ភ្នំពេញៈ លោកនាយករដ្ឋមន្ត្រី ហ៊ុន សែន បានថ្កោលទោសចំពោះការវាយប្រហារដ៏សាហាវឃោរឃៅនៅប្រទេស ស្រីលង្កា ដែលបានសម្លាប់មនុស្សរហូតដល់ជាង ៣០០ នាក់ និងរបួសជាង ៥០០ នាក់ ហើយបានរំឭកឲ្យកងកម្លាំងប្រដាប់អាវុធកម្ពុជា ត្រូវទប់ស្កាត់កុំឲ្យកម្ពុជាក្លាយជាជម្រកនៃអំពើភេរវកម្ម។
លោកបានថ្លែងដូច្នេះនៅក្នុងពិធីចែកសញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រង (NUM) ជាង ២ ពាន់នាក់ នៅមជ្ឈមណ្ឌលកោះពេជ្រ កាលពីព្រឹកម្សិលមិញ។
លោកបានថ្លែងថា៖ «ហើយខ្ញុំករុណាខ្ញុំសុំឆ្លៀតយកឱកាសនេះ ធ្វើការថ្កោលទោសយ៉ាងម៉ឺងម៉ាត់ ចំពោះអំពើភេរវកម្ម នៅស្រីលង្កា ដែលរហូតមកដល់ពេលនេះ ចំនួនអ្នកស្លាប់ឡើងគំហុករហូតទៅដល់ ២៩០ នាក់ ហើយអ្នករបួសជាង ៥០០ នាក់ទៅទៀត»។
កាលពីថ្ងៃអាទិត្យ មានការវាយប្រហារទៅលើព្រះវិហារគ្រិស្តសាសនា នៅក្នុងទីក្រុង Negombo ស្ថិតនៅភាគខាងជើង នៃរដ្ឋធានីកូឡុំបូ ប្រទេស ស្រីលង្កា។ មនុស្សប្រមាណ ៤០ នាក់ ត្រូវបានចាប់ខ្លួនហើយរដ្ឋាភិបាលបានបន្ទោសការវាយប្រហារនេះទៅលើក្រុមមួយឈ្មោះ National Thowheed Jamath។
លោក ហ៊ុន សែន ថ្លែងបន្តថា៖ «ត្រង់ហ្នឹងហើយ ដែលខ្ញុំព្រះករុណាខ្ញុំ តែងតែរំឭកដាស់តឿនចំពោះមន្ត្រីនគរបាល មន្ត្រីអាវុធហត្ថ ជារួមកម្លាំងសមត្ថកិច្ចដែលមានភារកិច្ចទទួលខុសត្រូវលើបញ្ហាសន្តិសុខជាតិ ខ្ញុំករុណាខ្ញុំ តែងតែប្រាប់ពួកគេថា ឃើញទឹកស្ងប់ មិនត្រូវគិតថា នៅក្នុងទឹកគ្មានត្រីឬក្នុងទឹកគ្មានសត្វដែលមានពិសនោះទេ។ កុំឲ្យកម្ពុជាក្លាយជាជម្រក ក្លាយជាគោលដៅនៃការវាយប្រហារភេរវកម្ម ឬជាជម្រកនៃអំពើភេរវកម្ម»។
លោកថា ការដឹកនាំមិនមែនចេះតែដឹកនាំ មិនមែនចេះត្រឹមតែស្រែកដូចមនុស្សមួយចំនួននោះទេ ប៉ុន្តែការដឹកនាំត្រូវចេះមានបទបញ្ជា ចេះមានបច្ចេកទេស ដើម្បីគ្រប់គ្រងសភាពការណ៍យ៉ាងណា ដើម្បីឲ្យប្រទេសមានសន្តិភាព មានសេចក្តីសុខ ដោយមិន ផ្ដល់ឱកាសឲ្យក្រុមភេរវកម្មណាមួយ វាយប្រហារបំផ្លាញជីវិតប្រជាជននោះទេ។
ជាមួយគ្នានេះ លោកនាយករដ្ឋមន្ត្រីបានកោតសរសើរដល់កម្លាំងប្រដាប់អាវុធដែលបានរក្សាសន្តិសុខសម្រាប់ប្រជាពលរដ្ឋ ជាពិសេសក្នុងអំឡុងបុណ្យចូលឆ្នាំខ្មែរ ដើម្បីឲ្យពលរដ្ឋបានសប្បាយរីករាយ។ លោកបានស្នើកុំឲ្យយករឿងសមត្ថកិច្ចខិលខូចមួយចំនួន មកធ្វើឲ្យខូចឈ្មោះដល់កងកម្លាំងទាំងមូល។ ផ្ទុយទៅវិញ ពលរដ្ឋអាចនិយាយឲ្យចំឈ្មោះមន្ត្រីខិលខូច តែមិនគួរនិយាយលើនគរបាលទាំងមូលទេ ព្រោះនគរបាលទាំងមូលបានធ្វើពលិកម្មធំធេងចំពោះប្រជាពលរដ្ឋ។
កាលពីពាក់កណ្ដាលខែមីនាកន្លងទៅ ការវាយប្រហារលើព្រះវិហារអ៊ិស្លាមមួយបានកើតឡើងនៅប្រទេស នូវែលសេឡង់ ដែលអ្នកបើកការវាយប្រហារបានសម្លាប់មនុស្ស ៥០ នាក់។ លោក ហ៊ុន សែន បានលើកជាចម្ងល់ថា តើអំពើភេរវកម្មនៅស្រីលង្កា និងនៅនូវែលសេឡង់ មានទំនាក់ទំនងជាមួយគ្នាដែរឬយ៉ាងណា?។
យ៉ាងណាក៏ដោយ លោក ហ៊ុន សែន បានថ្លែងថា បទពិសោធនៅស្រីលង្កា និងនៅនូវែលសេឡង់ បានផ្ដល់មេរៀនកាន់តែច្រើនសម្រាប់កម្ពុជា។
លោកបញ្ជាក់ថា៖ «ត្រូវបន្តការគ្រប់គ្រងឲ្យបានហ្មត់ចត់ទៅលើការប្រើប្រាស់អាវុធជាតិផ្ទុះ សេរីភាពហួសហេតុទៅលើការប្រើអាវុធ ប្រើជាតិផ្ទុះ គឺមិនមែនជាសេរីភាពសម្រាប់សេចក្តីសុខរបស់ប្រជាពលរដ្ឋទេ។ ប្រទេសខ្លះបាញ់គ្នាស្ទើររាល់ឆ្នាំ បាញ់កូនសិស្ស បាញ់អី ដោយសារតែរឿងអាវុធហ្នឹង។ ប៉ុន្តែកម្ពុជា សុំតឹងតែងបន្តិចហើយ។ តឹងតែងប៉ុណ្ណឹងហើយ គង់មានបញ្ហា។ អ្នកខ្លះដកអាវុធភ្ជង់គេទៅ កើតរឿងដោយសារអាវុធហ្នឹង»។
ក្រសួងការបរទេស ក៏បានចេញសេចក្តីថ្លែងការណ៍ថ្កោលទោសភ្លាមៗកាលពីថ្ងៃអាទិត្យ ទៅលើការវាយប្រហារនៅស្រីលង្កា ដោយបានថ្លែងថា៖ «រាជរដ្ឋាភិបាលកម្ពុជាថ្កោលទោសយ៉ាងខ្លាំងក្លា ចំពោះអំពើហិង្សាដ៏សាហាវឃោរឃៅ ហើយទង្វើបង្កឲ្យមានការភ័យខ្លាច និងជ្រុលនិយមដ៏គួរឲ្យស្អប់ខ្ពើមនេះ នឹងមិនត្រូវបានអត់ឱនជាដាច់ខាត។ ព្រះរាជាណាចក្រកម្ពុជា ប្ដេជ្ញាចិត្តក្នុងការប្រយុទ្ធប្រឆាំងនឹងអំពើភេរវកម្ម និងជ្រុលនិយមតាមគ្រប់ទម្រង់ និងរូបភាព»។
ក្រសួងការបរទេសបន្តថា៖ «រាជរដ្ឋាភិបាល និងប្រជាជនកម្ពុជា មានជំហរសាមគ្គីភាព ជាមួយរដ្ឋាភិបាល និងប្រជាជនស្រីលង្កានៅក្នុងគ្រាដ៏លំបាកនេះ និងសូមបួងសួងឲ្យអ្នករងរបួសទាំងអស់ បានជាសះស្បើយឆាប់រហ័សឡើងវិញ»។
លោក ឡៅ ម៉ុងហៃ អ្នកវិភាគនយោបាយយល់ឃើញថា លោកនាយករដ្ឋមន្ត្រីមានហេតុផលសមរម្យក្នុងការពិចារណាទៅលើការវាយប្រហារលើព្រះវិហារគ្រិស្តសាសនា នៅស្រីលង្កា ដោយសារតែនៅកម្ពុជាក៏មានព្រះវិហារគ្រិស្តសាសនាច្រើនដែរ។
ប៉ុន្តែលោកថ្លែងថា៖ «ទោះយ៉ាងណា ដើម្បីឲ្យការគ្រប់គ្រងប្រកបដោយប្រសិទ្ធភាព លោកនាយករដ្ឋមន្ត្រី ដំបូងបំផុតត្រូវតែដាក់ការគ្រប់គ្រងឲ្យបានតឹងរ៉ឹង ទៅលើបញ្ជីអាវុធ និងគ្រាប់រំសេវដែលភ្នាក់ងាររដ្ឋាភិបាលមាន»៕