.jpg)
លោកហ៊ុន សែន ថ្លែងក្នុងពិធីជួបអ្នកកាសែត ថ្ងៃទី ១១ មករា។ ហ្វេសប៊ុក SPM ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន ស្នើឲ្យមានការពិនិត្យលើច្បាប់ស្តីពីរបបសារព័ត៌មានឆ្នាំ ១៩៩៥ ដើម្បីរកមើលចំណុចដែលគួរធ្វើវិសោធនកម្ម ខណៈច្បាប់ពាក់ព័ន្ធ ២ កំពុងស្ថិតក្នុងដំណាក់កាលព្រាង ហើយទន្ទឹមនេះលោកប្រាប់ឲ្យមន្ត្រីរួមចំណែកវាយបកលើព័ត៌មានក្លែងក្លាយដោយការបញ្ចេញព័ត៌មានពិត។
លោកថ្លែងដូច្នេះក្នុងពេលជួបជាមួយអ្នកសារព័ត៌មាន និងមន្ត្រីបម្រើការក្នុងវិស័យព័ត៌មានប្រមាណ ៥ ពាន់នាក់កាលពីថ្ងៃសុក្រ នៅកោះពេជ្រ។ លោកថ្លែងថា កម្ពុជាត្រូវមានច្បាប់ចំនួន ៣ ក្នុងវិស័យព័ត៌មានដែលរួមមានច្បាប់ស្តីពីរបបសារព័ត៌មានឆ្នាំ ១៩៩៥ និងច្បាប់ ២ ទៀតដែលស្ថិតនៅក្នុងដំណាក់កាលព្រាង គឺច្បាប់ស្តីពីសិទ្ធិទទួលព័ត៌មាន និងច្បាប់បទល្មើសបច្ចេកវិទ្យាព័ត៌មាន។
លោកបញ្ជាក់ថាច្បាប់ទាំង ២ ចុងក្រោយនេះត្រូវតែមានសង្គតិភាពជាមួយគ្នា គឺត្រូវប្រើរួមគ្នា។ លោករំឭកថា កាលពីកិច្ចប្រជុំអាស៊ីអឺរ៉ុបនៅ ប្រ៊ុចសែល ប្រទេសបែលហ្ស៊ិកកន្លងទៅ បណ្ដាប្រទេសនៅអឺរ៉ុបស្ទើរទាំងអស់ដែលបានឡើងថ្លែង ពួកគេមិនភ្លេចនិយាយពីឧក្រិដ្ឋកម្មព័ត៌មានវិទ្យា និងព័ត៌មានក្លែងក្លាយនោះទេ។
លោកថ្លែងថា៖ «សូម្បីតែប្រទេសដែលគេហៅថា ការគោរពសិទ្ធិបញ្ចេញមតិក៏បង្កើតនូវការព្រួយបារម្ភពីបញ្ហាទាក់ទងជាមួយនឹងឧក្រិដ្ឋកម្មព័ត៌មានបច្ចេកវិទ្យា និងព័ត៌មានក្លែងក្លាយរហូតដល់ប្រទេសខ្លះនៅអឺរ៉ុបដែលគេចាត់ទុកថា ជាបិតាប្រជាធិបតេយ្យក៏មានច្បាប់រារាំង ដើម្បីដាក់ទណ្ឌកម្មទៅលើព័ត៌មានក្លែងក្លាយ និងដាក់ទណ្ឌកម្មទៅលើការរំលោភបំពានអំពីបច្ចេកវិទ្យាព័ត៌មាននេះផងដែរ។ អ៊ីចឹងខ្ញុំសូមស្នើឲ្យមានការពិភាក្សាឲ្យច្បាស់ទៅលើបញ្ហានេះ ដើម្បីយើងលើកជាក្របខ័ណ្ឌនៃការគ្រប់គ្រង»។
លោកបន្តថា នៅពេលនិយាយដល់ការគ្រប់គ្រងលើវិស័យនេះ នឹងមានអ្នកខ្លះចោទថា កម្ពុជាកំពុងឆ្ពោះទៅរកប្រទេសផ្ដាច់ការ ដោយសារតែពួកគេត្រូវការការរំលោភបំពានសេរីភាពអ្នកដទៃតាមប្រព័ន្ធផ្សព្វផ្សាយ។
លោកនាយករដ្ឋមន្ត្រីក៏បានស្នើទៅមន្ត្រីនិងអ្នកសារព័ត៌មានឲ្យចូលរួមប្រយុទ្ធប្រឆាំងនឹងព័ត៌មានក្លែងក្លាយ ដោយលោកសំដៅទៅព័ត៌មានកន្លងមក ដែលត្រូវបានផ្សាយមិនពិតជាច្រើនដូចជាការផ្សាយព័ត៌មានថា លោកទទួលមរណភាព ឬលោកឲ្យចាប់ តារាចម្រៀង ខេម និងតារាកំប្លែង ខ្ញុង ឧកញ៉ា គិត ម៉េង និង ឧកញ៉ា លី យ៉ុងផាត់។ លោកបញ្ជាក់ថា វិធីប្រយុទ្ធនឹងព័ត៌មានក្លែងក្លាយនេះ គឺការបញ្ចេញព័ត៌មានពិត ហើយលឿន។
លោកថ្លែងថា៖ «ដើម្បីចូលរួមចំណែកនៅក្នុងការបំផ្លាញចោលព័ត៌មានក្លែងក្លាយ តើអ្នកសារព័ត៌មានត្រឹមត្រូវគួរធ្វើអី? គឺផ្សាយព័ត៌មានពិតចេញមក។ អាហ្នឹងគឺអាក្លែងក្លាយវាបាត់ឯង»។
លោកហ៊ុន សែន បានស្ដីបន្ទោសស្ថាប័នពាក់ព័ន្ធដែលរងការបង្ខូចកេរ្តិ៍ឈ្មោះដោយព័ត៌មានក្លែងក្លាយហើយមិនបកស្រាយការពិតនោះ ថាស្ថាប័នទាំងនេះ មានភាពស្ពឹកស្រពន់។ លោកព្រមានថា បើកិច្ចការនេះធ្វើមិនបានទេ មន្ត្រីពាក់ព័ន្ធដែលស្ពឹកស្រពន់ ក្នុងការឆ្លើយតបបញ្ចេញព័ត៌មានពិត ប្រឈមនឹងការដូរតំណែង ក្នុងឆ្នាំ ២០២០។
លោកថា៖ «ហើយវិធីសាស្ត្រគឺយកព័ត៌មានពិតបញ្ចេញមក ដើម្បីបន្សាបអាព័ត៌មានក្លែងក្លាយ។ វិធីមានតែអ៊ីចឹងទេ។ អ៊ីចឹងត្រូវធ្វើការឲ្យសកម្ម»។
ក្រៅពីការប្រកាសប្រយុទ្ធនឹងព័ត៌មានក្លែងក្លាយនេះ លោកនាយករដ្ឋមន្ត្រីក៏ស្នើសុំឲ្យពលរដ្ឋកម្ពុជាកុំជេរប្រមាថ ញុះញង់ បង្កជម្លោះ ឬជេរបញ្ចោរគ្នាប្រើពាក្យអសុរោះ តាមបណ្ដាញសង្គម។
អ្នកនាំពាក្យរដ្ឋាភិបាល លោក ផៃ ស៊ីផាន ប្រាប់ឲ្យដឹងពីម្សិលមិញថា សេចក្តីព្រាងច្បាប់ស្តីពីឧក្រិដ្ឋកម្មតាមព័ត៌មានវិទ្យាកំពុងស្ថិតក្នុងការព្រាងដោយក្រសួងមហាផ្ទៃ និងក្រសួងប្រៃសណីយ៍និងទូរគមនាគមន៍ ហើយថា ច្បាប់នេះនៅមានដំណាក់កាលមួយចំនួនមុនពេលចូលមកដល់ទីស្តីការគណៈរដ្ឋមន្ត្រី រួមមានការប្រជុំពិភាក្សាដោយអន្តរក្រសួងជាដើម។
លោកថា៖ «អ្នកលើកឡើងចេះតែព្រួយបារម្ភតែមិនរកសុចរិតភាពសម្រាប់ខ្លួនឯងទេ។ ច្បាប់នេះខ្មែរមិនយកពីព្រៃមកទេ។ យើងសិក្សាដាក់បញ្ជូលតាំងពីសហរដ្ឋអាមេរិក អង់គ្លេស និងប្រទេសដទៃទៀត។ ពិភពលោកកំពុងយកចិត្តទុកដាក់លើឧក្រិដ្ឋកម្មប្រព័ន្ធអនឡាញនេះឯង»។
អ្នកនាំពាក្យក្រសួងប្រៃសណីយ៍ លោកមាស ប៉ូ និងលោកខូវ មករា មិនអាចទាក់ទងសុំការបញ្ជាក់បានទេ ពីម្សិលមិញ។ ប៉ុន្តែលោកផាត សុផានិត អ្នកនាំពាក្យក្រសួងមហាផ្ទៃ ឲ្យដឹងថា ក្រុមការងារកំពុងពិនិត្យចុងក្រោយមុននឹងឆ្លងក្រសួងមហាផ្ទៃនិងបញ្ជូនទៅអន្តរក្រសួង។
លោកមាស សុភ័ណ្ឌ អ្នកនាំពាក្យក្រសួងព័ត៌មានប្រាប់ម្សិលមិញថា ច្បាប់ស្តីពីសិទ្ធិទទួលបានព័ត៌មានបានឆ្លងកាត់ក្រុមការងារបច្ចេកទេសហើយ។ ថ្នាក់ដឹកនាំបានឯកភាពក្នុងការបន្តនីតិវិធីក្នុងការប្រជុំពិភាក្សាច្បាប់នេះនៅថ្នាក់អន្តរក្រសួង មុនចូលដល់ទីស្តីការគណៈរដ្ឋមន្ត្រីដើម្បីសម្រេចបញ្ជូនទៅសភា។
លោក ណុប វី នាយកមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ថ្លែងថា៖ «ច្បាប់នេះ (សិទ្ធិទទួលបានព័ត៌មាន) មានសារៈសំខាន់សម្រាប់ពលរដ្ឋ និងធានាឲ្យមានតម្លាភាព និងគណនេយ្យភាពនៅក្នុងសង្គម។ ចំពោះច្បាប់ស្តីពីឧក្រិដ្ឋកម្មតាមប្រព័ន្ធបច្ចេកវិទ្យា គួរតែមានការចូលរួមយោបល់ទូលំទូលាយពីពលរដ្ឋនិងពីសង្គមស៊ីវិល»៕
