ភ្នំពេញៈ លោកនាយករដ្ឋមន្ដ្រី ហ៊ុន សែន ថ្លែងកាលពីម្សិលមិញក្នុងពិធីប្រគល់សញ្ញាបត្រដល់គរុសិស្ស-និស្សិតនៅវិទ្យាស្ថានជាតិអប់រំថា រាជរដ្ឋាភិបាលបានចាត់ទុកវិស័យអប់រំគឺជាវិស័យអាទិភាពទី ១ និងកំពុងបន្តខិតខំបន្ថែមទៀតលើការបណ្ដុះបណ្ដាលគ្រូបង្រៀនដើម្បីឲ្យផលិតភាពធនធានមនុស្សមានភាពប្រសើរឡើង។
លោក ហ៊ុន សែន បានថ្លែងថា៖ «ខ្ញុំសូមយកឱកាសនេះដើម្បីអបអរសាទរជាមួយនឹងវឌ្ឍនភាពរបស់យើងទាក់ទងនឹងការរីកចម្រើននៅក្នុងវិស័យអប់រំ ដែលនេះជាវិស័យស្នូលជាវិស័យអាទិភាព ដែលរាជរដ្ឋាភិបាលបានដាក់ចេញជាមុំទី ១ រយៈពេល ២ អាណត្ដិហើយ។ អាណត្ដិទី ៥ ឆ្នាំ ២០១៣-២០១៨ យើងបានប្ដូរមុំពីទឹក ផ្លូវ ភ្លើង មនុស្ស ទៅជា មនុស្ស ទឹក ផ្លូវ ភ្លើងវិញ។
ខ្ញុំគិតថា វានៅតែបន្តឲ្យយើងខិតខំបន្តទៀត ដើម្បីវិនិយោគក្នុងវិស័យអប់រំដែលក្នុងនោះទាំងវិនិយោគលើការសាងសង់ទាំងវិនិយោគ ដើម្បីបង្កើនជីវភាពសម្រាប់គ្រូបង្រៀន ទាំងការវិនិយោគសម្រាប់ការស្នាក់នៅ និងការធ្វើដំណើររបស់គ្រូបង្រៀនរបស់យើងនៅតាមតំបន់ផងដែរ ដែលនេះគឺជាបញ្ហាសំខាន់របស់យើងសម្រាប់ដោះស្រាយបញ្ហាអនាគតដែលទាមទារឲ្យយើងលើកកម្ពស់សមត្ថភាពរបស់ប្រជាពលរដ្ឋរបស់យើង»។
លោកនាយករដ្ឋមន្ដ្រីបានរំឭកថា កាលពីប៉ុន្មានថ្ងៃមុននៅក្នុងពិធីបើកការដ្ឋានសាងសង់ផ្លូវជាតិលេខ ២ និងលេខ ២២ លោកក៏បានរំឭកទាក់ទងនឹងបញ្ហាអាទិភាព ៤ យ៉ាងដែលត្រូវបានប្រកាសចេញតាំងពីឆ្នាំ ១៩៨៧ គឺមុនពេលដែលកិច្ចចរចា សីហនុ ហ៊ុនសែន ចាប់ផ្ដើមស្វែងរកដំណោះស្រាយនយោបាយទៀតឯណោះ។
លោកថ្លែងថា៖ «តាមខ្ញុំចាំគឺពេលនោះប្រកាសចេញនៅក្នុងខែសីហា ឆ្នាំ ១៩៨៧ គឺ ៣៣ ឆ្នាំរួចមកហើយ។ នយោបាយផ្ដល់អាទិភាពទៅលើវិស័យទាំង ៤ សម្រាប់ការវិនិយោគនេះបានផ្ដល់ឲ្យយើងដើរមកដល់ជំហាននេះ គ្រាន់តែឥឡូវនេះយើងដាក់មុំទាក់ទិនជាមួយនឹងការបណ្ដុះបណ្ដាលធនធានមនុស្សនេះឲ្យទៅជាអាទិភាពទី ១ ក្នុងចំណោមអាទិភាពទាំង ៤»។
លោកថ្លែងថា ពិតមែនហើយបើក្រឡេកមើលក្រោយត្រឡប់ទៅវិញ កម្ពុជាបានដើរក្នុងជំហានមួយមានល្បឿនលឿនគួរសម។ ប៉ុន្ដែបើសម្រាប់អ្នកដែលមិនធ្លាប់ឃើញកម្ពុជាហើយដែលពិនិត្យអំពីអតីតកាលរបស់កម្ពុជានៅពេលដែលឃើញកម្ពុជា គេក៏មានការភ្ញាក់ផ្អើលដែរព្រោះគេធ្លាប់តែឃើញ គេដឹងតែតាមខ្សែភាពយន្តឯកសារដែលទាក់ទងជាមួយវិនាសកម្មក្នុងជំនាន់ ប៉ុលពត ហើយរូបភាពដែលនៅសេសសល់នោះគេមិននឹកស្មានថា ប្រទេសកម្ពុជាមានការរីកចម្រើនបែបនេះទេ។
លោក ហ៊ុន សែន ថ្លែងថា៖ «ដូច្នេះបានជាយើងត្រូវប្រឹងបន្តទៅទៀត ដើម្បីឆ្លើយតបនឹងបញ្ហាទាំងអស់ដែលនៅពីមុខយើង។ សម័យនេះគឺជាសម័យសេដ្ឋកិច្ចបច្ចេកវិទ្យា សេដ្ឋកិច្ចឌីជីថលគឺទាមទារឲ្យយើងខិតខំកាន់តែច្រើនដើម្បីបណ្ដុះបណ្ដាលធនធានមនុស្ស»។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាថ្លែងក្នុងពិធីប្រគល់សញ្ញាបត្រដល់គរុសិស្ស-និស្សិតនៃវិទ្យាស្ថានជាតិអប់រំកាលពីម្សិលមិញដែលពួកគេសុទ្ធតែជាធនធានសំខាន់ក្នុងវិស័យអប់រំ និងជាធនធានគ្រូបង្រៀនទើបបញ្ចប់ការសិក្សាឆ្នាំ ២០១៨ ដល់ ២០១៩ សរុប ១ ៩៧៧ នាក់ នារី ៨១៥ នាក់។
លោកថ្លែងថា៖ «វិទ្យាស្ថានជាតិអប់រំមានបេសកកម្ម និងតួនាទីកសាងធនធានមនុស្សប្រកបដោយប្រសិទ្ធភាព ជាពិសេសនៅក្នុងការបណ្ដុះបណ្ដាលគ្រូកម្រិតឧត្ដមសិក្សាដោយបេសកកម្មចម្បងចំពោះមុខរបស់វិទ្យាស្ថានគឺធានាបាននូវការបណ្ដុះបណ្ដាលគ្រូបង្រៀន និងមន្ដ្រីគ្រប់គ្រងអប់រំប្រកបដោយគុណភាពមានក្រមសីលធម៌វិជ្ជាជីវៈខ្ពស់មានគុណធម៌ល្អប្រពៃ និងមានគំនិតច្នៃប្រឌិត»។
លោករដ្ឋមន្ដ្រីថា ចាប់ពីឆ្នាំ ១៩៧៩ ដល់ឆ្នាំ ១៩៩៣ វិទ្យាស្ថានជាតិអប់រំបានបណ្តុះបណ្តាលគ្រូ និងមន្ត្រីអប់រំបានជាង ៣ ម៉ឺននាក់ និងពីឆ្នាំ ១៩៩៣ ដល់ឆ្នាំ ២០១៩ បានបណ្តុះបណ្តាលគ្រូ និងមន្ត្រីអប់រំបានប្រមាណ ២២ ៣៦២ នាក់ នារី ៦ ៨៦៦ នាក់។ តាមរបាយការណ៍ក្រសួងអប់រំបានបញ្ជាក់ថា ក្រសួងបានអនុវត្ដផែនការ យុទ្ធសាស្ដ្រវិស័យអប់រំ ២០១៤-២០១៨ ក្នុងអាណត្ដិទី ៥ បានដោយជោគជ័យដោយមានការចូលរួមពីអ្នកពាក់ព័ន្ធទាំងអស់។ ផែនការយុទ្ធសាស្ដ្រវិស័យអប់រំ ២០១៩-២០៣០ ត្រូវបានរៀបចំឡើងក្នុងគោលដៅបន្តអនុវត្ដកំណែទម្រង់វិស័យអប់រំ យុវជន និងកីឡា និងបង្កើតមូលដ្ឋានរឹងមាំសម្រាប់ឆ្ពោះទៅឆ្នាំ ២០៣០ ព្រមទាំងឆ្លើយតបនឹងចក្ខុវិស័យអភិវឌ្ឍន៍សេដ្ឋកិច្ច សង្គមកិច្ចកម្ពុជា និងកម្មវិធីកំណែទម្រង់នានារបស់រាជរដ្ឋាភិបាល៕