.jpg)
គោ ១ ក្បាលងាប់ដោយសារខ្លាខាំនៅស្រុកសំឡូត។ រូបថត សហការី
ភ្នំពេញ: សត្វខ្លា ១ ក្បាលដែលអ្នកភូមិ និងសមត្ថកិច្ចសង្ស័យថា ជាប្រភេទខ្លាដំបងបានចូលទៅក្នុងភូមិ នៅក្នុងឃុំល្ពៅ ស្រុកសំឡូត ខេត្ដបាត់ដំបងកាលពីទៀបភ្លឺថ្ងៃទី ១៨ ខែធ្នូ ហើយវាយប្រហារទៅលើគោញីអ្នកភូមិ ១ ក្បាលងាប់ភ្លាមៗនៅនឹងកន្លែង។
លោក ជា សុផល អនុប្រធានប៉ុស្តិ៍នគរបាល ឃុំល្ពៅ បានប្រាប់ឲ្យដឹងកាលពីម្សិលមិញថា គោ ១ ក្បាលត្រូវសត្វខ្លាខាំសម្លាប់នោះជាគោញីទើបកើតកូន ហើយមានម្ចាស់របស់វាឈ្មោះ សុន ភាព អាយុ ៣២ ឆ្នាំ រស់នៅក្នុងភូមិឃុំ កើតហេតុនេះ។
លោក សុផល ថ្លែងថា មេគោនោះត្រូវសត្វខ្លាកាច់ ក ហើយខាំនៅត្រង់ ក និងបូករបស់វា ហើយបើតាមស្លាកស្នាមក្រចកនិងរបៀបខាំសម្លាប់របស់វា គឺត្រូវអ្នកភូមិដែលធ្លាប់ដើរព្រៃបាននិយាយថា ជាសត្វខ្លាដំបងដែលសត្វខ្លាប្រភេទនេះមានមាឌធំគួរសមដែរ។ ការវាយប្រហារដោយសត្វខ្លានេះ អ្នកភូមិបានសន្និដ្ឋានបានកើតឡើងនៅចន្លោះពីម៉ោង ៣ ទៅម៉ោង ៤ ទៀបភ្លឺថ្ងៃទី ១៨ ធ្នូ ហើយក្រុមអ្នកភូមិបានឃើញស្នាមដានជើងរបស់វាដើរឆ្លងកាត់អូរឈ្មោះអូរស្ទឹងតូចស្ថិតនៅក្នុងភូមិស្ទឹងតូចនោះ។
លោក សុផល បានថ្លែងថាក្រោយវាខាំគោងាប់ហើយសត្វខ្លានោះប្រហែលជាពាំគោទៅមិនរួចទើបវាទុកគោចោល។នៅយប់នេះ (ថ្ងៃទី ១៨ ធ្នូ) ខាងនគរបាលប៉ុស្តិ៍រួមនឹងកម្លាំងប្រជាការពារភូមិ នឹងដាក់គោលដៅយាមឃ្លាំមើលក្រែងសត្វខ្លានោះចូលមកយកសាកសពគោវិញ ប៉ុន្តែសត្វគោម្ចាស់វាយកទៅធ្វើសាច់ហើយ។
លោក សុផល បានថ្លែងថា៖ «កម្លាំងយើងចាំយាមមើលនៅតំបន់ដែលសត្វខ្លាធ្លាប់ឆ្លងកាត់តែបើឃើញវាខ្ញុំមិនដឹងថាបាញ់សម្លាប់ ឬយ៉ាងណាទេ ត្រូវរង់ចាំទទួលបញ្ជាពីមេបន្តទៀតសិន»។
លោក សុផល និយាយតាមសម្តីអ្នកភូមិថា កាលពី ៤-៥ ឆ្នាំមុនមានសត្វខ្លាញីឈ្មោល ២ ក្បាល ប៉ុន្តែក្រោយមកអ្នកភូមិប្រទះឃើញតែខ្លាឈ្មោល ១ ក្បាលទេ ដោយសង្កេតឃើញថា បាត់ខ្លាញី ហើយក្រុមអ្នកភូមិសន្និដ្ឋានថា ខ្លាដែលខាំ មេគោនេះអាចជាខ្លាឈ្មោល ១ ក្បាលនោះ។
ដោយឡែកភូមិសាស្ត្រនៅភូមិស្ទឹងតូចនោះនៅខាងក្រោយភូមិប្រហែលកន្លះគីឡូម៉ែត្រគឺអ្នកភូមិដាំពោត និងដំឡូងមី ហើយនៅខាងក្រោយចម្ការដំឡូងនិងចម្ការពោតប្រហែលចម្ងាយជាង ១ គីឡូម៉ែត្រទៀតជាតំបន់ភ្នំដែលមានព្រៃដុះក្រាស់ ហើយសត្វខ្លាអាចរស់នៅក្នុងតំបន់នោះ។
លោក សុផល ថ្លែងថា៖ «កន្លងមកនៅក្នុងភូមិស្ទឹងតូចមិនដែលមានករណីនេះកើតឡើងទេដែលនេះជាករណីលើកទី ១ ហើយបន្ទាប់ពីកើតមានហេតុការណ៍វាយប្រហារដោយសត្វខ្លារបៀបនេះ ធ្វើឲ្យប្រជាពលរដ្ឋដែលរស់នៅក្នុងភូមិស្ទឹងតូចមានការព្រួយបារម្ភខ្លាចសត្វខ្លានោះចូលមកខាំកូនចៅរបស់ពួកគាត់»។
ជុំវិញបញ្ហានេះលោក ពិត ភារៈ នាយកខណ្ឌរដ្ឋបាលព្រៃឈើខេត្តបាត់ដំបងបានប្រាប់ពីរសៀលម្សិលមិញថា ករណីនេះលោកបានឃើញតាមរយៈប្រព័ន្ធផ្សព្វផ្សាយហើយ ហើយក៏បានឲ្យមន្ត្រីជំនាញរបស់លោកចុះទៅស្រុកសំឡូតទីដែលកើតហេតុនោះដើម្បីតាមដានមើលថាតើសត្វគោនោះពិតជាងាប់ដោយសត្វខ្លាចូលមកខាំមែន ឬយ៉ាងណា?
លោកបានបញ្ជាក់ប្រាប់ថា៖ «ក្នុងករណីបើមានការបាញ់សម្លាប់សត្វខ្លាមែននោះគឺវាខុសច្បាប់ហើយ ព្រោះពួកសត្វខ្លាជាប្រភេទសត្វកម្រ ប៉ុន្តែបើសមត្ថកិច្ចមានបំណងចាប់វា ឬ យ៉ាងណានោះអាចជូនដំណឹងប្រាប់ខាងជំនាញខ្ញុំ ព្រោះយើងមានថ្នាំសណ្តំសម្រាប់បាញ់វាឲ្យសន្លប់។ ម្យ៉ាងយើងក៏មានសួនសត្វនៅភ្នំតាម៉ៅសម្រាប់អភិរក្សសត្វកម្រដែរ»៕
