.jpg)
ក្រុមយុវជនស្រឡាញ់បរិស្ថានពេលចូលទៅព្រៃព្រះរកាកាលពីខែមិថុនា ឆ្នាំ ២០១៩ នៅខេត្តព្រះវិហារ។ រូបថត សហការី
ព្រះវិហារៈ ក្រុមយុវជនជាសកម្មជនស្រឡាញ់បរិស្ថានប្រមាណ ១០ នាក់ បានបង្កើតយុទ្ធនាការ «ជិះកង់ដើម្បីព្រៃព្រះរកា» ចាប់ពីថ្ងៃទី ២៩ វិចិ្ឆកា-២ ធ្នូ ដោយជិះកង់ពីរាជធានីភ្នំពេញទៅកាន់ខេត្ដព្រះវិហារមានចម្ងាយផ្លូវជាង ៣០០ គីឡូម៉ែត្រ ដើម្បីផ្សព្វផ្សាយពីសក្តានុពលធនធានធម្មជាតិនៅតំបន់នោះ និងស្នើឱ្យរដ្ឋាភិបាលជួយការពារបន្ថែមដោយពួកគេអះអាងថា ព្រៃឈើនៅតំបន់នោះនៅតែប្រឈមនឹងការកាប់បំផ្លាញពីជនខិលខូច។
យុវជន សាន់ ម៉ាឡា តំណាងក្រុមយុវជនស្រឡាញ់បរិស្ថានទាំង ១០ នាក់ប្រាប់ភ្នំពេញ-ប៉ុស្ដិ៍ពីម្សិលមិញថា ក្រុមពួកគេសុទ្ធតែជាអ្នកស្រឡាញ់ព្រៃឈើនិងធនធានធម្មជាតិ។ នាពេលកន្លងមកពួកគេធ្លាប់បានចុះទៅធ្វើទស្សនកិច្ចនៅតំបន់ព្រៃព្រះរកាជាមួយប្រជាសហគមន៍ហើយសង្កេតឃើញថា តំបន់នោះកំពុងតែរងការកាប់បំផ្លាញពីសំណាក់ជនខិលខូច។ ដូច្នេះទើបពួកគេបានមូលមតិគ្នាធ្វើយុទ្ធនាការជិះកង់នេះឡើង។
សាន់ ម៉ាឡា ថ្លែងថា៖ «យុទ្ធនាការជិះកង់របស់ពួកយើងនេះ មានគោលបំណងដើម្បីផ្សព្វផ្សាយពីតំបន់ព្រៃព្រះរកា ព្រោះកន្លងមកព្រៃព្រះរកាប្រជាពលរដ្ឋទូទៅមិនទាន់ស្គាល់បានទូលំទូលាយនៅឡើយទេ។ យុទ្ធនាការនេះក៏ជាការស្វែងរកការគាំទ្រពីប្រជាពលរដ្ឋយើងក្នុងការថែរក្សាព្រៃព្រះរកា»។
យុវជន ម៉ាឡា បន្ដថា៖ «យើងក៏ចង់ស្នើឱ្យរាជរដ្ឋាភិបាល ពិសេសក្រសួងបរិស្ថានមានចំណាត់ការជាក់លាក់ជាងមុន។ ព្រោះយើងឃើញថាទោះបីជាតំបន់ព្រៃព្រះរកាត្រូវបានដាក់ចូលជាដែនជម្រកសត្វព្រៃនៅឆ្នាំ ២០១៦ ក្ដី មានវត្ដមានក្រុមឧទ្យាននុរក្សចុះទៅការពារក្ដី ប៉ុន្ដែសកម្មភាពកាប់បំផ្លាញព្រៃឈើនៅតំបន់នេះគឺមិនមានការថមថយទេ។ ដូច្នេះយើងចង់ឱ្យក្រសួងធ្វើការច្បាស់លាស់ជាងមុន ដោយធ្វើម៉េចធានាឱ្យតំបន់នេះមានសុវត្ថិភាព និងលែងមានការកាប់បំផ្លាញបន្តទៀត»។
ក្រុមយុវជនដែលជាសកម្មជនស្រឡាញ់បរិស្ថាននេះបានកត់សម្គាល់ឃើញថា ក្នុងពេលថ្មីៗនេះប្រជាសហគមន៍នៅតំបន់ព្រៃព្រះរកាបានឃើញសត្វព្រៃមួយចំនួនបានរត់ចេញពីក្នុងព្រៃមករស់នៅក្នុងភូមិ។ ក្នុងនោះសត្វព្រៃមួយចំនួនក៏ត្រូវបានគេបាញ់សម្លាប់ និងខ្លះទៀតបានជាប់អន្ទាក់ព្រានព្រៃជាដើម។ ករណីនេះក្រុមយុវជនអះអាងថា កើតឡើងដោយជនខិលខូចកាប់បំផ្លាញព្រៃឈើ ប្រើគ្រឿងចក្រដែលមានសំឡេងឮខ្លាំងនាំឱ្យសត្វព្រៃលែងហ៊ានរស់នៅក្នុងព្រៃបន្ដទៀត។
យុវជនរូបនេះបញ្ជាក់ថា៖ «បន្ទាប់ពីបញ្ចប់យុទ្ធនាការជិះកង់នេះ ពួកយើងនឹងធ្វើជាញត្ដិដែលជាលិខិតសំណូមពរ ដើម្បីយកមកដាក់នៅក្រសួងបរិស្ថានដែរ ដើម្បីបង្ហាញពីអ្វីដែលពួកយើងបានរកឃើញថតបាននៅអំឡុងពេលដែលយើងចុះទៅកន្លងមកក្នុងឆ្នាំ ២០១៩ នេះ និងសំណូមពរឱ្យក្រសួងអន្តរាគមន៍និងដោះស្រាយ។ ព្រោះយើងសង្កេតឃើញថាក្រសួងនៅមានភាពខ្វះចន្លោះច្រើនទាក់ទងនឹងយន្តការតាមដាន ត្រួតពិនិត្យលើការអនុវត្ដច្បាប់របស់មន្ដ្រីថ្នាក់ក្រោម»។
លោក នេត្រ ភក្ដ្រា រដ្ឋលេខាធិការ និងជាអ្នកនាំពាក្យក្រសួងបរិស្ថានចាត់ទុកការធ្វើយុទ្ធនាការបែបនេះ គឺជាសិទ្ធិរបស់ក្រុមយុវជន ប៉ុន្តែថាយុវជនត្រូវគោរពតាមច្បាប់ដែលមានជាធរមានជាពិសេសច្បាប់ស្តីពីតំបន់ការពារធម្មជាតិ។
លោកថ្លែងថា៖ «ក្រសួងបរិស្ថាន ស្វាគមន៍រាល់សកម្មភាពទាំងឡាយដែលមានភាពស្មោះត្រង់ និងស្របច្បាប់ចូលរួមក្នុងការការពារ និងអភិរក្សធនធានធម្មជាតិដែលកម្ពុជាមានក្នុងការគ្រប់គ្រង និងអភិរក្សតំបន់ការពារ ធម្មជាតិ ដែលស្ថិតក្រោមយុត្តាធិការរបស់ខ្លួន ដោយក្រសួងបានរៀបចំនូវផែនការយុទ្ធសាស្ត្រគ្រប់ជ្រុងជ្រោយ។ ក្នុងនោះរួមមានការរៀបចំមន្ត្រីឧទ្យានុរក្ស ដើម្បីចុះល្បាតនៅតាមតំបន់ការពារធម្មជាតិ»។
លោកបញ្ជាក់ដែរថានៅដែនជម្រកសត្វព្រៃព្រះរកាមានមន្ត្រីឧទ្យានុរក្សចំនួន ១៧ នាក់ កំពុងឈរជើងការពារ និងល្បាតទាំងយប់ទាំងថ្ងៃ។ ក្រសួងបរិស្ថាន ក៏បានរៀបចំផែនការចុះបញ្ជីដីតំបន់ការពារធម្មជាតិ ដើម្បីការពារកុំឱ្យមានការកាប់រុករានទន្ទ្រានកាន់កាប់ដីព្រៃខុសច្បាប់។ ពង្រឹងសមត្ថភាពមន្ត្រីឧទ្យានុរក្សក្នុងការល្បាត និងបំពាក់អាវុធដើម្បីប្រើប្រាស់ពេលចុះល្បាត ដោយមានការឯកភាពពីក្រសួងមហាផ្ទៃ និងក្រសួងការពារជាតិ។
លោកថ្លែងថា៖ «ក្រសួងក៏បានរៀបចំ និងកំពុងអនុវត្តផែនការអភិវឌ្ឍសេដ្ឋកិច្ចមូលដ្ឋានបង្កើតមុខរបរថ្មីរបស់ពលរដ្ឋ មូលដ្ឋានកុំឱ្យពឹងលើមុខរបរ កាប់ឈើនិងបរបាញ់សត្វបន្តទៀតក្នុងគោលដៅបង្កើនជីវភាពក្រុមគ្រួសារពួកគាត់។ ក្រសួង ក៏បានទទួលស្គាល់សហគមន៍តំបន់ការពារធម្មជាតិ និងតួនាទីរបស់ពួកគាត់ក្នុងការងារអភិរក្ស និងការពារធនធានធម្មជាតិ»។
លោកអះអាងថា៖ «ក្រៅពីនេះក្រសួងបានដាក់ចុះវិធានការច្បាប់មួយចំនួនដើម្បីបង្ក្រាបការរុករានទន្ទ្រានកាន់កាប់ដីព្រៃ និងបទល្មើសធនធានធម្មជាតិដែលកើតមានជាមួយនឹងយន្តការដែលមានស្រាប់។ កិច្ចការទាំងអស់នេះរាជរដ្ឋាភិបាលកម្ពុជា ក្រសួងបរិស្ថានបានបំពេញការងារជាប្រចាំ។ ជាមួយវិធានការទាំងនេះបានធ្វើឱ្យតំបន់ការពារធម្មជាតិរបស់យើងត្រូវបានការពារ និងអភិរក្សប្រកបដោយប្រសិទ្ធភាព»។
លោក នេត្រ ភក្ត្រា បានបន្ថែមថាជាការពិតបទល្មើសខ្នាតធំលែងមានទៀតហើយនៅសល់តែបទល្មើសខ្នាតតូចនៅមានដែលចាំបាច់ត្រូវតែបន្តការងារគ្រប់គ្រង និងអភិរក្សបន្ថែមទៀត។ ជាពិសេសត្រូវការចូលរួមដោយស្មោះត្រង់ និងគ្មានរបៀបវារៈនយោបាយនៅពីក្រោយ និងមិនបម្រើឱ្យគោលដៅរបស់បរទេសណាមួយនោះឡើយ គឺបម្រើផលប្រយោជន៍ខ្មែរ៕
