ភ្នំពេញៈ លោកនាយករដ្ឋមន្ដ្រី ហ៊ុន សែន កាលពីថ្ងៃទី ១៨ ខែកុម្ភៈបានចេញអនុក្រឹត្យបញ្ជាក់ពីមុខតំណែងរបស់ឥស្សរជនជាន់ខ្ពស់ ដែលត្រូវផ្ដល់ឲ្យ និងប្រើប្រាស់នូវលិខិតឆ្លងដែនការទូត ផ្លូវការ និងកំណត់ថា រដ្ឋមន្ដ្រីក្រសួងការបរទេសមានឆន្ទានុសិទ្ធិក្នុងការផ្ដល់លិខិតឆ្លងដែនការទូត និងផ្លូវការដល់ឥស្សរជនណាម្នាក់ក្នុងករណីចាំបាច់។
នៅក្នុងជំពូក ១ មាត្រា ១ ត្រង់ចំណុចបទប្បញ្ញត្ដិទូទៅនៃអនុក្រឹត្យនេះបានបញ្ជាក់ថា អនុក្រឹត្យនេះមានគោលដៅកំណត់ការផ្ដល់ និងការប្រើប្រាស់លិខិតឆ្លងដែនការទូត និងផ្លូវការនៃព្រះរាជាណាចក្រកម្ពុជា ហើយក្នុងមាត្រា ២ បន្ថែមថា លិខិតឆ្លងដែនការទូតចេញថ្វាយ និងជូនដល់ឥស្សរជនជាន់ខ្ពស់ និងមន្ដ្រីការទូតខ្មែរទៅតាមលំដាប់នៃឋានន្តរស័ក្ដិ និងមុខតំណែង ព្រមទាំងសហព័ន្ធ និងកូនដែលនៅក្នុងបន្ទុកនៅលីវ ហើយមានអាយុក្រោម ១៨ ឆ្នាំ។
អនុក្រឹត្យបញ្ជាក់ថា ឥស្សរជន និងមន្ដ្រីជាន់ខ្ពស់ទាំងនោះរួមមានព្រះវររាជមាតា ព្រះមហាក្សត្រ ព្រះមហាក្សត្រីយានី ឬសម្ដេចព្រះរាជអគ្គមហេសី និងព្រះរាជបុត្រា ព្រះរាជបុត្រី ព្រមទាំងព្រះរាជវង្សានុវង្ស ដែលមានក្នុងបញ្ជីរៀបចំដោយក្រសួងព្រះបរមរាជវាំងដោយមានការឯកភាពពីក្រសួងការបរទេស។ ប្រធាន អនុប្រធាន និងសមាជិកព្រឹទ្ធសភា ប្រធាន អនុប្រធាន និងសមាជិករដ្ឋសភា, ប្រធាន និងសមាជិកក្រុមប្រឹក្សារដ្ឋធម្មនុញ្ញ, នាយករដ្ឋមន្ដ្រី ឧបនាយករដ្ឋមន្ដ្រី ទេសរដ្ឋមន្ដ្រី រដ្ឋមន្ដ្រីសមាជិកនៃរាជរដ្ឋាភិបាល និងទេសាភិបាលធនាគារជាតិនៃកម្ពុជា, ប្រធានតុលាកាកំពូល អគ្គព្រះរាជអាជ្ញាអមតុលាការកំពូលអគ្គមេបញ្ជាការនៃកងយោធពលខេមរភូមិន្ទ និងអគ្គស្នងការនគរបាលជាតិឧត្ដមប្រឹក្សាផ្ទាល់ព្រះមហាក្សត្រ និងឥស្សរជនដែលមានងារជាសម្ដេចជាដើម ក៏ទទួលបានការផ្ដល់ជូនលិខិតឆ្លងដែនការទូតផងដែរ។
ក្រៅពីនេះលិខិតឆ្លងដែនការទូតក៏បានចេញថ្វាយ និងជូនដល់មន្ដ្រីរាជការ និងឥស្សរជនខ្មែរទៅតាមលំដាប់នៃឋានន្តរស័ក្ដិ និងមុខតំណែងសម្រាប់បំពេញបេសកកម្ម ថ្វាយ និងប្រគេន សម្ដេចព្រះអគ្គមហាសង្ឃរាជាធិបតី សម្ដេចព្រះមហាសង្ឃរាជទាំង ២ គណៈ និងចាប់ពីអនុគណឡើងទៅផងដែរ។
អនុក្រឹត្យបញ្ជាក់ថា៖ «សុពលភាពនៃលិខិតឆ្លងដែនការទូតមានរយៈពេលមិនលើសពី ៥ ឆ្នាំ ហើយមិនអាចបន្តសុពលភាពបានទេ។ មន្ដ្រីការទូតដែលចប់អាណត្ដិបេសកកម្ម មន្ដ្រីអស់ឋានៈ ឬមុខតំណែង មន្ដ្រីចូលនិវត្តន៍មន្ដ្រីដែលមានពិរុទ្ធដែលត្រូវបានព្យួរក្របខ័ណ្ឌ និងមន្ដ្រីដែលឈប់សម្រាកយូរដោយគ្មានបៀវត្សរ៍ចាប់ពី ៦ ខែឡើងទៅនឹងពុំមានសិទ្ធិប្រើលិខិតឆ្លងដែនការទូតទៀតទេ»។ អនុក្រឹត្យបន្តថា លិខិតឆ្លងដែនផ្លូវការផ្ដល់ជូនមន្ដ្រីរាជការខ្មែរសម្រាប់តែទៅបំពេញបេសកកម្មផ្លូវការនៅក្រៅប្រទេសហើយសុពលភាពនៃលិខិតឆ្លងដែនផ្លូវការមានរយៈពេលមិនលើសពី ៥ ឆ្នាំ និងមិនអាចបន្តសុពលភាពបានទេ។
អនុក្រឹត្យនេះបញ្ជាក់ទៀតថា ក្រសួងការបរទេសមានភារកិច្ចផ្ដល់លិខិតឆ្លងដែនការទូត និងផ្លូវការស្របតាមអនុក្រឹត្យនេះ ហើយការស្នើសុំលិខិតឆ្លងដែនការទូត និងផ្លូវការត្រូវមានលិខិតស្នើសុំមកក្រសួងការបរទេស ដោយបញ្ជាក់នូវកម្មវត្ថុនៃបេសកកម្មរយៈពេល ថ្ងៃ ខែ និងប្រទេសដែលត្រូវទៅបំពេញរបស់បេសកកម្ម។
លោក កុយ គួង អ្នកនាំពាក្យក្រសួងការបរទេសបានពន្យល់ថា លិខិតឆ្លងដែនផ្លូវការ និងការទូតគឺសម្រាប់មន្ត្រីរាជរដ្ឋាភិបាលកម្ពុជាប្រើប្រាស់ពេលចេញទៅបំពេញបេសកកម្មនៅក្រៅប្រទេស។ «ប្រទេសមួយចំនួនបានលើកលែងទិដ្ឋាការចំពោះអ្នកកាន់លិខិតឆ្លងដែនប្រភេទនេះ។ ប្រទេសសមាជិកអាស៊ានបានលើកលែងទិដ្ឋាការដល់សមាជិកអាស៊ានដូចគ្នាជាទូទៅរយៈពេល ១ ខែសម្រាប់អ្នកកាន់លិខិតឆ្លងដែនប្រភេទធម្មតា ផ្លូវការ និងការទូត»។
តាមរយៈអនុក្រឹត្យរបស់លោកនាយករដ្ឋមន្ត្រីបានឲ្យដឹងថា ក្រសួងការបរទេសមានភារកិច្ចដកហូត ឬបដិសេធរាល់លិខិតឆ្លងដែនការទូត និងផ្លូវការទាំងឡាយណាដែលផ្ទុយនឹងអនុក្រឹត្យនេះ។ រដ្ឋមន្ដ្រីក្រសួងការបរទេស និងសហប្រតិបត្ដិការអន្តរជាតិមានឆន្ទានុសិទ្ធិក្នុងការផ្ដល់លិខិតឆ្លងដែនការទូត និងផ្លូវការដល់ឥស្សរជនណាម្នាក់ក្នុងករណីចាំបាច់៕