.jpg)
សត្វប្រើសដែលត្រូវបានបាញ់សម្លាប់ថ្ងៃទី ១៦ តុលានៅខេត្តព្រះវិហារ។ រូប ក្រសួងបរិស្ថាន
ព្រះវិហារៈ សត្វប្រើសឈ្មោល ១ ក្បាល ទម្ងន់ប្រមាណ ២០០ គីឡូក្រាម ត្រូវបានព្រានព្រៃបាញ់សម្លាប់ដោយប្រើគ្រាប់កាំភ្លើងកែច្នៃកាលពីថ្ងៃទី ១៦ តុលា ក្នុងដែនជម្រកសត្វព្រៃព្រះរកានៅភូមិបុស្សធំ ឃុំប្រមេរុ ស្រុកត្បែងមានជ័យ ខេត្តព្រះវិហារ ហើយឥឡូវនេះក្រសួងបរិស្ថានបានស្នើឱ្យសមត្ថកិច្ចតាមចាប់ជនល្មើសទាំងនោះ។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានសម្តែងការសោកស្តាយចំពោះការបាត់បង់សត្វប្រើសនេះ។ លោកថ្លែងពីម្សិលមិញថា ពិតជាគួរឲ្យសោកស្តាយដែលសត្វប្រើសឈ្មោល ១ ក្បាល ទម្ងន់ប្រមាណ ២០០ គីឡូក្រាម បានរត់មកងាប់នៅដែនជម្រកសត្វព្រៃព្រះរកា ក្នុងភូមិបុស្សធំ ឃុំប្រមេរុ ស្រុកត្បែងមានជ័យ ក្រោយពីព្រានព្រៃដេញតាមបាញ់សម្លាប់ដោយប្រើគ្រាប់កាំភ្លើងកែច្នៃ។
លោកបញ្ជាក់ថា៖ «ការងាប់សត្វប្រើសឈ្មោល ១ ក្បាលនេះ បានធ្វើឲ្យយើងបាត់បង់សត្វប្រើសចំនួនសរុប ៣ ក្បាល ដែល ១ ក្បាលៗ ទម្ងន់ប្រមាណ ២០០ គីឡូក្រាម បានងាប់បាត់បង់ជីវិតក្នុងរយៈពេល ២ ខែមកនេះនៅក្នុងខេត្តព្រះវិហារដោយក្នុងនោះ ១ ក្បាលងាប់ ដោយរថយន្តបុក និង ២ ក្បាលងាប់ ដោយការបាញ់សម្លាប់របស់ព្រានព្រៃ»។
អ្នកនាំពាក្យរូបនេះបានជំរុញឲ្យកម្លាំងសមត្ថកិច្ចបន្តពង្រឹងការអនុវត្តច្បាប់ប្រឆាំងនឹងជនល្មើស អ្នកប្រើអាវុធកែច្នៃខុសច្បាប់។ ព្រោះពលរដ្ឋមួយចំនួនដែលរស់នៅជុំវិញតំបន់ការពារធម្មជាតិនៅតែបន្តលួចលាក់កាន់កាប់អាវុធកែច្នៃខុសច្បាប់។ ពួកគេបានលួចចូលព្រៃបរបាញ់សត្វ និងដាក់អន្ទាក់ចាប់សត្វដែលជាទង្វើខុសច្បាប់ និងត្រូវតែប្រឈមមុខនឹងច្បាប់ ប្រសិនបើកម្លាំងសមត្ថកិច្ចចាប់បង្ក្រាបបាន។
លោកឱ្យដឹងថា៖ «សពសត្វប្រើសនេះនឹងត្រូវដឹកទៅកាន់ខេត្តសៀមរាបដើម្បីធ្វើជារូបសំណាកទុកបម្រើផលប្រយោជន៍សម្រាប់ការសិក្សាផ្នែកវិទ្យាសាស្ត្រ អំពីជីវចម្រុះ និងសម្រាប់ការដាក់តាំងពិព័រណ៍សម្រាប់សាធារណជនទស្សនាពេលមានពិព័រណ៍នានាជាច្រើនទៀត»។
លោក ឃុល អ៊ី នាយប៉ុស្ដិ៍នគរបាលរដ្ឋបាលឃុំប្រមេរុ ស្រុកត្បែងមានជ័យ បានថ្លែងថាសត្វប្រើសឈ្មោល ១ ក្បាលនេះ ត្រូវបានព្រានព្រៃដេញតាមបាញ់សម្លាប់ក្នុងដែនជម្រកសត្វព្រៃព្រះរកា ប៉ុន្ដែវាមិនបានងាប់ភ្លាមៗទេ ដោយសត្វប្រើសរងគ្រោះនេះបានរត់ចូលមកក្នុងភូមិប្រជាពលរដ្ឋ។ លុះមកដល់ក្រោយផ្ទះពលរដ្ឋក៏បានដួលងើបលែងរួច ព្រមទាំងមានប្រជាពលរដ្ឋទៅចោមរោមមើល ហើយអាជ្ញាធរបានរាយការណ៍ទៅមន្ត្រីជំនាញបរិស្ថានដែរ។
លោកបន្តថាក្នុងរយៈពេលជិត ១ ម៉ោងក្រោយមកទើបសត្វប្រើសឈ្មោល ១ ក្បាលនេះ បានដាច់ខ្យល់ងាប់។ មន្ត្រីជំនាញបរិស្ថានបានធ្វើកោសល្យវិច័យ និងរកឃើញគ្រាប់កាំភ្លើងកែច្នៃជាច្រើនគ្រាប់នៅលើដងខ្លួន និងត្រូវជើង ១ គ្រាប់ ។
លោកបញ្ជាក់ថា៖ «ឥឡូវនេះមន្ត្រីជំនាញខាងបរិស្ថានបានដឹកយកសត្វប្រើសហ្នឹងទៅរក្សាទុកនៅខេត្តសៀមរាបបាត់ហើយ ដើម្បីដាក់តាំងនៅសារមន្ទីរជាតិនៅទីនោះ។ រីឯសមត្ថកិច្ចយើងកំពុងតាមដានស្រាវជ្រាវរកជនខិលខូចដែលបានប្រព្រឹត្តបទល្មើសនេះ។ កន្លងមកយើងក៏មានការលំបាកដែរ ព្រោះព្រៃព្រះរកាវាធំ ហើយអ្នកភូមិខ្លះគាត់ធ្វើអាវុធកែច្នៃហ្នឹងគឺគាត់លាក់ទុកមិនឲ្យយើងដឹងទេ អ៊ីចឹងវាពិបាកក្នុងការស្វែងរក» ៕
