.jpg)
លោកនាយករដ្ឋមន្ត្រី ហ៊ុន សែន នៅក្នុងពិធីមួយកាលពីពេលកន្លងមក។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន នឹងជួបសំណេះសំណាលប្រចាំឆ្នាំជាលើកទី ៤ ជាមួយអ្នកសារព័ត៌មានក្នុងស្រុកប្រមាណជាជិត ៥ ០០០ នាក់ នៅថ្ងៃទី ១៤ ខែ មករា ឆ្នាំ ២០២០ នៅមជ្ឈមណ្ឌលកោះពេជ្រ។
បើយោងតាមលិខិតចុះថ្ងៃទី ៦ ខែ ធ្នូ ឆ្នាំ ២០១៩ របស់ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានជម្រាបជូនលោករដ្ឋមន្ត្រីក្រសួងព័ត៌មានថា៖ «ករណីសូមពិនិត្យសម្រេច ការរៀបចំពិធីជួបជុំសម្តេចនាយករដ្ឋមន្ត្រីជាមួយអ្នកសារព័ត៌មានក្នុងស្រុកលើកទី ៤ ឆ្នាំ ២០២០។ សេចក្តីសម្រេចដូចមានចែងខាងលើទីស្តីការគណៈរដ្ឋមន្ត្រីសូមជម្រាបជូនលោករដ្ឋមន្ត្រី ក្រសួងព័ត៌មានជ្រាបថា រាជរដ្ឋាភិបាលឯកភាពអនុញ្ញាតឱ្យរៀបចំពិធីជួបជុំរវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជាមួយអ្នកសារព័ត៌មានក្នុងស្រុកលើកទី ៤ ឆ្នាំ ២០២០ នៅថ្ងៃទី ១៤ ខែ មករា ឆ្នាំ ២០២០»។
លោក ផុស សុវណ្ណ អ្នកនាំពាក្យក្រសួងព័ត៌មានបានថ្លែងដោយសំដៅទៅម្ចាស់ស្ថានីយវិទ្យុ ទូរទស្សន៍ ទស្សនាវដ្តី កាសែត គេហទំព័រ សមាគម និងក្លិបអ្នកកាសែតទាំងអស់ថា អ្នកសារព័ត៌មានដែលចូលពិធីនេះតម្រូវឲ្យមានការចុះឈ្មោះនៅអគ្គនាយកដ្ឋានព័ត៌មាន និងសោតទស្សន៍ ដើម្បីទទួលបានបណ្ណចូលរួម ហើយថា ពិធីជួបជុំរវាងលោកនាយករដ្ឋមន្ត្រី និងអ្នកសារព័ត៌មាននេះនឹងមានអ្នកចូលរួមប្រហាក់ប្រហែលនឹងឆ្នាំមុនដែរ។
លោកបញ្ជាក់ថា៖ «ឯកឧត្តមរដ្ឋមន្ត្រីក្រសួងព័ត៌មាននឹងអនុញ្ញាតសមាគមអ្នកសារព័ត៌មានទាំងអស់ហ្នឹងធ្វើសំណូមពរតាមរយៈសមាគមរៀងខ្លួនមកក្រសួង ហើយក្រសួងនឹងបូកសរុបហើយផ្ញើទៅសម្តេចមុន។ អ្នកសារព័ត៌មានមានឱកាសជួប និងសុំផ្តល់យោបល់ជាមួយសម្តេច ជាការជួបជុំនឹងប្រាស្រ័យទាក់ទងគ្នាផ្ទាល់ វាដូចជាវេទិកាសាធារណៈជាមួយកម្មករ និងផ្នែកផ្សេងៗដែរ។ យើងនឹងធ្វើនៅទីតាំងដដែល»។
លោក ប៉ែន បូណា ប្រធានក្លិបអ្នកកាសែតកម្ពុជាថ្លែងថា ការជួបជុំគ្នារវាងលោកនាយករដ្ឋមន្ដ្រី និងអ្នកសារព័ត៌មានក្នុងស្រុកនឹងជួយលើកស្ទួយ និងពង្រឹងទំនាក់ទំនងរវាងមន្ត្រីរាជរដ្ឋាភិបាលជាមួយនឹងអ្នកសារព័ត៌មាន ហើយថា តាមរយៈជំនួបនេះក៏នឹងផ្តល់ឱកាសឲ្យអ្នកសារព័ត៌មានក្នុងស្រុកលើកឡើងនូវសំណូមពរ កង្វល់ និងការប្រឈមរបស់ពួកគេទៅកាន់ប្រមុខរដ្ឋាភិបាល។
លោកថា៖ «យើងអបអរសាទរចំពោះជំនួបនេះ ដោយសារវាជាជំនួបដ៏សំខាន់មួយរវាងអ្នកសារព័ត៌មាន និងប្រមុខដឹកនាំរាជរដ្ឋាភិបាល ហើយក្នុងជំនួបនោះ យើងតែងតែបានស្តាប់ប្រសាសន៍របស់ថ្នាក់ដឹកនាំទៅកាន់អ្នកកាសែត ក៏ដូចជាគោលនយោបាយ និងការប្តេជ្ញាចិត្តរបស់រាជរដ្ឋាភិបាលក្នុងការគាំទ្រ និងលើកស្ទួយសារព័ត៌មាននៅកម្ពុជា»។
លោកនាយករដ្ឋមន្ត្រីបានចាប់ផ្តើមជួបជាមួយក្រុមអ្នកសារព័ត៌មានលើកដំបូង នៅថ្ងៃទី ១៤ ខែ មករា ឆ្នាំ ២០១៧ លើកទី ២ នៅថ្ងៃទី ២១ ខែ មករា ឆ្នាំ ២០១៨ និងលើកទី ៣ នៅថ្ងៃទី ១១ ខែ មករា ឆ្នាំ ២០១៩៕
