ភ្នំពេញៈ លោកនាយករដ្ឋមន្ត្រី ហ៊ុន សែន នឹងចូលរួមប្រកាសបើកកិច្ចប្រជុំកំពូលអាស៊ីប៉ាស៊ីហ្វិកឆ្នាំ ២០១៩ ដែលបានរៀបចំឡើងនៅវិមានសន្ដិភាពក្នុងរាជធានីភ្នំពេញនៅព្រឹកនេះ។ កិច្ចប្រជុំកំពូលលើកទី ២ នេះគឺមានការចូលរួមពីប្រតិភូជាង ៨៦០ នាក់ មកពី ៤០ ប្រទេស និងធ្វើឡើងក្រោមប្រធានបទ «ការឆ្លើយតបចំពោះបញ្ហាប្រឈមគន្លឹះនាពេលបច្ចុប្បន្ន សន្ដិភាព ការផ្សះផ្សាជាតិ ការពឹងពាក់គ្នាទៅវិញទៅមក វិបុលភាពទៅវិញទៅមក និងគុណតម្លៃជាសកល»។
រដ្ឋាភិបាលបានប្រកាសថា ក្នុងចំណោមប្រតិភូបរទេសទាំងនោះគឺមានមេដឹកនាំរដ្ឋាភិបាល សមាជិកសភា មេដឹកនាំស្ដ្រី យុវជន និងសាសនា រួមទាំងតំណាងសារព័ត៌មាន សាកលវិទ្យាល័យ អង្គការសង្គមស៊ីវិល រួមទាំងពាណិជ្ជករ។ បន្ទាប់ពីលោក ហ៊ុន សែន ថ្លែងសុន្ទរកថាបើកកិច្ចប្រជុំកំពូលអាស៊ីប៉ាស៊ីហ្វិកក្នុងនោះក៏មានការថ្លែងសុន្ទរកថាជាបន្តបន្ទាប់ពីប្រធានសហស្ថាបនិកអង្គការបណ្ដាគណបក្សនយោបាយនៅអាស៊ី (ICAPP) លោក Jose de Venecia Jr និងសុន្ទរកថាពីសហស្ថាបនិកសហព័ន្ធសន្ដិភាពសកលលោក Hak Ja Han Moon។
ជាមួយគ្នានេះលោក U Henry Van Thio អនុប្រធានាធិបតីមីយ៉ាន់ម៉ា លោក Raynold Oilouch អនុប្រធានាធិបតីរដ្ឋប៉ាឡៅលោក Shirin Sharmin Chaudhury សមាជិកសភាប្រទេសបង់ក្លាដែស លោក Qasim Khan Suri អនុប្រធានសភាជាតិប៉ាគីស្ថានលោក Jusuf Kalla អតីតអនុប្រធានាធិបតីឥណ្ឌូនេស៊ី និងលោក Kay Rala Xanana Gusmao អតីតប្រធានាធិបតីទីម័រខាងកើត ក៏ត្រូវឡើងថ្លែងសុន្ទរកថានៅពេលព្រឹកនោះដែរ ខណៈកិច្ចពិភាក្សា និងកិច្ចប្រជុំចំនួន ៤ ផ្សេងទៀត ត្រូវរៀបចំធ្វើឡើងនៅពេលរសៀល ហើយសេចក្ដីថ្លែងការណ៍នៃកិច្ចប្រជុំមួយថ្ងៃនេះនឹងប្រកាសនៅយប់ថ្ងៃដដែលក្នុងសណ្ឋាគារសុខា។
ឈានចូលថ្ងៃទី ២០ ខែវិច្ឆិកា កម្មវិធីរបស់យុវជន និងអ្នកតំណាងសាសនា រួមមាន ពុទ្ធសាសនា គ្រិស្តសាសនា ខុងជឺសាសនា ហិណ្ឌូសាសនា និងអ៊ិស្លាមសាសនា ដើម្បីធ្វើបទបង្ហាញស្ដីពីការកសាងជាតិ និងសន្ដិភាពដែលត្រូវជួបគ្នានៅពេលព្រឹក និងកម្មវិធីសម្ដែងសិល្បៈវប្បធម៌អាស៊ី ដើម្បីសន្ដិភាព និងការអភិវឌ្ឍនៅពេលរសៀលដែលនឹងធ្វើឡើងនៅសាលមហោស្រពកោះពេជ្រ មុនកម្មវិធីជប់លៀងអាហារពេលល្ងាចនៅសណ្ឋាគារសុខាដើម្បីប្រកាសបិទកម្មវិធី។
លោក ឯក ថា អនុប្រធានអង្គភាពអ្នកនាំពាក្យរដ្ឋាភិបាល និងជាអ្នកនាំពាក្យនៃកិច្ចប្រជុំកំពូលអាស៊ីប៉ាស៊ីហ្វិកលើកទី ២ នេះបានប្រាប់ភ្នំពេញប៉ុស្ដិ៍ម្សិលមិញថា រដ្ឋាភិបាលកម្ពុជាក៏បានអញ្ជើញភ្ញៀវជាតិជាង ២០០ នាក់ ដើម្បីចូលរួមកិច្ចប្រជុំនេះដែរ។
លោកបន្តថា កិច្ចប្រជុំប្រវត្តិសាស្ដ្រនេះគឺលើកឡើងពីផលវិជ្ជមាននៃកិច្ចសហប្រតិបត្តិការរវាងរដ្ឋាភិបាល និងសង្គមស៊ីវិលក្នុងការកសាងសន្ដិភាព និងការផ្សះផ្សាជាតិ ការអភិវឌ្ឍប្រកបដោយចីរភាព វិបុលភាព និងការស្វែងរកការងារដែលធ្វើទៅបាន ដើម្បីដោះស្រាយបញ្ហាសំខាន់។
លោកបន្ថែមថា កម្ពុជានឹងមិនអាចធ្វើជាម្ចាស់ផ្ទះនៃកិច្ចប្រជុំកំពូលអាស៊ីប៉ាស៊ីហ្វិកលើកទី ២ នេះឡើយ ប្រសិនណាបើកម្ពុជានៅតែស្ថិតក្នុងសង្គ្រាម។ លោកបញ្ជាក់ថា សន្ដិភាពពេញលេញ ស្ថិរភាពនយោបាយ គោលនយោបាយការបរទេសដ៏រាក់ទាក់របស់ប្រទេសកម្ពុជាគឺបានឆក់បានបេះដូងរបស់សហព័ន្ធសន្ដិភាពសកល (UPF) និងបណ្ដាប្រទេសក្នុងតំបន់ប៉ាស៊ីហ្វិក ដើម្បីអបអរឱ្យកម្ពុជាធ្វើជាម្ចាស់ផ្ទះនៃកិច្ចប្រជុំក្នុងឆ្នាំនេះ។
លោកថា៖ «ប្រទេស កម្ពុជា បានជួបប្រទះបទពិសោធអាក្រក់ជិត ៤០ ឆ្នាំ ដោយសារសង្គ្រាមការបែកបាក់ និងការបំផ្លិចបំផ្លាញ ជាពិសេសគឺវាលពិឃាតរបស់ខ្មែរក្រហមនៅខែមេសាឆ្នាំ ១៩៧៥ ដល់ថ្ងៃទី ៦ ខែ មករា ឆ្នាំ ១៩៧៩ ដែលបានធ្វើឱ្យមនុស្សរាប់លាននាក់បានស្លាប់ និងធ្វើឱ្យប្រទេសទទួលរងការបំផ្លិចបំផ្លាញដែលជាបន្ទុកដ៏ធំសម្រាប់អ្នកជំនាន់ក្រោយដើម្បីដោះស្រាយ។ កម្ពុជានឹងមិនជួបនូវអតីតកាលអាក្រក់នោះទៀតទេ។ កម្ពុជាទទួលបានសន្ដិភាពពេញលេញ និងការអភិវឌ្ឍដោយចីរភាព»។
លោក ហ៊ុន សែន បានប្រកាសដែរថា នៅក្នុងឆ្នាំ ២០២០ ខាងមុខនេះកម្ពុជាក៏ធ្វើជាម្ចាស់ផ្ទះនៃកិច្ចប្រជុំអាស៊ីអឺរ៉ុបដែលក្នុងនោះក្រុមមេដឹកនាំអឺរ៉ុប រួមទាំង មេដឹកនាំក្នុងតំបន់សរុប ៥២ ប្រទេសនឹងមកកម្ពុជា៕