.jpg)
លោកនាយករដ្ឋមន្ត្រី ហ៊ុន សែន ថ្លែងនាពេលកន្លងមក។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បញ្ជាឲ្យមន្ត្រីនៅថ្នាក់ក្រោមជាតិ រួមគ្នាទប់ស្កាត់បញ្ហាអសន្តិសុខនៅក្នុងភូមិស្របតាមពាក្យស្លោកភូមិឃុំមានសុវត្ថិភាព ខណៈលោកចាត់ទុកថា ការធ្វើឲ្យភូមិឃុំមានសុខសុវត្ថិភាពពិតប្រាកដ គឺជាមូលដ្ឋានគ្រឹះដែលអាចឲ្យគណបក្សកាន់អំណាចរក្សាបាននូវប្រជាប្រិយភាព។
ការថ្លែងរបស់លោកនាយករដ្ឋមន្ត្រីយ៉ាងដូច្នេះបានធ្វើឡើងនៅក្នុងពិធីបិទសន្និបាតក្រសួងមហាផ្ទៃកាលពីថ្ងៃទី ២០ ខែកុម្ភៈស្របពេលដែលក្រសួងមហាផ្ទៃដាក់ទិសដៅបន្ថែម ដើម្បីធ្វើយ៉ាងណាឲ្យការអនុវត្តគោលនយោបាយរបស់រដ្ឋាភិបាលនៅឆ្នាំ ២០២០ នេះសម្រេចបានជោគជ័យ។
លោកនាយករដ្ឋមន្ត្រីបានថ្លែងថា ការធ្វើបែបនេះនឹងធ្វើឲ្យបញ្ហានៅភូមិសង្កាត់នីមួយៗអស់បញ្ហាប្រឈមហើយវាក៏ជាយុទ្ធសាស្ត្រក្នុងការទាក់ទាញប្រជាប្រិយភាពដ៏ល្អមួយសម្រាប់គណបក្សកាន់អំណាចផងដែរដោយនឹងទទួលបានការជឿទុកចិត្តពីពលរដ្ឋ មិនថា អ្នកគាំទ្រ ឬមិនគាំទ្រ ព្រោះនៅពេលដែលគណបក្សប្រជាជនកាន់អំណាច គឺសន្តិភាព សុវត្ថិភាពត្រូវបានធានា។
លោកថ្លែងថា៖ «ការដាក់ចេញជាគោលនយោបាយ ភូមិឃុំមានសុវត្ថិភាព គឺជាគោលនយោបាយត្រឹមត្រូវ ប៉ុន្តែនៅខ្វះគឺនៅត្រង់ថា យើងមិនបានក្តាប់ជាប់នូវគន្លឹះ ហើយយើងងាកទៅឆ្វេងបន្តិច ងាកទៅស្តាំបន្តិច ឬហៅថាចាប់នេះចាប់នោះ មិនឆ្ពោះទៅណា។ នៅពេលដែលយើងជជែកវែកញែក ពិភាក្សាជាមួយប្រជាពលរដ្ឋ ដើម្បីរកវិធីដោះស្រាយបញ្ហានោះ វានឹងលេចឡើងនូវមតិរបស់ប្រជាពលរដ្ឋ តើគួរធ្វើបែបណា? តើពលរដ្ឋគួរចូលរួមជាមួយយើង? បើគាត់មិនសហការជាមួយយើងទេ សុវត្ថិភាពរបស់ពួកគាត់ ក៏មិនត្រូវបានធានា យើងក៏អនុវត្តនូវកិច្ចការរបស់យើងមិនបានដែរ។ ទាល់តែមានទំនាក់ទំនងជាមួយគ្នាដែលអាចដោះស្រាយបាននូវបញ្ហា»។
លោករំឭកពីវិធានការដើម្បីធ្វើយ៉ាងណាឲ្យភូមិឃុំមានសុវត្ថិភាពដោយគ្មានបញ្ហាគ្រឿងញៀន និងឧក្រិដ្ឋកម្មនានានេះស្របពេលដែលលោកទទួលស្គាល់ថាកន្លែងដែលនាំឲ្យកើតមានឧក្រិដ្ឋកម្ម បញ្ហាគ្រឿងញៀន ល្បែងស៊ីសង អំពើហិង្សា គឺតែងតែកើតមាននៅក្នុងភូមិ សង្កាត់ ជាកន្លែងដែលប្រជាពលរដ្ឋរស់នៅ ដូច្នេះបើគ្មានការចូលរួម និងចាត់វិធានការឲ្យចំគោលដៅនោះទេ បញ្ហាទាំងនេះនឹងមិនអាចដោះស្រាយបាននោះទេ។
លោកមានប្រសាសន៍ថា៖ «សុំឲ្យយកចិត្តទុកដាក់ទៅលើបញ្ហានេះតទៅទៀត ព្រោះកុំឲ្យមានឧក្រិដ្ឋកម្មគ្របដណ្តប់ទៅលើបញ្ហាដែលប្រជាជនកំពុងទទួលបាននូវសេចក្តីសុខមានសុវត្ថិភាព ព្រោះសុវត្ថិភាពរបស់ប្រជាពលរដ្ឋគឺមានសារៈសំខាន់បើពួកគាត់ទុកចិត្ត នៅពេលណាគណបក្សប្រជាជនកាន់អំណាចសុវត្ថិភាពរបស់ពួកគាត់ត្រូវបានធានាបើទោះជាក្រីក្របន្តិចមែនប៉ុន្តែសុវត្ថិភាពត្រូវធានាដែលត្រង់នេះហើយដែលយើងត្រូវប្រឹងបន្តទៀត»។
តាមការស្ទង់មតិនៅឆ្នាំ ២០១៩ ដែលបានបង្ហាញនៅក្នុងរបាយការណ៍របស់ក្រសួងមហាផ្ទៃបានឲ្យដឹងថា ប្រជាពលរដ្ឋប្រមាណ ៨៤ ភាគរយបានបង្ហាញពីភាពជឿជាក់របស់ពួកគេមកលើកម្លាំងមានសមត្ថកិច្ច និងមានអារម្មណ៍ថាមានសុវត្ថិភាពនៅក្នុងភូមិ សង្កាត់របស់ពួកគេក្នុងអត្រា ៨១,១ ភាគរយ។
លោក ហ៊ុន សែន រំពឹងថាប្រជាប្រិយភាពរបស់គណបក្សប្រជាជននឹងមិនបាត់បង់ទៅណានោះទេ ប្រសិនបើនៅតែអាចរក្សាបាននូវសុខសុវត្ថិភាពនៅក្នុងភូមិសង្កាត់ទូទាំងប្រទេស។
លោក មាស នី អ្នកវិភាគបញ្ហាសង្គមបានថ្លែងថា ការដែលធ្វើឲ្យភូមិឃុំមានសុវត្ថិភាពគឺជារឿងមួយដែលរដ្ឋាភិបាល គួរធ្វើយូរណាស់មកហើយ។ ប៉ុន្តែលោកថា ការអនុវត្តយន្តការនេះក៏នៅតែមិនទាន់ហួសពេលនោះដែរ ដើម្បីឲ្យប្រជាពលរដ្ឋអាចរស់នៅដោយគ្មានការភ័យខ្លាច៕
