.jpg)
ក្រុមជនសង្ស័យប្លន់ចំនួន ១១ នាក់ក្រោយពេលសមត្ថកិច្ចចាប់ខ្លួនបាន។ រូបថត ប៉ូលិស
កំពង់ស្ពឺៈ ក្រុមជនសង្ស័យ ១១ នាក់ ដែលប្រើដំបង និងដាវឆ្លងពីខេត្តកំពង់ឆ្នាំងមកប្លន់នៅស្រុកឧដុង្គ ខេត្តកំពង់ស្ពឺ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តកំពង់ស្ពឺកាលពីរសៀលម្សិលមិញបន្ទាប់ពីឃាត់ខ្លួនបានជាបន្ដបន្ទាប់ពាក់ព័ន្ធករណីប្លន់ពលរដ្ឋកាលពីថ្ងៃទី ២៣ មករា នៅភូមិក្បាលអូរ ឃុំព្រះស្រែ ស្រុកឧដុង្គ ខេត្តកំពង់ស្ពឺ។
លោក សម សាក់ នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តកំពង់ស្ពឺបានប្រាប់ថា ក្រុមជនសង្ស័យដែលធ្វើសកម្មភាពប្លន់អ្នកដំណើរហើយត្រូវសមត្ថកិច្ចរបស់លោកចាប់ខ្លួនបាននោះ ត្រូវបានកសាងសំណុំរឿងបញ្ជូនទៅសាលាដំបូងខេត្តកំពង់ស្ពឺនៅរសៀលថ្ងៃទី ២៧ មករា។ លោកថា ថ្វីដ្បិតក្រុមជនសង្ស័យរស់នៅខេត្តកំពង់ឆ្នាំងក៏ពិតមែនតែពួកគេបានមកធ្វើសកម្មភាពនៅខេត្តកំពង់ស្ពឺ ដូច្នេះលោកត្រូវបញ្ជូនពួកគេទៅសាលាដំបូងខេត្តកំពង់ស្ពឺ។
លោកប្រាប់ថា៖ «សមត្ថកិច្ចខ្ញុំបានបញ្ចប់នីតិវិធីសាកសួរហើយ ហើយការិយាល័យខ្ញុំបញ្ជូនពួកគេទៅតុលាការនៅរសៀលនេះហើយ (ថ្ងៃទី ២៧ មករា)។ ក្រុមជនសង្ស័យនឹងត្រូវប្រឈមចំពោះមុខច្បាប់ប្រសិនតុលាការរកឃើញនូវទង្វើប្រព្រឹត្តរបស់ពួកគេ»។
លោកបន្តថា នៅថៃ្ងទី ២៣ មករា សមត្ថកិច្ចខេត្តកំពង់ស្ពឺចាប់បានចំនួន ៥ នាក់ ហើយនៅថ្ងៃបន្ទាប់ (២៤ មករា) ចាប់បាន ៦ នាក់ទៀត ដោយពួកគេមានអាយុចន្លោះពី ១៧ ទៅ ២៨ ឆ្នាំ។ រីឯវត្ថុតាងដែលដកហូតបានរួមមានដាវ ១ ដើម ទូរស័ព្ទដៃ ៣ គ្រឿង ម្សៅក្រាមសង្ស័យគ្រឿងញៀន ៣ កញ្ចប់ និងម៉ូតូ ១០ គ្រឿង ក្នុងនោះមានម៉ូតូជនរងគ្រោះចំនួន ៣ គ្រឿងផង។
ដោយឡែក លោក ឃឹម សាមុន អធិការនគរបាលស្រុកឧដុង្គប្រាប់ពីម្សិលមិញដែរថា ការផ្តើមឲ្យមានការចាប់ខ្លួនក្រុមចោរប្លន់ទាំងនេះ ដោយសារកាលពីថ្ងៃទី ២៣ មករា ជនរងគ្រោះឈ្មោះ ឡូញ លី ភេទប្រុស អាយុ ៥០ ឆ្នាំ ជាអ្នកធ្វើស្រែបានជិះម៉ូតូ ១ គ្រឿង តាមផ្លូវលំក្នុងភូមិក្បាលអូរស្ថិតក្នុងឃុំ-ស្រុកខាងលើ។ ពេលនោះមានមនុស្ស ៤ នាក់ជិះម៉ូតូ ២ គ្រឿង ទៅក្បែរម៉ូតូជនរងគ្រោះ ហើយបានយកមួកសុវត្ថិភាពវាយគំរាមជនរងគ្រោះហើយដណ្តើមយកម៉ូតូជិះគេចខ្លួនបាត់។
លោកបន្តថា ក្រោយពីកើតហេតុបានប៉ុន្មាននាទីជនរងគ្រោះបានប្តឹងសមត្ថកិច្ចរបស់លោក ហើយលោកបានរាយការណ៍ទៅលោកឧត្តមសេនីយ៍ទោ សំ សាមួន ស្នងការនគរបាលខេត្តកំពង់ស្ពឺ។ បន្ទាប់មកលោកស្នងការបានបញ្ជាកម្លាំងចុះស្រាវជ្រាវចាប់បានជនសង្ស័យចំនួន ៥ នាក់។ លុះថ្ងៃបន្ទាប់សមត្ថកិច្ចខេត្តកំពង់ស្ពឺបានបន្តស្រាវជ្រាវចាប់បក្ខពួកគេបាន ៦ នាក់ទៀត។
លោកបញ្ជាក់ថា ក្រុមជនសង្ស័យរស់នៅខេត្តកំពង់ឆ្នាំងទាំងអស់ ហើយពួកគេឆ្លើយប្រាប់សមត្ថកិច្ចថា ធ្លាប់បានប្រព្រឹត្តល្មើសនៅ ៤ ស្រុក ជាប់ព្រំប្រទល់ខេត្តកំពង់ឆ្នាំង និងខេត្តកំពង់ស្ពឺគឺស្រុកសាមគ្គីមានជ័យ,ស្រុកកំពង់ត្រឡាច ស្រុកពញាឮ និងស្រុកឧដុង្គ ហើយពួកនេះបានដើរប្លន់បែបនេះជាយូរមកហើយ។
លោកបានបញ្ជាក់ថា៖ «ពួកវាធ្វើសកម្មភាព ១ ជុំជាប់ស្រុកឧដុង្គ ខេត្តកំពង់ស្ពឺ-កំពង់ឆ្នាំង និងស្រុកពញាឮ ខេត្តកណ្តាលតែខាងគេខ្ញុំមិនដឹងទេ សម្រាប់ខាងខ្ញុំបើប្លន់ចាប់ហើយ អត់មានទុកទេ។ ពួកគេទាំងនេះវាប្លន់ផង ឆក់ផង»៕
