.jpg)
នគរបាលពិនិត្យធុងអាល់កុលក្លែងក្លាយ ដែលនាំចូលមកស្តុកទុកដោយខុសច្បាប់។ រូបថត នគរបាល
ភ្នំពេញ: បុរសជាអ្នកនាំចូលអាល់កុលម្នាក់ឈ្មោះ លឹម ហ៊ុយ ត្រូវបានមន្ត្រីនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃតម្រូវឲ្យធ្វើកិច្ចសន្យា និងព្រមានបញ្ឈប់ការនាំចូលទឹកអាល់កុលបន្តទៀត បន្ទាប់ពីសមត្ថកិច្ចបានរកឃើញបុរសរូបនេះនាំចូលទឹកអាល់កុលក្លែងក្លាយ និងនាំចូលខុសច្បាប់ ខណៈអាល់កុលសរុបជាង ៤ ពាន់លីត្រត្រូវបានរឹបអូស។
លោក ឡុង ស្រេង អនុប្រធាននាយកដ្ឋានប្រឆាំងបទល្មើសសេដ្ឋកិច្ចនៃក្រសួងមហាផ្ទៃបានថ្លែងពីម្សិលមិញថា នៅថ្ងៃទី ២១ ខែមីនា ថ្មីៗនេះមន្ត្រីអធិការដ្ឋាននគរបាលខណ្ឌបឹងកេងកងបានសហការជាមួយនាយកដ្ឋានប្រឆាំងបទល្មើសសេដ្ឋកិច្ច ចុះឆែកឆេរទីតាំងស្តុក និងចែកចាយមេតាណុល ១ កន្លែងដែលស្ថិតនៅក្នុងសង្កាត់ទួលស្វាយព្រៃទី ១ ខណ្ឌបឹងកេងកង រាជធានីភ្នំពេញ។ ដោយម្ចាស់ផ្ទះជាអ្នកនាំចូលអាល់កុលនេះត្រូវបានឲ្យធ្វើកិច្ចសន្យាបញ្ឈប់ការនាំចូលអាល់កុលក្លែងក្លាយទៀត។
លោកបន្តថា ការចុះបង្ក្រាបនេះដោយមានការសម្របសម្រួល និងដឹកនាំផ្ទាល់ពីលោក សាយ ណូរា ព្រះរាជអាជ្ញារងអមសាលាដំបូងរាជធានីភ្នំពេញលោក ទូច ផល្លា មន្ត្រីភ្នាក់ងារត្រួតពិនិត្យឱសថនៃក្រសួងសុខាភិបាល។ ជាលទ្ធផល សមត្ថកិច្ចបានរកឃើញ មេតាណុល (មិនអាចលាងដៃបានទេ) និងធ្វើការដកហូតយកទៅរក្សាទុកនៅអង្គភាពវិទ្យាស្ថានស្តង់ដាកម្ពុជានៃក្រសួងឧស្សាហកម្ម និងសិប្បកម្ម។
លោកបន្ថែមថា ក្នុងនោះសម្ភារដកហូតរួមមាន មេតាណុលច្រកចូល ៧៥ កាន, ធុងពណ៌ខៀវចំនួន ១៩ ធុងក្នុង ១ ធុងទម្ងន់ ១៦៣ គីឡូក្រាម (សរុបជាង ៤ ពាន់គីឡូក្រាម) និងឧបករណ៍សម្រាប់បូមចំនួន ១ ផងដែរ។ ម្ចាស់វត្ថុតាងទាំងនេះឈ្មោះ លឹម ហ៊ុយ ភេទប្រុស អាយុ ៦១ ឆ្នាំស្នាក់នៅផ្ទះលេខ ២៤C សង្កាត់ទួលស្វាយព្រៃ ១ ខណ្ឌបឹងកេងកង រាជធានីភ្នំពេញ។
លោក ឡុង ស្រេង បញ្ជាក់ថា៖ «ឥឡូវនេះយើងបានតម្រូវឲ្យម្ចាស់អ្នកនាំចូលមេតាណុលហ្នឹងធ្វើកិច្ចសន្យាបញ្ឈប់ការនាំចូលផលិតផលក្លែងក្លាយបន្តទៀត ហើយបានរឹបអូសវត្ថុតាងទាំងអស់ប្រគល់ជូនទៅវិទ្យាស្ថានស្តង់ដាកម្ពុជានៃក្រសួងឧស្សាហកម្ម និងសិប្បកម្មរក្សាទុក។ យើងបន្តធ្វើការឆែកឆេរ និងបង្ក្រាបអ្នកនាំចូលផលិតផលក្លែងក្លាយបែបនេះបន្តទៀតនៅសប្ដាហ៍ក្រោយនេះ យើងនឹងចុះទៅបង្ក្រាបចំនួន ៣ កន្លែងទៀត ប៉ុន្ដែខ្ញុំមិនទាន់បង្ហាញអត្តសញ្ញាណទេ»។
លោក ស៊ឹម ពិសិដ្ឋ អធិការនគរបាលខណ្ឌបឹងកេងកងបានថ្លែងពីម្សិលមិញថា សមត្ថកិច្ចពិតជាបានចុះបង្ក្រាបអាល់កុលក្លែងក្លាយនេះមែន ដោយមានមួយចំនួនធំត្រូវបានម្ចាស់ឃ្លាំងលួចនាំចូលខុសច្បាប់ បម្រុងនឹងចែកចាយ។ ក្រោយការចុះត្រួតពិនិត្យម្ចាស់ទីតាំងខាងលើ និងអាល់កុលក្លែងក្លាយត្រូវបានសមត្ថកិច្ចយកទៅរក្សាទុក ដើម្បីរង់ចាំការដោះស្រាយតាមនីតិវិធីច្បាប់។
លោកបញ្ជាក់ថា៖ «ខ្ញុំអត់បានដឹងពីចំនួនជាក់លាក់ទេ ព្រោះកម្លាំងខ្ញុំបានចូលរួមក្នុងប្រតិបត្តិការនេះ ប៉ុន្ដែរបាយការណ៍នានាខាងមន្ត្រីជំនាញជាអ្នកចាត់ចែង។ យើងគ្រាន់តែសហការជាមួយកម្លាំងជំនាញប៉ុណ្ណោះ សូមសួរទៅមន្ត្រីជំនាញទើបគាត់ដឹងពីព័ត៌មានច្បាស់លាស់»។
ទោះយ៉ាងណាលោក ឡុង ស្រេង បានបញ្ជាក់ជុំវិញការកត់សម្គាល់អេតាណុល និងមេតាណុល «បើវាជាមេតាណុលនៅពេលយើងជ្រលក់សំឡីហើយ ដុតវាទៅគឺភ្លើងរបស់វាយើងមើលមិនឃើញទេ គឺភ្លើងវាខៀវ និងពណ៌សតែម្ដង ប៉ុន្ដែចំពោះអេតាណុល (អាល់កុលសម្រាប់លាងដៃ) យើងជ្រលក់សំឡីដុតដូចគ្នាគឺយើងឃើញភ្លើងវាមានពណ៌លឿងតែម្ដង។ វិធីមួយទៀតគឺយើងលាងដៃជាមួយមេតាណុលតែ ២ វិនាទីវានឹងស្ងួតហើយ ប៉ុន្ដែបើអេតាណុលវិញ យើងលាងដៃ ១០ វិនាទីក្រោយបានវាស្ងួត ហើយមានជាតិរអិលទៀតផង»។
គួររំឭកថាកាលពីថ្ងៃទី ១៨ ខែមីនា នេះ មន្ត្រីនៃអគ្គនាយកដ្ឋានកាំកុងត្រូលនៃក្រសួងពាណិជ្ជកម្មបានបន្តចុះត្រួតពិនិត្យនៅតាមឱសថស្ថាននានានៅក្បែរផ្សារអូឡាំពិកដោយក្នុងប្រតិបត្តិការនោះបានរឹបអូសអាល់កុលក្លែងក្លាយជាច្រើនលីត្រពីឱសថស្ថាន ១ កន្លែង ខណៈកំពុងដាក់លក់។ ដោយអគ្គនាយកដ្ឋានកាំកុងត្រូលបានអំពាវនាវដល់ប្រជាពលរដ្ឋសូមកុំទិញផលិតផលអាល់កុលណាដែលគ្មានស្លាកសញ្ញា និងមិនមានការបញ្ជាក់ពីប្រភពច្បាស់លាស់ ដើម្បីប្រើប្រាស់សម្រាប់ការលាងសម្អាតកម្ចាត់មេរោគ ឬបង្ការជំងឺកូវីដ១៩៕
វីដេអូ៖
