងហ្នឹង»។
កាលពីចុងខែសីហាឆ្នាំនេះលោក សក់ សេដ្ឋា រដ្ឋលេខាធិការក្រសួងមហាផ្ទៃបានបញ្ជាឲ្យខេត្តរតនគិរី មណ្ឌលគិរី និងខេត្តស្ទឹងត្រែងចាត់វិធានការទប់ស្កាត់ និងបង្ក្រាបបទល្មើសព្រៃឈើឲ្យទាន់ពេលវេលា និងមានប្រសិទ្ធភាព បន្ទាប់ពីទទួលបានលិខិតពីប្រតិភូសហភាពអឺរ៉ុបស្ដីពីរបាយការណ៍ «បទល្មើសជាប្រព័ន្ធ ប្រទេសវៀតណាមបានបន្តនាំចូលឈើហុបខុសច្បាប់ពីកម្ពុជា» ដែលទីភ្នាក់ងារស៊ើបអង្កេតបរិស្ថានចេញផ្សាយកាលពីថ្ងៃទី ៣១ ខែឧសភាឆ្នាំនេះ ដោយបានរកឃើញថាមានការកាប់ឈើខុសច្បាប់ទ្រង់ទ្រាយធំនៅខេត្តទាំង ៣ ខាងលើជាពិសេសនៅចំណុចឧទ្យានជាតិវីរជ័យ និងដែនជម្រកសត្វព្រៃភ្នំព្រិចព្រមទាំងនៅម្តុំព្រៃធម្មជាតិខាងជើងទំនប់វារីអគ្គិសនីសេសានក្រោម២។
ប៉ុន្តែអតីតតំណាងរាស្ត្រនៃគណបក្សប្រឆាំងលោក អ៊ូ ច័ន្ទរ័ត្ន និយាយថា វិធានការរបស់រដ្ឋាភិបាលពុំមានប្រសិទ្ធភាព ដោយសារមន្ត្រីមានអំណាចមួយចំនួនការពារអ្នករកស៊ីឈើធំៗហើយថារហូតមកដល់ពេលនេះពុំមានការកាត់ទោសអ្នករកស៊ីឈើធំៗ។
លោកថា៖ «យើងឃើញមានចំណាត់ការប៉ុន្មានឆ្នាំមុនក៏ដូចគ្នាដែរប្រើសុទ្ធតែកងកម្លាំងប្រដាប់អាវុធទាំងមន្ត្រីកងរាជអាវុធហត្ថ និងគណៈកម្មការដើម្បីត្រួតពិនិត្យ និងចាត់វិធានការ។ ប៉ុន្តែកន្លងមកយើងពុំឃើញមានការទប់ស្កាត់ដោយប្រសិទ្ធភាពយើងឮសូរបានមួយប្រាវហើយយើងពុំឃើញមានការយកមកកាត់ទោសជាក់ស្តែងហើយការកាប់បំផ្លាញបន្តនៅតែកើតមានដោយសារវាពាក់ព័ន្ធនឹងមន្ត្រីដែលមានអំណាច ឬអ្នកមានអំណាច»៕
