.jpg)
ទីតាំងចម្រាញ់ប្រេងនៅកំពង់ស្ពឺត្រូវភ្លើងឆេះ កាលពីថ្ងៃទី ២១ ឧសភា។ សហការី
កំពង់ស្ពឺៈ បន្ទាប់ពីការស្រាវជ្រាវ ពីម្សិលមិញសមត្ថកិច្ចអះអាងថា ករណីអគ្គិភ័យឆេះសិប្បកម្មកែច្នៃស្លប្រេងម៉ាស៊ីនខ្មៅចម្រាញ់ធ្វើប្រេងម៉ាស៊ូត ១ នៅភូមិដំណាក់ត្រាច ឃុំដំបូករូង ស្រុកភ្នំស្រួចខេត្តកំពង់ស្ពឺ កាលពីថ្ងៃទី ២១ ខែ ឧសភា គឺហេតុការណ៍នេះបណ្តាលមកពីទុស្សេខ្សែភ្លើង ហើយសមត្ថកិច្ចអះអាងថា ទីតាំងស្លប្រេងនោះជាសិប្បកម្មគ្មានច្បាប់។
លោក សម សាមួន ស្នងការនគរបាលខេត្តកំពង់ស្ពឺប្រាប់ ភ្នំពេញប៉ុស្តិ៍ ពីម្សិលមិញថាពាក់ព័ន្ធអគ្គិភ័យឆេះសិប្បកម្មកែច្នៃប្រេងម៉ាស៊ីនខ្មៅកាលពីថ្ងៃទី ២១ ឧសភា នោះ បើផ្អែកតាមការស្រាវជ្រាវរបស់សមត្ថកិច្ច និងតាមការសាកសួរទៅម្ចាស់សិប្បកម្មឈ្មោះ ថន សេងលី បង្ហាញថាករណីគ្រោះអគ្គិភ័យនោះបណ្តាលមកពីទុស្សេខ្សែភ្លើង។
លោក សាមួន បានថ្លែងថា៖ «ទីតាំងសិប្បកម្មស្លប្រេងម៉ាស៊ូតនោះកាលពីពេលកន្លងទៅ សមត្ថកិច្ចបានចុះបិទអាជីវកម្មរួចមកហើយ ដោយសារដំណើរការគ្មានការអនុញ្ញាតប៉ុន្ដែទំនងលួចបើកដំណើរការដោយស្ងាត់ៗ»។
ដោយឡែកលោក សាយ ប៊ុនថន អធិការនគរបាលស្រុកភ្នំស្រួច បាននិយាយថាក្រោយកើតហេតុមានគណៈកម្មការមួយក្រុមចុះដល់កន្លែងកើតហេតុ ដើម្បីពិនិត្យមើលផ្លូវច្បាប់ពីការបើកសិប្បកម្មនោះ ក្នុងនោះក៏មានខាងក្រសួងសេដ្ឋកិច្ច និងហិរញ្ញវត្ថុផងដែរ ហើយពិនិត្យឃើញថា សិប្បកម្មនោះគ្មានច្បាប់អនុញ្ញាតត្រឹមត្រូវទេ។
លោក ប៊ុនថន បានបញ្ជាក់ថា៖ «ថ្វីដ្បិតសិប្បកម្មនោះគ្មានច្បាប់អនុញ្ញាតក្តី តែសមត្ថកិច្ចនៅតែយករថយន្តពន្លត់អគ្គិភ័យទៅជួយសង្គ្រោះពីការឆេះនោះ។ ដោយសារថា ក្នុងនាមកម្លាំងសមត្ថកិច្ចត្រូវតែជួយប្រជាពលរដ្ឋ»។
លោកប្រាប់ថា តាមការស្រាវជ្រាវពីមន្រ្តីនគរបាលជំនាញ និងតាមការសាកសួរពីម្ចាស់សិប្បកម្មនោះបង្ហាញថា អគ្គិភ័យនេះបង្កដោយទុស្សេប្រអប់ភ្លើង ហើយបណ្តាលឲ្យបែកផ្កាភ្លើងខ្ទាតប៉ះធុងប្រេងម៉ាស៊ូតនៅក្បែរនោះបង្កឲ្យមានជាអណ្តាតភ្លើងឆាបឆេះតែម្ដង។
លោកបន្តថា អគ្គិភ័យនោះកើតឡើងនៅម៉ោង ១៥ និង ៤៥ នាទីថៃ្ងទី ២១ ខែ ឧសភា ឆ្នាំ ២០១៩ ក្នុងនោះសមត្ថកិច្ចបានប្រើរថយន្តពន្លត់អគ្គិភ័យចំនួន ៤ គ្រឿង។ រថយន្ត ២ គ្រឿង មកពីស្នងការដ្ឋាននគរបាលខេត្តកំពង់ស្ពឺ និងរថយន្ត ២ គ្រឿងទៀត មកពីសាលានគរបាលកម្ពុជា-វៀតណាម នៅក្នុងស្រុកភ្នំស្រួចនោះ។
ភ្នំពេញប៉ុស្តិ៍ នៅមិនទាន់អាចរកប្រភពទាក់ទងម្ចាស់ទីតាំងប្រេងដែលរងការខូចខាតដោយអគ្គិភ័យហើយ ដែលសមត្ថកិច្ចថា មិនមានច្បាប់អនុញ្ញាតនៅឡើយទេ កាលពីម្សិលមិញ។
លោក សាយ ប៊ុនថន ឲ្យដឹងថាចំពោះទ្រព្យសម្បត្តិ ដែលខូចខាតមានរថយន្តដឹកប្រេង ១ គ្រឿង ម៉ាស៊ីនចម្រាញ់ប្រេង ៧ គ្រឿង ស៊ីទែនផ្ទុកប្រេងចំនួន ៦ ពុយជ័រ ២៤ ពុយប្រេងម៉ាស៊ូតចម្រាញ់រួចចំនួន ៦៧ ០០០ លីត្រ និងសម្ភារផ្សេងៗមួយចំនួនទៀត៕
