.jpg)
ប្រតិភូកម្ពុជាដឹកនាំដោយលោក ហ៊ុន សែន ជួបអនុប្រធានគណៈកម្មការអឺរ៉ុបពីថ្ងៃទី ១៨ តុលា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ហាក់បីដូចជាមិនមានការព្រួយបារម្ភចំពោះការព្យួរ ឬក៏ដកប្រព័ន្ធអនុគ្រោះពន្ធអ្វីគ្រប់យ៉ាងលើកលែងតែអាវុធ (EBA) របស់សហគមន៍អឺរ៉ុបឡើយ ដោយលោកថ្លែងថា EBA នឹងត្រូវបាត់បង់នៅពេលសេដ្ឋកិច្ចកម្ពុជាកើនឡើងខ្ពស់ ហើយលោកបានធ្វើការមួយជំហានមុនរួចជាស្រេចទៅហើយ ដោយបានស្នើទៅប្រទេសចំនួន ៤ ក្នុងការសុំខ្ចីប្រាក់។
លោកនាយករដ្ឋមន្ត្រីបានថ្លែងដូច្នេះកាលពីថ្ងៃសុក្រនៅទីក្រុងប្រ៊ុចសែល ប្រទេសបែលហ្ស៊ិកក្នុងកិច្ចសំណេះសំណាលជាមួយពលរដ្ឋខ្មែរមកពីប្រទេសមួយចំនួននៅអឺរ៉ុប។ លោកថ្លែងថា ប្រព័ន្ធអនុគ្រោះពន្ធសម្រាប់ទំនិញកម្ពុជាចូលទីផ្សារអឺរ៉ុបត្រូវបានគេយកទៅប្រើក្នុងសង្គ្រាមចិត្តសាស្ត្រដើម្បីវាយប្រហាររដ្ឋាភិបាល។
លោកចោទសួរថា៖ «ហេតុអីបានវៀតណាមអត់ទទួលបាន? ហេតុអីឥណ្ឌូនេស៊ីអត់ទទួល ហេតុអីថៃអត់ទទួល? ដោយសារកម្រិតកើនឡើងនៃសេដ្ឋកិច្ចរបស់គេ។ អ៊ីចឹងកម្ពុជាយើង មុន និងក្រោយអាហ្នឹងគង់តែបាត់ទេ។ សូម្បីតែអត្រាការប្រាក់ តែដល់ម៉ោងបាត់គឺបាត់ហើយ។ ឲ្យតែយើងលើកសេដ្ឋកិច្ចរបស់យើងដល់កម្រិតមួយទៅខ្ចីលុយគេ គេមិនឲ្យខ្ចីតាមអត្រាការប្រាក់ទាបទេ»។
លោកបញ្ជាក់ថា លោកបានធ្វើការមួយជំហានរួចហើយក្នុងការស្នើសុំឲ្យចិន ជប៉ុន កូរ៉េខាងត្បូង និងធនាគារពិភពលោកអនុញ្ញាតឲ្យកម្ពុជាអាចខ្ចីប្រាក់ក្នុងអត្រាការប្រាក់ទាបក្នុងរយៈពេលវែង។ លោកអះអាងថាកម្ពុជាមានលទ្ធភាពធ្វើកម្ចីបានរហូតដល់ ២៣ ភាគរយនៃផលិតផលក្នុងស្រុកសរុប។
លោកនាយករដ្ឋមន្ត្រីបានរំឭកថាការដកប្រព័ន្ធអនុគ្រោះពន្ធនេះមិនមែនជាលើកទី ១ ទេគឺថាកម្ពុជាធ្លាប់បានបាត់បង់ម្ដងរួចមកហើយនៅលើទីផ្សារអាមេរិក។
«ខ្ញុំសូមជម្រាប យើងធ្លាប់បាត់ហើយតើ ព្រោះលក្ខខណ្ឌវាតម្រូវតែប៉ុណ្ណឹង។ អាមេរិកធ្លាប់ឲ្យ GSP ភាពអនុគ្រោះឲ្យយើង។ តាំងពីឆ្នាំ ១៩៩៤ ដល់ ២០០៤ ត្រូវបាត់។ អាមេរិកធ្លាប់ឲ្យភាពអនុគ្រោះ យើងធ្លាប់នាំចេញទៅអាមេរិក ដោយមិនបង់ពន្ធ។ តែគេឲ្យតែត្រឹមរយៈពេលហ្នឹងតែ ២០០៤ ត្រូវបញ្ចប់។ ឥឡូវយើងនាំទៅអាមេរិកយើងបង់ពន្ធតើ។ យើងចោទជាសំណួរថា ចុះបើក្រុមហ៊ុននានាដែលនាំចេញទៅអាមេរិកម៉េចក៏មានប្រាក់ចំណេញ? ចុះក្រុមហ៊ុននានាដែលត្រូវនាំចេញមកអឺរ៉ុប ម៉េចក៏អត់ប្រាក់ចំណេញ? វាគ្រាន់តែចំណេញតិចតែប៉ុណ្ណឹង»។
គណៈកម្មការអឺរ៉ុបបានប្រកាសថាខ្លួនកំពុងដំណើរការដកប្រព័ន្ធអនុគ្រោះពន្ធ EBA ពីកម្ពុជាដោយផ្អែកលើមូលដ្ឋានដែលកម្ពុជាមានការរំលោភសិទ្ធិមនុស្ស និងការដើរថយក្រោយនៃលទ្ធិប្រជាធិបតេយ្យរួមទាំងការរំលាយគណបក្សប្រឆាំង។ នៅមុនពេលជួបជាមួយពលរដ្ឋខ្មែររស់នៅអឺរ៉ុប ១ ថ្ងៃលោកនាយករដ្ឋមន្ត្រីបានជួបជាមួយលោកស្រី Federica Mogherini តំណាងជាន់ខ្ពស់កិច្ចការបរទេស និងគោលនយោបាយសន្តិសុខ និងជាអនុប្រធានគណៈកម្មការអឺរ៉ុបដើម្បីពិភាក្សាលើកិច្ចសហប្រតិបត្តិការរវាងភាគីទាំង ២។
យោងតាមហ្វេសប៊ុករបស់លោកនាយករដ្ឋមន្ត្រីភាគីទាំង ២ នឹងបន្តរួមគ្នាដោះស្រាយបញ្ហាប្រឈម និងបន្តធ្វើការរួមគ្នាឲ្យទំនាក់ទំនងរវាងភាគីទាំង ២ កាន់តែប្រសើរឡើង។ ប៉ុន្តែបើតាមការលើកឡើងរបស់លោកស្រី Federica Mogherini លោកស្រីថ្លែងថាបញ្ហាសំខាន់ៗដែលត្រូវបានពិភាក្សាជាមួយលោកនាយករដ្ឋមន្ត្រី ហ៊ុន សែន គឺការធ្វើឲ្យប្រសើរឡើងស្ថានការណ៍នយោបាយ និងបរិយាកាសនៃលទ្ធិប្រជាធិបតេយ្យនៅកម្ពុជា។
លោកស្រីបានលើកឡើងថា ការព្រួយបារម្ភនៅទូទាំងទ្វីបអឺរ៉ុបគឺការរំលាយគណបក្សសង្គ្រោះជាតិដែលធ្វើឲ្យលំហប្រជាធិបតេយ្យរួមតូចសម្រាប់បក្សប្រឆាំង និងសង្គមស៊ីវិល។
ប៉ុន្តែលោកស្រីថ្លែងថាជំនួបជាមួយលោកនាយករដ្ឋមន្ត្រី មិនទទួលបានលទ្ធផលល្អទេដោយនិយាយថា៖ «យើងបានពិភាក្សាអំពីរឿងនេះ។ ខ្ញុំមិនអាចនិយាយថា យើងបានរកឃើញដំណោះស្រាយចំពោះបញ្ហាណាមួយ ក្នុងចំណោមបញ្ហាទាំងនេះទេ ប៉ុន្តែគោលការណ៍របស់សហភាពអឺរ៉ុបគឺការជួបគ្នា និងការធ្វើការសន្ទនា ជាពិសេសពេលបញ្ហាកើតឡើង»។
លោកស្រីថ្លែងថាលោកស្រីសង្ឃឹមថាការផ្លាស់ប្ដូរវិជ្ជមាននឹងកើតឡើងដោយថ្លែងថា៖ «យើងបានយល់ព្រមជាមួយគ្នាថា ក្រុមការងាររបស់យើងនឹងធ្វើការរួមគ្នាក្នុងរយៈពេលប៉ុន្មានថ្ងៃទៀត ឬ ប៉ុន្មានសប្តាហ៍ខាងមុខ ដោយពិនិត្យមើលបញ្ជីបញ្ហាជាច្រើន ដែលយើងបានលើកឡើងជាមួយគ្នា ដោយមានទាំងការសម្រេចចិត្តរបស់យើងទាក់ទិននឹងការអនុគ្រោះខាងពាណិជ្ជកម្ម»។
បើទោះបីជាលោក ហ៊ុន សែន មានជំហររឹងមាំលើករណីអឺរ៉ុបដក EBA ក៏ដោយ ក៏អ្នកវិភាគយល់ថាលោកនាយករដ្ឋមន្ត្រីអាចនឹងប្តូរជំហររបស់លោក។
លោក ឡៅ ម៉ុងហៃ អ្នកវិភាគនយោបាយថ្លែងថា៖ «វានៅតែអាចទៅរួចដែលនាយករដ្ឋមន្ត្រីអាចផ្លាស់ប្តូរចិត្តរបស់លោកក្រោយពេលពិភាក្សាជាមួយគណៈរដ្ឋមន្ត្រីរបស់លោក»៕
