ភ្នំពេញៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានសម្ដែងការហួសចិត្តទៅលើការលើកឡើងរបស់លោក សម រង្ស៊ី ដែលនិយាយកាលពីថ្ងៃទី ៧ វិច្ឆិកា ថា លោកជាអ្នកលួចដូរសំបុត្រយន្តហោះ Thai Airways ដែលធ្វើឲ្យលោក រង្ស៊ី មិនអាចហោះមកកាន់ប្រទេស ថៃ ដើម្បីចូលមកកម្ពុជានៅថ្ងៃទី ៩ វិច្ឆិកា។
ការលើកឡើងរបស់លោកនាយករដ្ឋមន្ត្រីធ្វើឡើងនៅពេលលោកធ្វើជាអធិបតីពិធីចែកសញ្ញាបត្រដល់និស្សិតសាកលវិទ្យាល័យធនធានមនុស្សជិត ២ ពាន់នាក់ នៅវិទ្យាស្ថានជាតិអប់រំ។ ជាការលើកឡើងជាលក្ខណៈឌឺដងដល់លោក សម រង្ស៊ី លោក ហ៊ុន សែន បាននិយាយថា ពិភពលោកត្រូវតែមានការប្រុងប្រយ័ត្នចំពោះលោក ហ៊ុន សែន ពីព្រោះលោកមានសមត្ថភាពលួចចូលទៅកែសំបុត្រយន្តហោះ។
លោកថ្លែងដូច្នេះថា៖ «ជាង ១០ ថ្ងៃមុនថ្ងៃទី ៧ គេថា រកឃើញហើយមុខចោរចូលទៅកែសំបុត្រយន្តហោះ អ៊ីចឹងពិភពលោកត្រូវតែមានការប្រុងប្រយ័ត្នចំពោះបច្ចេកទេសរបស់ ហ៊ុន សែន ឬក្រុមបច្ចេកទេសរបស់ ហ៊ុន សែន អាចហែកចូលទៅក្នុងកុំព្យូទ័ររបស់ស្អី Thai Airways។ បើហែកចូលទៅក្នុងកុំព្យូទ័ររបស់ថៃអ៊ែរវេបានហើយនឹងអាចហែកចូលទៅគ្រប់កន្លែងទាំងអស់»។
លោកថ្លែងបន្តថា៖ «យី! ឲ្យតម្លៃ ហ៊ុន សែន ខ្ពស់ពេកទេដឹង? រឿងខ្លួនឯងសោះ មកទម្លាក់លើ ហ៊ុន សែន ទៀត។ មើល៍យើងគួរៗគិតជាមួយគ្នាហើយអាកន្លែងនេះ។ អានេះកម្រិតខ្នាតអន្តរជាតិគេហ៊ានធ្វើដល់ម្លឹង ចោទមកដល់ ហ៊ុន សែន ចុះទម្រាំអារឿងធម្មតាទៅវិញទៀត តើចោទ ហ៊ុន សែន ប៉ុនណាទៅទៀត។ នេះគឺជារឿងមួយដែលអកុសលមែនទែន ហើយភូតហ្នឹងគួរតែភូតឲ្យសមរម្យ»។
កាលពីថ្ងៃទី ៧ ខែវិច្ឆិកា លោក សម រង្ស៊ី គ្រោងឡើងយន្តហោះតាមក្រុមហ៊ុន Thai Airways ចេញពីទីក្រុងប៉ារីសឆ្ពោះទៅទីក្រុងបាងកក បន្ទាប់មកធ្វើដំណើរមកកាន់ច្រកប៉ោយប៉ែត ដើម្បីចូលមកប្រទេស កម្ពុជា។ ប៉ុន្តែលោកបានប្រកាសថា ក្រុមហ៊ុនហោះហើរបានប្រាប់លោកថា លោកមិនអាចហោះហើរបានទេដោយសារមានបញ្ជាពីថ្នាក់លើ។
ជាមួយគ្នានោះ លោក សម រង្ស៊ី បានបង្ហោះហ្វេសប៊ុកដោយមានភ្ជាប់នូវសំបុត្រយន្តហោះចំនួន ២ ដោយលោកសរសេរថា៖ «រកមុខឃើញហើយ ហ៊ុន សែន នៅពីក្រោយអ្នកដែលបានទៅប្រាប់ក្រុមហ៊ុនអាកាសចរណ៍ថៃ Thai Airways ឲ្យប្តូរសំបុត្រយន្តហោះរបស់ សម រង្ស៊ី ចេញពីទីក្រុងប៉ារីសពីថ្ងៃ ៧ វិច្ឆិកា ទៅថ្ងៃ ៩ វិច្ឆិកា វិញ»។
ទោះយ៉ាងណាលោក រង្ស៊ី ថ្លែងថាមូលហេតុពិតប្រាកដដែលលោកមិនបានឡើងយន្តហោះថ្ងៃ ៧ វិច្ឆិកានោះ មិនមែនដោយសារលោក ហ៊ុន សែន បានលួចដូរសំបុត្រយន្តហោះគឺដោយសារក្រុមហ៊ុន Thai Airways បានទទួលពីរដ្ឋាភិបាលថៃ មិនឲ្យ សម រង្ស៊ី ឡើងយន្តហោះ។
លោក ហ៊ុន សែន ថ្លែងថា លោកប្រុងនឹងសួរទៅកាន់ក្រុមហ៊ុនអាកាសចរណ៍ថា តើលោក សម រង្ស៊ី ពិតជាបានកក់ ឬទិញសំបុត្រយន្តហោះពិតប្រាកដមែនឬអត់? ពីព្រោះលោកបានឮក្រុមហ៊ុនប្រកាសថាលោក សម រង្ស៊ី មិនបានកក់សំបុត្រយន្តហោះទេ។
លោក ហ៊ុន សែន ថ្លែងថា៖ «គេ (ក្រុមហ៊ុន) ប្រកាសថាអត់មានសំបុត្រ ប៉ុន្តែគេ (រង្ស៊ី) ប្រកាសមកខាងនេះថា រកឃើញមុខចោរហើយ គឺ ហ៊ុន សែន ហែកចូល អ៊ីចឹងប្រយ័ត្នមែនទែន ហើយអ្នកទាំងអស់គ្នាដែលមានទូរស័ព្ទខ្ញុំចូលហែកទាំងអស់។ ព្រះអើយព្រះ! យើងពិនិត្យមើល ក្របខ័ណ្ឌជាអន្តរជាតិ ហើយភាពម៉ឺងម៉ាត់ជាបច្ចេកវិទ្យាថ្នាក់ដល់យើងនៅភ្នំពេញ ឬថាខ្ញុំនៅភ្នំពេញ ឬថាអ្នកណាក៏ដោយទោះបីនៅប៉ារីសក៏ដោយ វាមិនអាចចូលទៅកែសំបុត្រយន្តហោះបានទេ»។
លោកបន្តថាលោក សម រង្ស៊ី តែងតែលើកឡើងរឿងបោះឆ្នោតថា មានការបន្លំ ហើយដល់ពេលនេះលើកឡើងថា លោកជាអ្នកទៅបន្លំសំបុត្រយន្តហោះទៀត។
លោក គិន ភា ប្រធានវិទ្យាស្ថានទំនាក់ទំនងអន្តរជាតិយល់ឃើញថា ការលើកឡើងរបស់លោក សម រង្ស៊ី រឿងប្ដូរសំបុត្រយន្តហោះនោះអាចជាល្បិចរបស់លោក សម រង្ស៊ី ក្នុងការធ្វើឲ្យមានលេសក្នុងការមិនវិលមកកម្ពុជា ហើយដោយសារលោកមិនរំពឹងថា អាចចូលមកប្រទេសថៃបានទេក្រោយពេលនាយករដ្ឋមន្ត្រីថៃប្រកាសមិនឲ្យលោកឆ្លងកាត់ប្រទេសថៃ។
លោកថ្លែងថា៖ «ដើម្បីអ្នកគាំទ្ររបស់គាត់ គាត់ត្រូវរកវិធី ឬលេសមួយដើម្បីការពារការខកខានមិនបានមក។ មិនមានអ្នកណាទៅលួចដូរទេ បើមានគេលួចដូរ មានតែកូនចៅគាត់ទៅទិញខ្លួនឯង ហើយដូរខ្លួនឯង ឬមិនមានករណីនេះទាល់តែសោះ តែគាត់មិនបានទិញ ហើយគាត់ទៅ check-in តែមិនមានឈ្មោះ»៕