.jpg)
លោក ខៀវ កាញារីទ្ធ និងលោក ហ៊ុយ វណ្ណៈ។ រូបថត ស.ស.ស.ក
ភ្នំពេញៈ លោក ហ៊ុយ វណ្ណៈ ត្រូវបានអង្គសមាជបោះឆ្នោតដោយឯកច្ឆន្ចកាលពីថ្ងៃសៅរ៍កន្លងមកនេះឲ្យធ្វើជាប្រធានសហភាពសហព័ន្ធអ្នកកាសែតកម្ពុជា (ស.ស.ស.ក) សម្រាប់អាណត្តិទី ២ ដែលមានរយៈពេល ៣ ឆ្នាំពីឆ្នាំ ២០១៩-២០២២ ដើម្បីបន្តជំរុញការលើកកម្ពស់វិស័យសារព័ត៌មានក្នុងការផ្សព្វផ្សាយដោយមានក្រមសីលធម៌ក្នុងបុព្វហេតុអភិវឌ្ឍន៍គុណភាពព័ត៌មាននៅកម្ពុជា។
លោកក៏បានថ្លែងនៅក្នុងសន្និសីទកាសែតក្រោយបញ្ចប់សមាជដោយបានអំពាវនាវដល់ប្រធានក្លិបអ្នកកាសែត និងសមាគមដទៃទៀតចាប់ដៃគ្នាសហការរួមគ្នាធ្វើសេចក្ដីថ្លែងការណ៍រួម ឬធ្វើរបាយការណ៍រួមដើម្បីវាយតម្លៃអំពីសេរីភាពសារព័ត៌មាន និងគុណភាពសារព័ត៌មាននៅកម្ពុជាដោយខ្លួនឯង ដោយកុំទុកឲ្យបរទេសធ្វើអាណានិគមមកលើប្រជាជាតិតាមរយៈសមរភូមិសាធារណមតិ។
លោក ហ៊ុយ វណ្ណៈ ថ្លែងនៅក្នុងសន្និសីទកាសែតថា៖ «យើងទទួលស្គាល់ថា អ្នកសារព័ត៌មាននៅកម្ពុជាយើងមួយចំនួនមានការចេះដឹងច្រើន ប៉ុន្ដែបើនិយាយជាភាគរយគឺយើងនៅមានគម្លាតធំទៀតដែលត្រូវការអភិវឌ្ឍសមត្ថភាពអ្នកសារព័ត៌មានលើការយល់ដឹងគ្រប់វិស័យ ទាំងផ្នែកអភិបាលកិច្ច សេដ្ឋកិច្ច បច្ចេកវិទ្យា ការវិភាគ និន្នាការពិភពលោក និងតំបន់ជាដើម»។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានថ្លែងក្នុងការបិទសមាជលើកទី ២ របស់ ស.ស.ស.ក កាលពីថ្ងៃសៅរ៍សប្ដាហ៍មុនដោយបានជំរុញឲ្យអ្នកសារព័ត៌មានកម្ពុជាត្រូវប្រឹងប្រែងបន្ថែមទៀតពង្រឹងសមត្ថភាពលើចំណុចខ្វះខាតមួយចំនួនខាងផ្នែកច្បាប់ ដូចជាច្បាប់ស្ដីពីសិទ្ធិឯកជនច្បាប់ស្ដីពីការលែងលះគ្នា ច្បាប់ដីធ្លី ច្បាប់ស្ដីពីការទទួលមរតក បច្ចេកវិទ្យា និងអ្នកសារព័ត៌មានវិភាគ។
លោក កាញារីទ្ធ ថ្លែងថា៖ «ច្បាប់ទាំងនេះអ្នកកាសែតមួយចំនួនមានការយល់ដឹងតិច ខណៈដែលច្បាប់នេះមានសារៈសំខាន់ណាស់ចំពោះការងារអ្នកសារព័ត៌មានដែលត្រូវតែយល់ដឹង ព្រោះអ្នកសារព័ត៌មានយើងខ្វះចំណេះដឹង និងការយល់ដឹងផ្នែកច្បាប់»។
លោករដ្ឋមន្ដ្រីបានឲ្យដឹងទៀតថា អ្នកសារព័ត៌មានកម្ពុជាក៏នៅខ្វះការយល់ដឹងផ្នែកបច្ចេកវិទ្យាដោយអ្នកសារព័ត៌មានមួយចំនួនចេះប្រើត្រឹមកុំព្យូទ័រ និងអ៊ីនធឺណិត។
លោក កាញារីទ្ធ ថ្លែងថា៖ «បច្ចេកវិទ្យាមិនមែននៅតែត្រឹមអ៊ីនធឺណិតនេះទេ គឺត្រូវមានការយល់ដឹងច្រើនជាងនេះ ព្រោះការផ្សាយព័ត៌មានទាមទារការយល់ដឹងផ្នែកបច្ចេកវិទ្យានេះ ហើយត្រូវយល់ដឹងមុនថែមទៀត»។
លោកបានឲ្យដឹងទៀតថា៖ «យើងសង្ឃឹមថា យើងនឹងប្រឹងប្រែងរួមគ្នា ដើម្បីជួយធ្វើយ៉ាងណាឲ្យវិស័យសារព័ត៌មានយើងកាន់តែមានមុខមាត់ថែមទៀត។ ដើម្បីលើកកិត្ដិយសកម្ពុជាដំបូងបំផុតគឺត្រូវលើកកិត្ដិយសអ្នកកាសែតសិន។ នៅពេលអ្នកកាសែតមានកិត្ដិយសថ្លៃថ្នូរអត្ថបទយើងថ្លៃថ្នូរនោះកម្ពុជានឹងថ្លៃថ្នូរហើយ»។
លោករដ្ឋមន្ដ្រីក៏បានអះអាងផងដែរថា កម្ពុជាមិនអាចចៀសផុតពីអ្នកកាសែតសរសេររញ៉េរញ៉ៃនោះទេ ព្រោះអ្នកកាសែតកម្ពុជាមិនមានការប្រឡងមានវិជ្ជាជីវៈសេរី ប៉ុន្ដែបើសិនជាអ្នកកាសែតវិជ្ជាជីវៈមានចំណេះដឹងអាស្រ័យដោយការអប់រំរបស់សមាគម ឬក្លិបអ្នកកាសែតនឹងមានភាពថ្លៃថ្នូរ ហើយសារព័ត៌មានដែលរញ៉េរញ៉ៃនឹងធ្លាក់ចុះដោយខ្លួនឯង។
លោករដ្ឋមន្ត្រីក៏បានឲ្យដឹងផងដែរថា យ៉ាងណាស់ក៏មានសមាគម និងក្លិបអ្នកកាសែតប្រមាណ ៣០ ស្ថាប័នមានសមាគមខ្លះក៏ដំណើរការ និងសមាគមខ្លះមិនដំណើរការ។
យោងតាមសេចក្ដីប្រកាសព័ត៌មានរបស់ ស.ស.ស.ក ដែលចេញផ្សាយកាលពីថ្ងៃទី ១២ ខែតុលា ឆ្នាំ ២០១៩ បានឲ្យដឹងថា សសសក បានបង្កើតឡើងក្នុងឆ្នាំ ២០១៦ ដោយមានអាណត្តិ ៣ ឆ្នាំ។ ស.ស.ស.ក ទទួលបានការចូលរួម និងគាំទ្រហិរញ្ញវត្ថុពីសប្បុរសជនផ្នែកវិស័យឯកជន និងគាំទ្រដោយ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំជាន់ខ្ពស់ជាច្រើនរូប។
ស.ស.ស.ក បានសម្រេចដាក់ចេញផែនការសកម្មភាពដើម្បីសម្រេចគោលបំណងដ៏ពិសិដ្ឋរបស់ខ្លួនគឺ ពង្រឹងគុណភាពព័ត៌មាននៅកម្ពុជា និងចូលរួមចំណែកផ្សព្វផ្សាយក្នុងបុព្វហេតុការពារផលប្រយោជន៍ និងកិត្តិយសកម្ពុជាទាំងនៅឆាកជាតិ និងអន្តរជាតិ។ សសសក បានដើរតួនាទី ដូចជាគាំពារសិទ្ធិ អប់រំបណ្ដុះបណ្ដាលធ្វើសកម្មភាពមនុស្សធម៌ដល់អ្នកសារព័ត៌មានកម្ពុជា៕
