កំពង់ស្ពឺ: សមត្ថកិច្ចខេត្តកំពង់ស្ពឺបានបញ្ជូនប្រធាន និងមន្ត្រីសហព័ន្ធសហជីពពលកម្មកម្ពុជាចំនួន ៤ នាក់ ទៅសាលាដំបូងខេត្តកំពង់ស្ពឺដែលជាប់ពាក់ព័ន្ធដឹកនាំកម្មករធ្វើបាតុកម្មខុសច្បាប់នៅមុខក្រុមហ៊ុនផលិតកាបូបមួយឈ្មោះ ផាកហេនប៊ែក នៅភូមិត្រពាំងខ្យង ឃុំត្រពាំងគង ស្រុកសំរោងទង ខេត្តកំពង់ស្ពឺកាលពីថៃ្ងទី ៨ ដល់ថ្ងៃទី ១៦ ខែមករា។
លោក សម សាមួន ស្នងការនគរបាលខេត្តកំពង់ស្ពឺបានថ្លែងពីថ្ងៃទី ១៩ ខែមករា ថា សមត្ថកិច្ចជំនាញបានបញ្ជូនជនសង្ស័យទាំង ៤ នាក់នេះទៅសាលាដំបូងខេត្តកំពង់ស្ពឺរួចរាល់ហើយកាលពីថ្ងៃទី ១៧ ខែមករា។ ដោយពួកគេបានដឹកនាំកម្មករធ្វើបាតុកម្មខុសច្បាប់អស់រយៈពេល ៨ ថៃ្ងមកហើយ។
លោកបន្តថា អ្នកដែលត្រូវសមត្ថកិច្ចឃាត់ខ្លួនរួមមាន ទី១- ឈ្មោះ ឌិន សំអាត ភេទប្រុស អាយុ ៤១ ឆ្នាំ តួនាទីប្រធានសហព័ន្ធសហជីពពលកម្មកម្ពុជា និងជាទីប្រឹក្សាអមក្រសួងការងារ ទី២- ឈ្មោះ រឿន សារិន ភេទប្រុស អាយុ ៣៦ ឆ្នាំ តួនាទីមន្ត្រីសហព័ន្ធ ទី៣- ឈ្មោះ យូ សុផាត ភេទប្រុស អាយុ ៣៦ ឆ្នាំ តួនាទីមន្ត្រីសហព័ន្ធ និងទី៤- ឈ្មោះ ឃុត ចាន់ឆៃយ៉ា ភេទប្រុស អាយុ ២៩ ឆ្នាំ តួនាទីមន្ត្រីសហព័ន្ធ។
លោកបញ្ជាក់ថា៖ «សមត្ថកិច្ចយើងបានបញ្ជូនទៅតុលាការខេត្តហើយ»។
លោក វ៉ី សំណាង អភិបាលខេត្តកំពង់ស្ពឺបានថ្លែងប្រាប់ភ្នំពេញប៉ុស្ដិ៍ពីម្សិលមិញថា ការដឹកនាំកម្មករទាមទាររកផលប្រយោជន៍ជូនកម្មករគឺត្រូវបានគាំពារដោយច្បាប់ និងជាសិទ្ធិការទាមទារ ប៉ុន្ដែបុគ្គលទាំង ៤ នាក់ បានបញ្ជាឲ្យបក្ខពួកគេធ្វើការគំរាមកំហែងកម្មករដទៃមិនឲ្យចូលធ្វើការ ហើយបើមានករណីអ្នកលួចចូលទៅចូលធ្វើការ គឺពួកគេវាយកម្មករទាំងនោះ។
លោកបានបន្តថា លើសពីនេះពួកគេបានប្រើពាក្យសម្ដីប្រមាថមើលងាយដល់ក្រុមហ៊ុនអាជ្ញាធរជាសាធារណៈតាមប្រព័ន្ធឧគ្ឃោសនស័ព្ទដាក់ធុងបាស់ ស្រែករារាំង ញុះញង់ មិនឲ្យកម្មករចូលធ្វើការ។ ជាក់ស្ដែងថៃ្ងទី ១៦ ពួកគេបានបញ្ជាឲ្យបក្ខពួករាំងខ្ទប់មិនឲ្យរថយន្ដដឹកបាយជូនកម្មករហូបពេលថៃ្ងត្រង់ ដោយដណ្ដើមយកបាយពីក្នុងរថយន្ដមកជាន់ចោលនៅមុខខ្លោងទ្វារចូលក្រុមហ៊ុន។
លោកបញ្ជាក់ថា៖ «រឿងគាត់តវ៉ាទាមទារលក្ខខណ្ឌការងារពីរោងចក្រ គឺយើងមិនបានថាគាត់ធ្វើខុសច្បាប់ទេ អាហ្នឹងជាសិទ្ធិមាននៅក្នុងច្បាប់ ប៉ុន្ដែហេតុផលដែលយើងចាប់ខ្លួនគាត់ គឺពួកគាត់ធ្វើប្រឆាំងជាមួយមនុស្សជាតិគឺគាត់ទៅទាញបាយកញ្ចប់កម្មករបោះចោល។ ករណីហ្នឹងទាក់ទងការបង្អត់អាហារកម្មករ ហើយសម័យនេះហើយ យើងទៅបង្អត់បាយមនុស្សម៉េចកើត? អ៊ីចឹងនាមយើងអាជ្ញាធរ ត្រូវតែចាត់វិធានការហើយ។ រីឯតុលាការសម្រេចយ៉ាងណានោះ ខ្ញុំអត់ទាន់បានដឹងដំណឹងអ្វីបន្ថែមទៀតទេ»។
លោក ស៊ន វិរៈ អ្នកនាំពាក្យសាលាដំបូងខេត្តកំពង់ស្ពឺកាលពីម្សិលមិញបានបដិសេធធ្វើអត្ថាធិប្បាយជុំវិញការសម្រេច ឬនីតិវិធីរបស់តុលាការ។
លោក ខៃ សម្ភស្ស ព្រះរាជអាជ្ញារងអមសាលាដំបូងខេត្តកំពង់ស្ពឺបានថ្លែងពីម្សិលមិញថា លោកមិនបានកាន់សំណុំរឿងនេះទេ ដូច្នេះលោកមិនអាចនិយាយបានទេ។
ចំណែកលោក ម៉ែន វណ្ណៈ ចៅក្រមស៊ើបសួរសាលាដំបូងខេត្តកំពង់ស្ពឺបានបដិសេធការធ្វើអត្ថាធិប្បាយជុំវិញករណីនេះ ដោយបានបង្វែរសំណួរទៅអ្នកនាំពាក្យតុលាការវិញ។
លោក ចឹក បូរិន ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកំពង់ស្ពឺបានថ្លែងថា លោកបានទទួលដំណឹងនេះហើយ ប៉ុន្ដែលោកមិនមានមតិយោបល់អ្វីជុំវិញករណីនេះទេ ព្រោះសំណុំរឿងបានទៅដល់ដៃតុលាការហើយ។ ដូច្នេះតុលាការជាអ្នកសម្រេចថា ត្រូវឃុំខ្លួន ឬត្រូវដោះលែង។
លោកបញ្ជាក់ថា៖ «ខ្ញុំមិនអាចជួយអ្វីបានទេ ព្រោះសំណុំរឿងទៅដល់ដៃតុលាការហើយ ខ្ញុំគ្រាន់តែអាចឃ្លាំមើល ឬតាមដានស្ថានការវិវឌ្ឍទៅមុខទៀតប៉ុណ្ណោះ»។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា ប្រសិនបុគ្គលនោះត្រូវឃាត់នៅខេត្តណានោះ គួរតែសួរទៅខេត្តនោះផ្ទាល់វិញ ដើម្បីដឹងពីអង្គហេតុច្បាស់លាស់។ ជាទូទៅក្រសួងការងារនឹងឃ្លាំមើលហើយប្រសិនជាមានសំណូមពរពីសាមីខ្លួននោះ ក្រសួងនឹងផ្តល់សេវាផ្នែកច្បាប់ជូន។
លោកបន្តថា ការធ្វើកូដកម្ម និងបាតុកម្មគ្រប់យ៉ាងដែលស្របតាមច្បាប់ និងនីតិវិធីត្រូវតែការពារដោយច្បាប់។ បើមានទោសបែបណានោះមានតែចៅក្រមទើបអាចដឹង និងមានសិទ្ធិសម្រេច។
លោកបញ្ជាក់ថា៖ «ដោយឡែកករណីនេះទាល់តែសួរទៅព្រះរាជអាជ្ញា និងមន្ត្រីដែលអនុវត្តផ្ទាល់ តើការឃាត់ខ្លួនអ្នកទាំង ៤ នាក់ដោយសារមូលហេតុអ្វី។ ខ្ញុំគិតថា មានតែអ្នកដែលចុះអនុវត្តរឿងនេះទេទើបមានព័ត៌មានច្បាស់។ ចំពោះមុខយើងកំពុងសួរនាំ និងតាមដានរឿងនេះដែរ»។
លោក សោម អូន ប្រធានសភាសម្ព័ន្ធសហជីពជាតិកម្ពុជាបានថ្លែងនៅថ្ងៃទី ១៩ ខែមករានេះថាលោកមិនទាន់ដឹងហេតុការណ៍ច្បាស់លាស់ទេ ប៉ុន្ដែលោកបានអំពាវនាវដល់សមត្ថកិច្ច និងតុលាការពិនិត្យមើលសំណុំរឿងនេះ បើសិនជាមិនសូវធ្ងន់ធ្ងរ មិនគួរឃុំខ្លួនពួកគាត់ទាំង ៤ នាក់នេះទេ។
លោកបញ្ជាក់៖ «ជួនកាលកម្មករជាអ្នកធ្វើខុសនីតិវិធី ហេតុនេះចង់ ឬមិនចង់ សហជីពគាត់ត្រូវការពារកម្មករយើង ហើយអាចធ្វើឲ្យគាត់មានជាកំហុសដែរ។ ខ្ញុំគិតថាកំហុសតិច ឬច្រើនជាការអំពាវនាវរបស់ខ្ញុំ សូមឲ្យអាជ្ញាធរក៏ដូចជាប៉ូលិស តុលាការ គួរតែធ្វើការព្រមានណែនាំពួកគាត់ គួរតែកុំឲ្យមានការឃុំខ្លួនពួកគាត់»។
លោក ប៉ាវ ស៊ីណា ប្រធានសហភាពចលនាកម្មករកម្ពុជាបានថ្លែងថា លោកបានដឹងពីការឃាត់ខ្លួនក្រុមសហជីពចំនួន ៤ នាក់ ប៉ុន្ដែលោកមិនបានតាមដានសំណុំរឿងនេះឲ្យបានលម្អិតទេ។
ដោយលោកអះអាងថា ក្រុមសហជីពទាំង ៤ នាក់នេះធ្លាប់បានវាយលោក និងសហការីកាលពីឆ្នាំ ២០១៦ កន្លងទៅក្នុងអំឡុងពេលកម្មករកំពុងតវ៉ាដូចគ្នានេះដែរ។ អ្នកទាំង ៤ នាក់ ធ្លាប់ជាអ្នកដើរវាយកម្មករដែលតវ៉ាទាមទារនៅខាងមុខរោងចក្រ ប៉ុន្ដែមួយរយៈក្រោយមកពួកគាត់បានក្លាយជាមន្ត្រីសហជីពវិញ។
លោកបញ្ជាក់ថា៖ «ក្រុមគាត់ហ្នឹងដើរបង្ករឿងតាមរោងចក្រណាដែលមានកម្មករតវ៉ា គឺគាត់ទៅកកូរកកាយរករឿងកម្មករ»។
លោក យឹម សេរីវឌ្ឍនៈ មន្ត្រីកម្មវិធីជាន់ខ្ពស់នៃមជ្ឈមណ្ឌលសាមគ្គីភាពការងារអន្ដរជាតិ (SC) បានថ្លែងថា លោកមិនទាន់បានដឹងករណីនេះបានស៊ីជម្រៅទេ ប៉ុន្ដែប្រសិនរឿងហេតុពិតដូចការលើកឡើងរបស់អាជ្ញាធរមែន គឺពួកគាត់បានប្រព្រឹត្តផ្ទុយពីច្បាប់ដែលអាជ្ញាធរមានសិទ្ធិទប់ស្កាត់។
បើផ្អែកតាមទិដ្ឋភាពច្បាប់ បើបុគ្គលណាបានបង្កឲ្យខូចខាតសម្ភារ ឬបំផ្លាញអ្វីមួយរបស់អ្នកដទៃគឺគេអាចចាត់ចូលជាអំពើខុសច្បាប់។ ចំពោះករណីនេះអាជ្ញាធរ និងអ្នកពាក់ព័ន្ធគួរតែមានការស៊ើបអង្កេតបន្ថែមទៀត ជាពិសេសត្រូវតែដឹងច្បាស់ពីអង្គហេតុជាមុនសិន។
លោកបញ្ជាក់ថា៖ «ខ្ញុំជំរុញឲ្យភាគីពាក់ព័ន្ធមានការស៊ើបអង្កេតសាជាថ្មីពីអង្គហេតុនេះ ដើម្បីដឹងពីមូលហេតុនៅពីក្រោយករណីនេះ ហេតុអ្វីពួកគាត់ទៅបំផ្លាញបាយរបស់កម្មករដែលនៅក្នុងរថយន្តនោះ? តើមានអ្នកណាបញ្ជាពួកគាត់ដែរឬអត់? តើអាចមានអ្វីផ្សេងទៀតឬអត់ ក្រៅពីការបំផ្លាញបាយកម្មករនេះ? អ៊ីចឹងយើងត្រូវស៊ើបឲ្យបានច្បាស់លាស់ជាងនេះ»។
កម្មករដែលតវ៉ានៅខាងមុខរោងចក្រផលិតកាបូបឈ្មោះ ផាកហេនប៊ែកនោះ មិនទាន់អាចស្វែងរកប្រភពទាក់ទងសុំការបញ្ជាក់ជុំវិញករណីនេះទេ៕