សីហនុៈ សមត្ថកិច្ចខេត្ដព្រះសីហនុកាលពីម្សិលមិញកំពុងតាមចាប់ខ្លួនជនសង្ស័យជនជាតិចិន ២ នាក់ទៀត បន្ទាប់ពីពួកគេ ៧ នាក់ ត្រូវបានឃាត់ខ្លួនកាលពីយប់ថ្ងៃទី ៧ ខែ កញ្ញា នៅកាសីណូ «មេចេស៊ី» នៅក្រុម ៣ សង្កាត់លេខ ៣ ក្រុងព្រះសីហនុពាក់ព័ន្ធនឹងករណីបង្ខាំងមនុស្សខុសច្បាប់។
លោក ជួន ណារិន្ទ ស្នងការនគរបាលខេត្តព្រះសីហនុបានប្រាប់ភ្នំពេញប៉ុស្ដិ៍ពីម្សិលមិញថា នគរបាលខេត្តនេះបានចុះបង្ក្រាបករណីជនជាតិចិន ចាប់បង្ខាំងជនជាតិចិនដូចគ្នានៅកាស៊ីណូ «មេចេស៊ី» ដោយពីដំបូងចាប់បាន ៧ នាក់ និងបានសង្គ្រោះមនុស្ស ៤ នាក់ផងដែរ។
លោកថ្លែងថា៖ «ពេលនេះយើងកំពុងសាកសួរជនសង្ស័យជនជាតិចិនទាំង ៧ នាក់នោះ។
យើងកំពុងតាមចាប់ជនសង្ស័យជាបក្ខពួកបន្តទៀតដែលកំពុងរត់គេចខ្លួន។ យើងមិនទាន់បញ្ចប់ការងារនេះទេ។ ប៉ុន្ដែជនរងគ្រោះទាំង ៤ នាក់ ដែលត្រូវបង្ខាំងមិនមានអ្នកណារងគ្រោះទេ»។
លោកស្នងការបានឲ្យដឹងថា ក្រោយប្រតិបត្តិការនេះសមត្ថកិច្ចដកហូតកាំភ្លើងខ្លីបាន ១ ដើម និងគ្រាប់មួយចំនួនព្រមទាំងកាំបិតតូច ២ ដើមផងដែរ។
បើតាមលោកស្នងការ ការឃាត់ខ្លួននេះគឺដំបូងឡើយនៅរំលងអធ្រាត្រយប់ថ្ងៃទី ៧ ឈានចូលថ្ងៃទី ៨ ខែ កញ្ញា មានពលរដ្ឋរាយការណ៍ប្រាប់សមត្ថកិច្ចពីករណីជនជាតិចិនមួយក្រុមបានឈ្លោះគ្នា។ បន្ទាប់មកនគរបាលការិយាល័យព្រហ្មទណ្ឌបានចុះទៅទីតាំងកាស៊ីណូ កើតហេតុនោះហើយបានអន្តរាគមន៍រំដោះជនរងគ្រោះដែលត្រូវបានគេបង្ខាំងទុកនោះ។
លោកស្រី ជៀប សុធារី មន្ដ្រីសម្របសម្រួលសមាគមអាដហុកប្រចាំខេត្ដព្រះសីហនុបានឲ្យដឹងថា បច្ចុប្បន្នស្ថានភាពជនជាតិចិនក្នុងខេត្ដនេះ កំពុងបន្តការរស់នៅ និងប្រកបរបរជាធម្មតា។ ប៉ុន្ដែលោកស្រីចង់ឲ្យអាជ្ញាធរខេត្ដបន្ដពង្រឹងសន្តិសុខបន្ថែមទៀតដើម្បីស្ដារមុខមាត់ក្រុងព្រះសីហនុក៏ដូចជាទាក់ទាញទេសចរឲ្យបានច្រើនឡើងវិញ។
លោកស្រីបានថ្លែងថា៖ «យើងចង់ឲ្យអាជ្ញាធរបន្ថែមកម្លាំងនៅតាមចំណុចសំខាន់ៗជាអចិន្រៃ្តយ៍នៅពេលយប់ដើម្បីរក្សាសន្ដិសុខសុវត្ថិភាពដល់ពលរដ្ឋ និងភ្ញៀវទេសចរកុំឲ្យពួកគាត់បារម្ភ និងនាំគ្នានិយាយពីបញ្ហាអសន្ដិសុខណាមួយចំពោះខេត្តព្រះសីហនុទៀត»៕