ព្រះសីហនុៈ ខណ្ឌរដ្ឋបាលជលផលកំពង់សោមនៃមន្ទីរកសិកម្ម រុក្ខាប្រមាញ់ និងនេសាទ ខេត្តព្រះសីហនុបានឲ្យដឹងថា ត្រីដូហ្វីន ឬត្រីផ្សោតទឹកប្រៃទម្ងន់ប្រមាណ ២០០ គីឡូដែលគេប្រទះឃើញងាប់នៅចុងឆ្នេរអូរឈើទាលកាលពីយប់ថ្ងៃចន្ទអាចងាប់បណ្ដាលមកពីជាប់មងអ្នកនេសាទ។ ទន្ទឹមគ្នានេះដែរមន្ត្រីក៏បានអំពាវនាវដល់ប្រជានេសាទជួយអភិរក្សត្រីប្រភេទនេះ។
តាមគេហទំព័ររបស់ខណ្ឌរដ្ឋបាលជលផលកំពង់សោមនៃមន្ទីរកសិកម្ម រុក្ខាប្រមាញ់ និងនេសាទ ខេត្តព្រះសីហនុបានចុះពិនិត្យត្រីផ្សោត ១ ក្បាលដែលមានទម្ងន់ប្រហែលជាង ២០០ គ.ក្រ ប្រវែង ២ ម៉ែត្រជាប្រភេទត្រីផ្សោតឃ្លៀច (Indo-Pacific humpoback dolphin) នៅថ្ងៃទី ១៧ ខែកញ្ញា។ ប្រភពដដែលបន្តថា ត្រីប្រភេទនេះមានរស់នៅក្នុងតំបន់កោះព្រីង កោះតាង ប្រជុំកោះរ៉ុង និងប្រជុំកោះសេះ ជាប្រភេទសត្វកម្រដែលត្រូវការពារដោយអនុក្រឹត្យបានងាប់ទើរលើឆ្នេរអូរឈើទោល ខេត្តព្រះសីហនុ ហើយយោងតាមការសន្និដ្ឋានបឋមត្រីផ្សោតឃ្លៀច ងាប់ដោយសារជាប់មងរបស់ប្រជានេសាទ។
លោក ឯក ភា នាយរងខណ្ឌរដ្ឋបាលជលផលខេត្តព្រះសីហនុបានប្រាប់ភ្នំពេញ ប៉ុស្តិ៍ពីថ្ងៃម្សិលមិញថា បន្ទាប់ពីមានការរាយការណ៍ថា មានការប្រទះឃើញត្រីផ្សោតនេះ អាជ្ញាធរជំនាញក៏បានចុះទៅដល់ទីតាំង ដើម្បីធ្វើការពិនិត្យ។ ក្រោយពិនិត្យចប់ ជំនាញក៏បានសម្រេចកប់ខ្មោចត្រីផ្សោតនេះនៅក្បែរឆ្នេរនោះ ដើម្បីចៀសវាងមានក្លិនស្អុយ ព្រោះវាបានងាប់ច្រើនថ្ងៃ និងមានសភាពហើមទៅហើយ។
លោក ភា ថ្លែងថា៖ «សុំអ្នកនេសាទ បើសិនជាឃើញផ្សោតជាប់មង ជាប់អី យើងត្រូវលែងវា ឲ្យមានសុវត្ថិភាពវិញព្រោះពួកវាជាប្រភេទសត្វកម្រ»។ កាលពីយប់ថ្ងៃចន្ទកន្លងទៅភ្ញៀវទេសចរជាតិអន្តរជាតិ និងអាជីវករលក់ដូចំណីអាហារនៅចុងឆ្នេរអូរឈើទាល ឬតាមឆ្នេរអតីតក្រុមហ៊ុនអារីស្តុន បានប្រទះឃើញត្រីផ្សោតឃ្លៀចទឹកប្រៃ ឬត្រីដូហ្វីន ធំមួយក្បាលបានងាប់ ហើយរសាត់មកទើនៅចុងឆ្នេរអូរឈើទាល ខណៈអាជ្ញាធរអះអាងថានេះជាករណីលើកទី ១ ដែលប្រទះឃើញត្រីប្រភេទនេះងាប់នៅពាក់កណ្តាលឆ្នាំនេះ។
លោក វ៉េត សុនីម មន្ត្រីសម្របសម្រួលមូលដ្ឋាននៃអង្គការ IUCN បានអះអាងថា គេអាចដឹងពីមូលហេតុនៃការងាប់របស់សត្វនេះបានតាមការវះកាត់ខ្មោចត្រីផ្ទាល់ រួចយកទៅពិសោធ ព្រោះត្រីប្រភេទនេះអាចងាប់ដោយកត្តាច្រើនយ៉ាងដូចជា ការពុលចំណីជាប្រភេទប្លាស្ទិក ជំងឺនៅក្នុងខ្លួន និងការជួបជាមួយគូសត្រូវរបស់វាជាដើម។ អ្នកនេសាទក៏ជាកត្តាមួយដែលផ្តល់គ្រោះថ្នាក់ដល់ត្រីទាំងនេះផងដែរ។
លោកបន្តថា៖ «សម្រាប់ប្រព័ន្ធអេកូឡូស៊ី ត្រីផ្សោត មានសារៈសំខាន់ក្នុងការជួយគ្នាទៅវិញទៅមក ហើយវាក៏អាចជួយឲ្យយើងដឹងពីគុណភាពទឹក និងបរិស្ថានដែលបញ្ជាក់ថា កន្លែងដែលវារស់នៅមានសភាពស្អាត និងគ្មានការបំពុល»។ លោក វ៉េត សុនីម បានឲ្យដឹងថា មានផ្សោតសមុទ្រប្រមាណ ១០ ប្រភេទដែលកំពុងរស់នៅក្នុងសមុទ្រកម្ពុជាដូចជា ប្រភេទផ្សោតឃ្លៀច និងផ្សោតក្បាល ត្រឡោកជាដើម៕