ភ្នំពេញៈ លោកនាយករដ្ឋមន្ត្រី ហ៊ុន សែន សង្ឃឹមថា ប្រធានាធិបតីឥណ្ឌូនេស៊ី ដែលទើបស្បថចូលកាន់តំណែង និងប្រទេសសមាជិកអាស៊ានទាំងអស់នឹងសម្រេចឱ្យប្រទេស ទីម័រខាងកើត ចូលជាសមាជិកអាស៊ាននៅក្នុងកិច្ចប្រជុំកំពូលអាស៊ាននៅទីក្រុងបាងកក ប្រទេស ថៃ នៅចុងឆ្នាំនេះ។ នេះបើតាមហ្វេសប៊ុកលោក ហ៊ុន សែន កាលពីថ្ងៃអាទិត្យ។
លោក ហ៊ុន សែន ថ្លែងដូច្នេះ ខណៈដែលលោកចូលរួមពិធីស្បថចូលកាន់តំណែងប្រធានាធិបតីឥណ្ឌូនេស៊ីលោក ចូកូ វីដូដូ (Joko Widodo) ក្នុងអាណត្តិទី ២ កាលពីថ្ងៃអាទិត្យ។
យោងតាមហ្វេសប៊ុកដដែលលោក ហ៊ុន សែន ថ្លែងថា ប្រទេសទីម័រខាងកើត បានខិតខំគ្រប់លទ្ធភាពដើម្បីក្លាយជាសមាជិកអាស៊ានជាពិសេសប្រទេសនេះបានបើកស្ថានទូតនៅប្រទេសទាំង ១០ នៃសមាជិកអាស៊ាន។
ហ្វេសប៊ុកបញ្ជាក់ថា៖ «ឯកឧត្តម ប្រធានាធិបតីឥណ្ឌូនេស៊ីគាំទ្រការលើកឡើងរបស់សម្តេចតេជោ ហ៊ុន សែន ក្នុងការអនុញ្ញាតឱ្យទីម័រក្លាយជាសមាជិកទី ១១ របស់អាស៊ាន ហើយឥណ្ឌូនេស៊ីគាំទ្រប្រទេសទីម័រ។ ឯកឧត្តមប្រធានាធិបតីបានលើកឡើងថា ជារឿងដ៏ (សំខាន់) សម្រាប់ការអនុញ្ញាតឱ្យទីម័រក្លាយជាសមាជិកអាស៊ាន»។
លោក ផៃ ស៊ីផាន អ្នកនាំពាក្យរាជរដ្ឋាភិបាលថ្លែងពីម្សិលមិញថា លោកនាយករដ្ឋមន្ត្រីបានបង្ហាញមគ្គុទេ្ទសក៍ភាពរបស់លោកក្នុងការប្រមែប្រមូលប្រទេសទាំងអស់ឱ្យរួមគ្នានៅក្នុងអាស៊ាន។
លោកថ្លែងថា៖ «លោកបានបញ្ចប់នូវភាពរើសអើងរវាងសមាជិកអាស៊ានចាស់ និងសមាជិកអាស៊ានថ្មីក៏ដូចជាយើងបំពេញបន្ថែមតទៀត ដើម្បីពង្រីកសក្តានុពលក្នុងប្រទេសជាមិត្តជិតខាងរបស់យើង»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាថ្លែងថាតាមពិតទៅវាជាស្មារតីតំបន់ និងស្មារតីសហគមន៍ដែលលោក ហ៊ុន សែន គាំទ្រយ៉ាងពេញទំហឹងឱ្យប្រទេសទីម័រខាងកើតបានចូលជាសមាជិកអាស៊ានដែលនេះមានន័យថា គឺជាការលើកទឹកចិត្ត និងជាការជំរុញមួយ។
លោកបានថ្លែងថា៖ «បើយើងនិយាយពីការផ្លាស់ប្តូរពាណិជ្ជកម្ម ឬសារៈសំខាន់ខាងផ្នែកនយោបាយអីហ្នឹង យើងមើលទៅវាមិនជាដុំកំភួនប៉ុន្មានទេ។ ក៏ប៉ុន្តែយ៉ាងណាក៏ដោយ វាបង្ហាញពីការគាំទ្រគ្នាទៅវិញទៅមកក្នុងស្មារតីសហគមន៍ក្នុងស្មារតីសមាហរណកម្មតំបន់ដែលកម្ពុជាក៏ធ្លាប់ជាប្រទេសមួយ ដែលត្រូវបានគេលើកបញ្ហាសមាជិកភាពរបស់កម្ពុជានៅអាស៊ានហ្នឹង ១ ដងជា ២ ដង ដូចជាករណីដែលយើងត្រូវចូលជាសមាជិកអាស៊ាននៅឆ្នាំ ១៩៩៨ តែយើងអត់បានចូល។ ក្រោយមករហូតដល់ឆ្នាំ ១៩៩៩ បានយើងបានចូល»។
ទីម័រខាងកើតបានធ្លាក់នៅក្រោមអាណានិគមឥណ្ឌូនេស៊ីក្នុងឆ្នាំ ១៩៧៥។ ការត្រួតត្រាដោយឥណ្ឌូនេស៊ីលើទីម័រខាងកើតពោរពេញដោយអំពើហិង្សាដែលជាជម្លោះអស់រយៈពេលជាច្រើនទសវត្សរ៍រវាងក្រុមបំបែកខ្លួន និងយោធាឥណ្ឌូនេស៊ី។ ក្នុងឆ្នាំ ១៩៩៩ ក្រោយពីមានច្បាប់ស្តីពីស្វ័យគ្រប់គ្រងដែលគាំទ្រដោយអង្គការសហប្រជាជាតិ (អសប) ប្រទេស ឥណ្ឌូនេស៊ី បានបោះបង់ការគ្រប់គ្រងលើទឹកដីនេះ។ ទីម័រខាងកើតបានក្លាយជារដ្ឋអធិបតេយ្យថ្មីក្នុងឆ្នាំ ២០០២ ហើយត្រូវបានទទួលស្គាល់ដោយ អសប និងសហគមន៍បណ្តាប្រទេសភាសាព័រទុយហ្គាល់៕