.jpg)
ក្រុមអ្នកជំនាញ កំពុងពិនិត្យទីតាំងសព យាយ និងចៅ ត្រូវគេសម្លាប់ដោយកាត់ក្បាល។ CPU
កំពង់ចាមៈ កម្លាំងនគរបាលស្រុកព្រៃឈរ សហការជាមួយអង្គភាពការពារកុមារ (Child Protection Unite) ដែលជាក្រុមជំនាញក្រៅរដ្ឋាភិបាល កំពុងធ្វើការស្រាវជ្រាវលើករណីឃាតកម្ម «ដ៏ព្រៃផ្សៃ» សម្លាប់ដោយកាត់ក្បាល ស្ត្រីចំណាស់ត្រូវជាយាយ និងចៅស្រីអាយុទើប ៦ ឆ្នាំ នៅក្នុងភូមិ-ឃុំថ្មពូន កាលពីថ្ងៃពុធ។
លោក កែវ សេងហ៊ន អធិការស្រុកព្រៃឈរ បានប្រាប់ភ្នំពេញប៉ុស្តិ៍កាលពីម្សិលមិញថា អ្នកស្រី ពូ អូន អាយុ ៦៥ ឆ្នាំ និងចៅស្រីគាត់ឈ្មោះ ខេង សាវឿន អាយុ ៦ ឆ្នាំ ជាប្រជាពលរដ្ឋនៅភូមិ-ឃុំ កើតហេតុខាងលើ ត្រូវបានគេប្រទះឃើញស្លាប់នៅក្នុងព្រៃ មានចម្ងាយប្រមាណ ៣៥០ ម៉ែត្រ នៅភាគខាងត្បូងផ្ទះរបស់គាត់ កាលពីរសៀលថ្ងៃទី ៣ ខែ មេសា ឆ្នាំ ២០១៩។ «សពរបស់ជនរងគ្រោះទាំង ២ ត្រូវបានគេកាត់ក្បាល។ វាជាករណីឃាតកម្មដ៏រន្ធត់ និងឃោរឃៅព្រៃផ្សៃបំផុត ដែលមិនធ្លាប់មានចាប់តាំងពីរបបខ្មែរក្រហមត្រូវបានផ្ដួលរំលំ»។
លោកបន្តថា នៅពេលនេះកម្លាំងនគរបាលជំនាញមកពីថ្នាក់ខេត្ត កំពុងជួយអន្តរាគមន៍ ស្រាវជ្រាវ និងស៊ើបអង្កេតលើករណីនេះដើម្បីកំណត់មុខសញ្ញាជនសង្ស័យជាឃាតករ។
លោកថា៖ «ថ្វីបើនៅពេលនេះ [រសៀលថ្ងៃព្រហស្បតិ៍] កម្លាំងសមត្ថកិច្ចជំនាញ នៅពុំទាន់រកឃើញក្បាលជនរងគ្រោះទាំង ២ និងមិនទាន់កំណត់មុខសញ្ញាជនសង្ស័យជាឃាតករបាន ប៉ុន្តែ តាមការសន្និដ្ឋានរបស់សមត្ថកិច្ចជំនាញករណីឃាតកម្មដ៏ព្រៃផ្សៃនេះ ជនជាឃាតករ និងជនរងគ្រោះ គឺអាចជាអ្នកស្គាល់គ្នាជិតស្និទ្ធ និងអាចជាអ្នករស់នៅភូមិជាមួយគ្នា»។
ជុំវិញករណីនេះ អ្នកស្រី ដើង ថន អាយុ ៣៥ ឆ្នាំ ដែលជាកូនស្រី និងជាមីងរបស់ក្មេងស្រីរងគ្រោះបានប្រាប់ភ្នំពេញប៉ុស្តិ៍ ថា នៅព្រឹកថ្ងៃទី ៣ ខែ មេសា ឆ្នាំ ២០១៩ អ្នកស្រីបានទិញនំចំណីយកទៅជូនម្ដាយ និងក្មួយស្រី ប៉ុន្តែ ពេលទៅដល់ឃើញផ្ទះម្ដាយចាក់សោ។ អ្នកស្រីបានសួរអ្នកជិតខាង ប៉ុន្តែគ្មាននរណាម្នាក់ដឹងថា ម្ដាយនិងក្មួយស្រីទៅទីណានោះទេ។
អ្នកស្រីនិយាយថា៖ «ខ្ញុំបានដើររកម្ដាយនិងក្មួយស្រីខ្ញុំជុំវិញផ្ទះ និងក្នុងចម្ការស្វាយចន្ទីរបស់គាត់ ប៉ុន្តែមិនឃើញគាត់នោះទេ»។
ដោយរកសព្វទីកន្លែងមិនឃើញអ្នកស្រីក៏បានទូរស័ព្ទទៅបងប្អូន និងសាច់ញាតិមួយចំនួនដែលនៅភូមិផ្សេងទៀត ប៉ុន្តែគ្មាននរណាដឹងពីដំណឹងរបស់ម្ដាយ និងក្មួយស្រីនោះទេ។ បន្ទាប់មក ទើបអ្នកស្រីសម្រេចចិត្តប្ដឹងនគរបាលមូលដ្ឋានឲ្យជួយអន្តរាគមន៍តាមរកម្ដាយនិងក្មួយស្រី។
លុះដល់ម៉ោងជាង ១២ ថ្ងៃត្រង់ ថ្ងៃទី ៣ ខែ មេសា បងស្រីជីដូនមួយរបស់អ្នកស្រី ឈ្មោះ មួង ស្រី អាយុ ៤៥ ឆ្នាំ រួមទាំងកម្លាំងនគរបាលប៉ុស្តិ៍ឃុំថ្មពូន បានប្រទះឃើញសពម្ដាយ និងក្មួយស្រីនៅក្បែរព្រៃឫស្សី ដែលស្ថិតនៅចម្ងាយប្រមាណ ២៥០ ម៉ែត្រពីចម្ការស្វាយចន្ទីរបស់ម្ដាយអ្នកស្រី។
ជាមួយសំឡេងយំខ្សឹកខ្សួល អ្នកស្រី មួង ស្រី និយាយថា៖ «ខ្ញុំមានក្ដីតក់ស្លុតខ្លាំងណាស់ ហើយស្ទើរតែគាំងបេះដូងស្លាប់នៅនឹងកន្លែងពេលដែលឃើញម្ដាយមីង និងក្មួយស្រីរបស់ខ្ញុំ ស្លាប់ដោយត្រូវបានគេកាត់ក្បាលនៅក្នុងព្រៃនោះ»។
អ្នកស្រីបន្តថា បន្ទាប់ពីឃើញសពដាច់ក្បាលអ្នកស្រី និងអាជ្ញាធររួមទាំងសាច់ញាតិ បាននាំគ្នាដើរស្វែងរកក្បាលជនរងគ្រោះទាំង ២ នៅក្នុងព្រៃនោះ ប៉ុន្តែមិនប្រទះឃើញទាល់តែសោះ។
ជាមួយគ្នានេះ ម្ដាយកុមារីរងគ្រោះ ខេង សាវឿន គឺអ្នកស្រី ដើង ចាន់ថា អាយុ ២៤ ឆ្នាំ ដែលទើបត្រឡប់ពី បម្រើការងារជាកម្មករសំណង់នៅខេត្តកំពត ជាមួយប្ដីរបស់នាង ថ្លែងថា មុនទទួលបានដំណឹងជាអកុសលនេះ ម្ដាយ និងកូនស្រីរបស់នាងបានទូរស័ព្ទទៅសួរសុខទុក្ខនាងនិងប្ដីដែលកំពុងបម្រើការងារនៅខេត្តកំពត។
អ្នកស្រីបានឲ្យដឹងថា ម្តាយរបស់អ្នកស្រីបានសួរអ្នកស្រីថា តើមកលេងផ្ទះទេ ក្នុងពេលចូលឆ្នាំខាងមុខនេះ? «ម៉ែនិងកូនស្រីរបស់កូននឹកកូនខ្លាំងណាស់!»។
និយាយដល់ត្រឹមនេះអ្នកស្រីចាន់ថា បានទ្រហោយំ ហើយនិយាយទាំងអួលដើមកទៀតថា៖ «ខ្ញុំបានប្រាប់ម្ដាយខ្ញុំថា នៅថ្ងៃទី ១០ ខែ មេសា ខ្ញុំ និងប្ដីខ្ញុំ នឹងត្រូវអនុញ្ញាតឲ្យឈប់សម្រាកដើម្បីចូលរួមបុណ្យចូលឆ្នាំ។ ចំណែកកូនស្រីខ្ញុំ បានប្រាប់ឲ្យខ្ញុំទិញកង់ឲ្យនាងហើយខ្ញុំបានសន្យាថានឹងទិញវាឲ្យនាងពេលខ្ញុំត្រឡប់ទៅលេងផ្ទះក្នុងពេលចូលឆ្នាំ»។
អ្នកស្រីបន្តថា ប៉ុន្តែនៅពេលទទួលបានដំណឹងពីការស្លាប់របស់ម្ដាយ និងកូនស្រី អ្នកស្រីមានអារម្មណ៍តក់ស្លុតយ៉ាងខ្លាំង។ អ្នកស្រី និងប្ដីបានសុំអនុញ្ញាតច្បាប់មុនកាលកំណត់របស់ក្រុមហ៊ុន ដើម្បីមកចូលរួមបុណ្យសពម្ដាយ និងកូនស្រីជាទីស្រឡាញ់។
ជាមួយគ្នានេះ អ្នកស្រីបានអំពាវនាវ សុំឲ្យអាជ្ញាធរមានសមត្ថកិច្ច ជួយស្វែងរកឃាតករ ដែលសម្លាប់ម្ដាយ និងកូនស្រីរបស់អ្នកស្រីដើម្បីយកមកផ្ដន្ទាទោសទៅតាមផ្លូវច្បាប់។
លោក លឹម ឡុង នាយប៉ុស្តិ៍ឃុំថ្មពូន បានប្រាប់ភ្នំពេញប៉ុស្តិ៍ថា អ្នកស្រី ពូ អូន ពុំធ្លាប់មានជម្លោះទាស់ទែងពាក្យសម្ដីអ្វីជាមួយអ្នកជិតខាងនៅក្នុងភូមិនោះទេ។ ការស្លាប់របស់គាត់ សមត្ថកិច្ចជំនាញមិនទាន់ធ្វើការសន្និដ្ឋានថា វាកើតឡើង ដោយករណីអ្វីឲ្យពិតប្រាកដនោះទេ៕
