.jpg)
លោកនាយករដ្ឋមន្ត្រី ហ៊ុន សែន នៅក្នុងពិធីបើកការដ្ឋានសាងសង់ផ្លូវក្រវាត់ក្រុងកាលពីម្សិលមិញ។ ហ្វេសប៊ុក SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រាប់អ្នកដែលគំរាម ឬកំពុងដំណើរការដាក់ទណ្ឌកម្មសេដ្ឋកិច្ចលើកម្ពុជាថា ការដាក់ទណ្ឌកម្មបែបនេះ មានតម្លៃស្មើនឹងការសម្លាប់បក្សប្រឆាំងនៅកម្ពុជា។
លោកនាយករដ្ឋមន្ត្រីបានថ្លែងដូច្នេះ កាលពីថ្ងៃចន្ទម្សិលមិញ ក្នុងពិធីសម្ពោធបើកការដ្ឋានសាងសង់ផ្លូវក្រវាត់ក្រុង ប្រវែងជិត ៥៣ គីឡូម៉ែត្រ ដែលនឹងត្រូវចំណាយប្រាក់ ២៧៣ លានដុល្លារ ជាជំនួយបរិយាប័ន្នរបស់ចិន និងបដិភាគរបស់រដ្ឋាភិបាលកម្ពុជា។
លោកហ៊ុន សែន ថ្លែងថា៖ «សូមកុំភ្លេចថា អ្នកមិនចាំបាច់មកប្រដៅខ្ញុំទៀតទេ។ ដោយសារអ្នកបានជាជ្រុលដាក់ទណ្ឌកម្មខ្ញុំហើយ អ្នកក៏គ្មានសិទ្ធិនិយាយប្រដៅខ្ញុំរឿងសិទ្ធិមនុស្ស ប្រជាធិបតេយ្យអីដែរ ហើយខ្ញុំចង្អុលបង្ហាញថា បើសិនអ្នកឯងដាក់ទណ្ឌកម្មខ្ញុំ ស្មើនឹងវាយសម្លាប់បក្សប្រឆាំងនៅកម្ពុជា ខ្ញុំនិយាយប្រាប់អ្នកឯងឲ្យច្បាស់។ ព្រោះគ្មានរឿងអី ដែលខ្ញុំត្រូវថ្នាក់ថ្នម ព្រោះវាបានជាជ្រុលអ៊ីចឹងហើយឲ្យវាទៅបណ្ដោយទៅ»។
លោកបានបន្តថា៖ «ជាន់កអាហ្អែងថែម អាហ្នឹងវារឿងតែប៉ុណ្ណឹង។ អាហ្អែងខូច អញកាត់ទោសអាហ្អែង អានេះជាផ្លូវច្បាប់។ តែអាហ្អែងទៅអំពាវនាវឲ្យគេបំផ្លាញកម្ពុជា។ អ៊ីចឹងមានអីត្រូវទុកឲ្យអាហ្អែងរស់តទៅទៀត! ឲ្យច្បាស់! សុំកុំប្រមាថ ហើយសុំកុំព្រមានចំពោះកម្ពុជា។ ខ្ញុំបានប្រកាសហើយមិនអាចយកឯករាជ្យ អធិបតេយ្យភាព របស់ប្រទេសទៅដោះដូរជាមួយជំនួយអ្នកណាទេ»។
ការថ្លែងរបស់លោកនាយករដ្ឋមន្ត្រី បានធ្វើឡើងស្របពេលដែលសហភាពអឺរ៉ុប កំពុងស្ថិតនៅក្នុងនីតិវិធីដកប្រព័ន្ធអនុគ្រោះពន្ធពី (EBA) ពីកម្ពុជា ដោយហេតុផលថា កម្ពុជាបានធ្វើឲ្យខូចលទ្ធិប្រជាធិបតេយ្យ តាមរយៈការចាប់ខ្លួនលោក កឹម សុខា ការរំលាយគណបក្សសង្គ្រោះជាតិ និងការដកសិទ្ធិធ្វើនយោបាយ មន្ត្រីអតីតគណបក្សសង្គ្រោះជាតិចំនួន ១១៨ រូប និងការដកតំណែងមន្ត្រីឃុំសង្កាត់ ជាប់ឆ្នោតរបស់អតីតគណបក្សប្រឆាំងកាលពីឆ្នាំ ២០១៧។
ព្រឹទ្ធសភាសហរដ្ឋអាមេរិក កាលពីសប្តាហ៍មុន ក៏បានស្នើទៅសភាអាមេរិកឲ្យពិនិត្យ ការផ្ដល់ការអនុគ្រោះពន្ធដល់កម្ពុជាផងដែរ។
លោក ហ៊ុន សែន បានថ្លែងថា ការគំរាមដកប្រព័ន្ធអនុគ្រោះពន្ធនេះ ពិភពលោកគេឈប់ប្រើហើយ ហើយលោកមានបទពិសោធគ្រប់គ្រាន់ក្រោយ ឆ្លងកាត់ការហ៊ុមព័ទ្ធសេដ្ឋកិច្ច និងនយោបាយ បន្ទាប់ពីរបបខ្មែរក្រហមដួលរលំ។ លោកថ្លែងថា កម្ពុជាចង់ពង្រីកមិត្តភក្តិនៅលើពិភពលោក ប៉ុន្តែមិត្តរបស់កម្ពុជា មិនត្រូវយកប្រជាជនកម្ពុជា ១៦ លាននាក់ទៅបម្រើឲ្យគោលដៅរបស់ខ្លួនក្នុងការបំផ្លិចបំផ្លាញកម្ពុជានោះទេ។
ដោយមិនបានលើកចំឈ្មោះ លោកព្រមានសំដៅសហភាពអឺរ៉ុបដោយថ្លែងថា៖ «ប៉ុន្តែបើអ្នកឯងហ៊ានធ្វើ តម្លៃដែលត្រូវសងពួកអ្នកឯង រង់ចាំមើលទៅ អ្នកឯងសប្បាយទៅ។ សួរថា រដ្ឋបាល ហ៊ុន សែន នឹងចាត់វិធានការចំពោះពួកអាក្រក់របៀបណា។ ឲ្យច្បាស់លាស់ជាមួយគ្នា អ្នកឯងគ្មានសិទ្ធិមកនិយាយជាមួយខ្ញុំតទៅទៀតទេ។ អ៊ីចឹង ពួកអ្នកមានទោសទាំងប៉ុន្មានត្រូវបន្តទោស។ អាគួរតែឲ្យរួច មិនឲ្យអាហ្អែងរួចខ្លួន ប្រមូលយកកាត់ទោសហើយ។ ព្រោះបានជាជ្រុលអ៊ីចឹងទៅហើយ។ ពួកអាហ្អែង អ្នកធ្វើអាក្រក់ អញអនុវត្តច្បាប់ អាហ្អែងទៅប្ដឹងចៅហ្វាយអាហ្អែងឲ្យធ្វើបាបអញ។ អ៊ីចឹងអញដាក់ជាន់កអាហ្អែងថែម»។
លោកថា បើសិនចង់ដាក់ទណ្ឌកម្មលើកម្ពុជាឬយ៉ាងណានោះ វាជាការសម្រេចចិត្តរបស់ពួកគេ ព្រោះលោកឈប់ចង់ឮពាក្យគំរាមកំហែងតទៅទៀតហើយ។ ទោះយ៉ាងណា លោកថា នៅកម្ពុជានៅតែមានបក្សប្រឆាំងផ្សេងទៀតដោយលោកលើកឧទាហរណ៍ការបោះឆ្នោតកន្លងទៅដែលមានការចូលរួមពីគណបក្សចំនួន ២០។
លោកបានលើកជម្រើស ២ សម្រាប់សហភាពអឺរ៉ុបយកទៅពិចារណាគឺថា តើត្រូវរក្សាសមិទ្ធផលដែលសម្រេចឡើងរួមមានទាំងលម្ហលទ្ធិប្រជាធិបតេយ្យ ឬមួយត្រូវសម្លាប់ចោលត្រឹមកន្លែងនេះ។ លោក ហ៊ុន សែន ថ្លែងថា លោករង់ចាំមើលជំហានបន្ទាប់ពីភាគីម្ខាងទៀត។
លោកបញ្ជាក់ជាចុងក្រោយថា៖ «បើចង់ឲ្យពួកប្រឆាំងងាប់ អាហ្នឹងកាត់ទៅ។ បើចង់ឲ្យពួកប្រឆាំងរស់អាហ្នឹងកុំធ្វើ មកជជែកគ្នាពិភាក្សាគ្នា។ កែលម្អសភាពការណ៍ជាមួយគ្នាបន្តទៅមុខជាមួយគ្នា ក្នុងភាពជាដៃគូស្មើភាព លើការគោរពឯករាជ្យ និងអធិបតេយ្យ»។
ដើម្បីត្រៀមខ្លួននឹងការដកប្រព័ន្ធអនុគ្រោះពន្ធនេះ លោកហ៊ុន សែន បានដាក់ចេញនូវយុទ្ធនាការពង្រឹងឯករាជភាពរបស់កម្ពុជាដោយគោលការណ៍កំណែទម្រង់ខាងក្នុង គឺការពង្រឹងសេដ្ឋកិច្ច លើពហុវិស័យ រាប់ចាប់ពីកសិកម្ម ឧស្សាហកម្ម និងសេវាកម្ម កាត់បន្ថយការនាំចូល និងបង្កើនការនាំចេញ។
ឆ្លើយតបនឹងការលើកឡើងរបស់លោក ហ៊ុន សែន លោក សម រង្ស៊ី ប្រធានស្តីទីនៃអតីតគណបក្សប្រឆាំង បានថ្លែងប្រាប់ភ្នំពេញប៉ុស្តិ៍ តាមអ៊ីមែលថា ការដាក់ទណ្ឌកម្មកម្ពុជា គឺដោយសារតែកម្ពុជាបានងាកទៅរកភាពផ្ដាច់ការរបស់លោកនាយករដ្ឋមន្ត្រី។
លោកថា ប្រសិនបើលោក ហ៊ុន សែន កែប្រែស្ថានភាពបច្ចុប្បន្ន ឲ្យប្រសើរវិញនោះ លោកធ្វើរឿងល្អ ២ យ៉ាងគឺ៖ «រារាំងមិនឲ្យមានទណ្ឌកម្ម និងអនុញ្ញាតឲ្យមានសេរីភាពប្រសើរឡើងវិញ មានលម្ហប្រជាធិបតេយ្យសម្រាប់ប្រជាជនខ្មែរ»។
លោក រង្ស៊ី អះអាងថា លោកនាយករដ្ឋមន្ត្រី មិនអាចធ្វើបានទេ ដោយសារតែលោកចង់កាន់អំណាចបន្តទៀត និងដើម្បីការពារផលប្រយោជន៍របស់គាត់ និងក្រុមគ្រួសារ។
លោក George Edgar ឯកអគ្គរដ្ឋទូតសហភាពអឺរ៉ុប ប្រចាំកម្ពុជា ថ្លែងតាមរយៈអ៊ីមែលពីម្សិលមិញថា មកដល់ពេលនេះ ដំណើរការដកប្រព័ន្ធអនុគ្រោះពន្ធជាផ្លូវការមិនទាន់ចាប់ផ្ដើមនៅឡើយ។ លោកថាដំណើរការសម្រេចចិត្តដកឬមិនដក ឬក៏ដកដោយផ្នែកមានរយៈពេល ១២ ខែ។ ក្នុងករណីដែលមានការដកមែននោះ ការយកពន្ធលើទំនិញនាំចូលអឺរ៉ុបពីកម្ពុជា នឹងចាប់ផ្ដើម ៦ ខែនៅក្រោយសេចក្តីសម្រេច ដែលធ្វើឲ្យរយៈពេលសរុបមាន ១៨ ខែ។
លោកថ្លែងថា ប្រសិនបើកម្ពុជាមានវិធានការធ្វើឲ្យស្ថានភាពបច្ចុប្បន្នប្រសើរឡើង សហភាពអឺរ៉ុបនឹងពិចារណាលើបញ្ហាដក EBA ឡើងវិញ។
ចំពោះការលើកឡើងរបស់លោកនាយករដ្ឋមន្ត្រី ដែលថា សហភាពអឺរ៉ុបជាចៅហ្វាយរបស់បក្សប្រឆាំងនោះ លោក George Edgar និយាយថា៖ «សហភាពអឺរ៉ុប មិនដែលផ្ដល់មូលនិធិ ដល់គណបក្សសង្គ្រោះជាតិ ឬគណបក្សនយោបាយណាមួយនៅកម្ពុជាទេ»។
អ្នកវិភាគនយោបាយលោក ឡៅ ម៉ុងហៃ ថ្លែងថា សាររបស់លោកនាយករដ្ឋមន្ត្រី បានបង្ហាញថា គាត់មានការព្រួយបារម្ភអំពីការដកពន្ធអនុគ្រោះ EBA នេះ ហើយគាត់បានយកបក្សប្រឆាំងជាចំណាប់ខ្មាំង ដើម្បីកុំឲ្យសហភាពអឺរ៉ុបផ្អាក EBA។ «ជាក់ស្តែង ដើម្បីលាក់បាំងស្ថានភាពអស់សង្ឃឹមរបស់គាត់ គាត់បានបង្ហាញឥរិយាបថជាភាគីដ៏ខ្លាំងមួយដោយអញ្ជើញសហគមន៍អឺរ៉ុបមកចរចាជាមួយគាត់ ដើម្បីបន្ត EBA ប៉ុន្តែមើលទៅ សហគមន៍អឺរ៉ុបហាក់អស់សង្ឃឹមក្នុងការធ្វើដូច្នេះ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ថា ការថ្លែងរបស់លោកនាយករដ្ឋមន្ត្រី បង្ហាញសារច្រកទ្វារទាំងទៅសហភាពអឺរ៉ុបផង និងទៅបក្សប្រឆាំងផង។
លោកថា កម្ពុជាចង់មានការចរចាជាមួយសហភាពអឺរ៉ុប ដោយស្មើភាពគ្នា បើទោះបីជាលោកហ៊ុន សែន ប្រើសម្ដីធ្ងន់បន្តិចក៏ដោយ។ លោកថា សារមួយទៀតគឺជាការព្រមានដល់បក្សប្រឆាំងថា ប្រសិនបើនៅតែបន្តរកសម្ពាធអន្តរជាតិនោះលទ្ធផលបានត្រឹមតែរំលាយបក្សប្រឆាំងខ្លួនឯងប៉ុណ្ណោះ។
លោកថា៖ «នេះជាសារដ៏ច្បាស់លាស់មួយ ក្នុងនាមប្រទេសមានអធិបតេយ្យ ទាំងចំពោះបក្សប្រឆាំង ទាំងចំពោះសហគមន៍អន្តរជាតិ ជាពិសេស សហភាពអឺរ៉ុប ឲ្យមាននយោបាយសមស្របណាមួយ។ ថ្វីបើលោកនិយាយខ្លាំងបន្តិចប៉ុន្តែខ្លាំងបង្ហាញសាច់ដុំ ដើម្បីឲ្យមានឥទ្ធិពលក្នុងការចរចា។ នេះជាទម្លាប់នៃនយោបាយរបស់គាត់»៕
