.jpg)
លោក ហ៊ុន សែន លោក សម រង្ស៊ី និងគ្រួសារទទួលទានអាហាររួមគ្នានាឆ្នាំ ២០១៥ នៅសណ្ឋាគារ Cambodiana។ រូប សហការី
ភ្នំពេញៈ លោកនាយករដ្ឋមន្ត្រី ហ៊ុន សែន និងប្រធានចលនាសង្គ្រោះជាតិ លោក សម រង្ស៊ី កាលពីចុងសប្ដាហ៍បានលេងល្បែងភ្នាល់គ្នារហូតដល់សន្យាចុះចេញពីតំណែង និងប្រគល់ខ្លួនឲ្យរដ្ឋាភិបាលចាប់ដាក់គុក បើគូប្រជែងនយោបាយណាមួយចាញ់ការភ្នាល់ដ៏ភ្ញាក់ផ្អើលមួយអំពីករណីអតីតមេបក្សប្រឆាំងលោក កឹម សុខា ដែលកំពុងជាប់ឃុំក្នុងផ្ទះលើសំណុំរឿង «ក្បត់ជាតិ» ថានឹងត្រូវដោះលែងឬយ៉ាងណានោះ ខណៈអ្នកវិភាគមិនមានជំនឿថា ភាគីណាមួយហ៊ានអនុវត្តការសន្យារបស់ខ្លួនទេ ឯអ្នកដែលចាញ់ គឺពលរដ្ឋ។
ទោះជាយ៉ាងណាលោក សម រង្ស៊ី ពីម្សិលមិញប្រកាសជាសាធារណៈនៅលើទំព័រហ្វេសប៊ុកផ្លូវការថាលោក «សុខចិត្តលះបង់សេរីភាព» របស់លោក «ដើម្បីប្តូរជាមួយសេរីភាពសម្រាប់ប្រជារាស្ត្រខ្មែរទាំងមូល»។
បន្ទាប់ពីលោក ហ៊ុន សែន បានប្រកាសថាលោក កឹម សុខា នឹងមិនត្រូវបានដោះលែងតាមការព្យាករ និងប្រាប់ឲ្យលោក សម រង្ស៊ី រង់ចាំរហូត «សេះដុះស្នែង» រួចមកលោក សម រង្ស៊ី បានប្រើប្រាស់ហ្វេសប៊ុករបស់លោកកាលពីចុងសប្ដាហ៍ដោយបបួលលោក ហ៊ុន សែន ភ្នាល់គ្នាលើសំណុំរឿងលោក កឹម សុខា ដែលកំពុងជាប់ឃុំនៅក្នុងផ្ទះ។
អ្វីដែលគួរឲ្យភ្ញាក់ផ្អើលលោក សម រង្ស៊ី កាលពីចុងសប្ដាហ៍មុនបានបបួលលោក ហ៊ុន សែន ភ្នាល់ថា បើលោក កឹម សុខា មិនត្រូវបានដោះលែងពីការឃុំក្នុងផ្ទះចន្លោះថ្ងៃទី ២៩ ខែធ្នូ ឆ្នាំ ២០១៨ ដល់ថ្ងៃទី ៣ ខែមីនា ឆ្នាំ ២០១៩ ក្រោមសម្ពាធសហគមន៍អន្តរជាតិទេ នោះលោកនឹងដើរចូលឲ្យរដ្ឋាភិបាលចាប់ឃុំខ្លួន តែបើលោក កឹម សុខា នឹងត្រូវដោះលែងនាពេលវេលាដូចកំណត់ខាងលើ ក្រោមសម្ពាធពីសហគមន៍អន្តរជាតិនោះគឺលោក ហ៊ុន សែន ចាញ់ ហើយលោកស្នើឲ្យចុះចេញពីតំណែងជានាយករដ្ឋមន្ត្រី។
លោក សម រង្ស៊ី សរសេរថា៖ «ខ្ញុំនៅតែជឿជាក់ថាក្រោមសម្ពាធអន្តរជាតិ លោក ហ៊ុន សែន នឹងត្រូវបង្ខំចិត្តដោះលែងលោក កឹម សុខា ក្នុងពេលឆាប់ៗខាងមុខនេះ។ អាចថ្ងៃ ២៩ ធ្នូ ២០១៨ នេះ ឬក៏យ៉ាងយូរបំផុតថ្ងៃ ៣ មីនា ២០១៩។ បើលោក ហ៊ុន សែន ចាញ់ខ្ញុំក្នុងការភ្នាល់នេះ គាត់មិនចាំបាច់កាត់កខ្លួនឯងដូចក្នុងការសន្យាបញ្ឈប់ការកាប់ព្រៃឈើនោះទេ។ ខ្ញុំគ្រាន់តែសុំឲ្យគាត់ចុះចេញពីតំណែងបានហើយ។ តែបើខ្ញុំចាញ់លោក ហ៊ុន សែន វិញខ្ញុំសុខចិត្តដើរចូលឲ្យគាត់ចាប់ខ្ញុំយកទៅឃុំទន្ទឹមនឹងលោក កឹម សុខា បើមិនបញ្ចូលរឿងអ្វីថ្មី (ដូចជារដ្ឋប្រហារ) ក្រៅពីចំណុចដែលបានលើកឡើងខាងលើនេះ»។
ជាការឆ្លើយតបក្នុងថ្ងៃដដែលលោក ហ៊ុន សែន ប្រាប់សារព័ត៌មាន Fresh News តបទៅលោក សម រង្ស៊ី វិញថាលោកសុខចិត្តធ្វើការភ្នាល់គ្នាជាមួយលោក សម រង្ស៊ី ដោយយកតំណែងជានាយករដ្ឋមន្ត្រីរបស់លោកជាថ្នូរនឹងការភ្នាល់ជាមួយលោក សម រង្ស៊ី។
លោកអះអាងថា៖ «ខ្ញុំហ៊ានភ្នាល់ជាមួយលោក សម រង្ស៊ី បើសិនមានការដោះលែង កឹម សុខា មែន ខ្ញុំ ហ៊ុន សែន សុខចិត្តចុះចេញពីតំណែងតាមការបបួលភ្នាល់របស់ សម រង្ស៊ី ប៉ុន្តែបើលោក កឹម សុខា មិនត្រូវបានដោះលែងវិញនោះនៅចន្លោះពីថ្ងៃទី ២៩ ខែធ្នូ ឆ្នាំ ២០១៨ រហូតដល់ថ្ងៃទី ៣ ខែមីនា ឆ្នាំ ២០១៩ ទេលោក សម រង្ស៊ី ត្រូវហ៊ានចុះចាញ់ទទួលស្គាល់ការភ្នាល់របស់ខ្លួនដោយចូលមកឲ្យចាប់ខ្លួនភ្លាមៗបន្ទាប់ពីបញ្ចប់ការភ្នាល់»។
ដោយមិនអាចនៅស្ងៀមពីការយកឈ្មោះរបស់លោកទៅភ្នាល់គ្នានោះ លោកកឹម សុខា កាលពីថ្ងៃសៅរ៍ចេញពីគេហដ្ឋានរបស់លោកតាមរយៈសំណេរនៅលើហ្វេសប៊ុកមិនបញ្ចេញឈ្មោះលោក ហ៊ុន សែន ឬលោក សម រង្ស៊ី នោះអះអាងថាលោកដឹងអ្នកណាកំពុងប្រព្រឹត្តអ្វីខ្លះមកលើរូបលោក។ សំណេរមានខ្លឹមសារថា៖ «គាត់(កឹម សុខា) មិនមានសេរីភាពមែន តែគាត់មានសម្បជញ្ញ: ដឹងថាអ្នកកំពុងធ្វើអ្វីមកលើរូបគាត់ និងប្រទេសជាតិ»។
លោក សម រង្ស៊ី ក៏បានអះអាងនៅថ្ងៃនោះដែរថាតាមការពិតលោក កឹម សុខា និងរូបលោកយល់ចិត្តគ្នាច្បាស់ណាស់ ពីព្រោះជាមនុស្សតែមួយទេ។
លោកសង្កត់ធ្ងន់ថា៖ «បន្តិចទៀតនេះយើងនឹងឃើញការពិតដែលនៅតែបញ្ជាក់ថា លោក កឹម សុខា នៅតែរក្សាជំហរដដែលគឺរួបរួមគ្នាដាច់ខាតជាមួយ សម រង្ស៊ី ដើម្បីសង្គ្រោះជាតិយើងឲ្យទាល់តែបាន»។
ប៉ុន្តែក្នុងបទសម្ភាសដាច់ដោយឡែកមួយទៀតកាលពីថ្ងៃសៅរ៍ជាមួយ Fresh News លោក ហ៊ុន សែន ថា៖ «ការដែលខ្ញុំសម្រេចភ្នាល់ជាមួយ សម រង្ស៊ី គឺគាត់បានរុញខ្ញុំឲ្យផ្ទប់ជញ្ជាំងដោយគ្មានជម្រើស ដើម្បីទទួលយកការភ្នាល់នេះដោយចៀសមិនផុត ដើម្បីសម្លាប់ជីវិតនយោបាយ កឹម សុខា បើមិនទទួលយកគេនឹងចោទថា ជាជនកំសាកញីបំផុតមិនអង់អាចក្លាហានមិនហ៊ានទទួលយកការភ្នាល់ជាមួយគេ បើទោះបីដឹងយ៉ាងច្បាស់ថាការយកជីវិតមនុស្សមកភ្នាល់ជាល្បែងនេះជារឿងអគុណធម៌បំផុតក៏ដោយ ព្រោះ សម រង្ស៊ី ជាអ្នករៀបចំផែនការដ៏អាក្រក់មួយនេះ ដើម្បីសម្លាប់ជីវិតនយោបាយរបស់ កឹម សុខា »។
លោកបន្តថា៖ «ជីវិតលោក កឹម សុខា ត្រូវបានសម្លាប់ដោយ សម រង្ស៊ី នឹងឈានដល់ផែនការមួយជំហានទៀតនឹងសម្លាប់ខ្ញុំផងដែរ ដូច្នេះទាំងលោក កឹម សុខា និងក្រុមគ្រួសារព្រមទាំងអ្នកគាំទ្រលោក កឹម សុខា ទាំងអស់សូមកុំភាន់ច្រឡំលើរឿងនេះ។ ករណីភ្នាល់នេះខ្ញុំមិនមែនជាអ្នកបបួលនោះទេគឺ សម រង្ស៊ី ជាអ្នកបង្ខំខ្ញុំឲ្យទទួលយកការភ្នាល់ដោយចៀសមិនផុតជាដាច់ខាត»។
អ្នកវិភាគនយោបាយលោក ព្រាប កុល យល់ថាការភ្នាល់គ្នានេះមិនមានអ្នកចាញ់ទេ ឯអ្នកវិភាគនយោបាយលោក មាស នី ថាទំនងគ្រាន់តែជាការយកប្រៀបផ្នែកនយោបាយដោយលោកមិនជឿថាមានភាគីណាមួយនឹងអនុវត្តតាមការភ្នាល់គ្នានោះទេ។
លោក ព្រាប កុល លើកឡើងថា៖ «ទាំងសម្តេច ហ៊ុន សែន ទាំងឯកឧត្តម សម រង្ស៊ី សុទ្ធតែមិនចាញ់ចំពោះល្បែងភ្នាល់គ្នានេះទេ។ អ្នកដែលចាញ់ពិតប្រាកដនោះគឺប្រជាពលរដ្ឋខ្មែរ»។
លោក មាស នី ថ្លែងថា៖ «ខ្ញុំគិតថាអ្នកនយោបាយខ្លះគាត់បានត្រឹមតែនិយាយភ្នាល់ទេ តែភាពក្លាហានមែនទែន ខ្ញុំគិតថាមិនអាចទៅរួចទេ ហើយឃើញការភ្នាល់របស់លោក សម រង្ស៊ី ក៏វាជាផ្នែកមួយចង់រុញឲ្យលោក ហ៊ុន សែន ទល់ជញ្ជាំង គ្មានច្រកចេញ បើទោះបីជាចង់ដោះលែងក៏ត្រូវបញ្ឈប់ការដោះលែង ដើម្បីឲ្យឈ្នះចិត្តគ្នា»។
លោកថា៖ «ខ្ញុំគិតថាវាជាការរំលោភ និងជាសកម្មភាពមួយដែលអសីលធម៌ទៅលើជោគវាសនាលោក កឹម សុខា។ ប៉ុន្តែបើគាត់ ២ នាក់នេះមានការជជែកគ្នា អាហ្នឹងថាជាយុទ្ធសាស្ត្ររបស់គណបក្សទៅចុះ ឬអាចថាជាភាពឆ្លាតវៃមួយ»៕
