ភ្នំពេញៈបញ្ជីឈ្មោះសមាសភាពសម្រាប់គណៈរដ្ឋមន្ត្រីអាណតិ្តទី៦ត្រូវបានបញ្ចេញហើយកាលពីព្រឹកមិញនេះបន្ទាប់ពីសមាជិសភាចូលប្រកាសសុពលភាពនិងស្បថកាលពីម្សិលមិញ។
នៅក្នុងបញ្ជីសមាសភាពរបស់រាជរដ្ឋាភិបាលសម្រាប់នីតិកាលទី៦ នៃរដ្ឋសភាចុះហត្ថលេខាដោយលោកនាយករដ្ឋមន្ត្រីហ៊ុន សែន ដែលភ្នំពេញ ប៉ុស្ដិ៍ ទើបទទួលបានរួមមាន លោក ហ៊ុន សែន ជានាយករដ្ឋមន្ត្រី។ ឧបនាយករដ្ឋមន្ត្រីមាន ១០ រូប គឺលោកស ខេង ,លោកទៀ បាញ់, លោក ហោណាំហុង ,លោកស្រី ម៉ែន សំអន, លោកប៊ិន ឈិន,លោក យឹម ឆៃលី ,លោក កែ គឹមយ៉ាន, លោកប្រាក់ សុខុន, លោកអូន ព័ន្ធមុនីរ័ត្ន និងលោកជា សុផារ៉ា។
ទេសរដ្ឋមន្ត្រីមាន ១៧ រូប រួមមាន លោក ឆាយ ថន ,លោក ប៉ុល សារឿន ,លោក គន់ គីម ,លោក មាស សុភា, លោកចម ប្រសិទ្ធ, លោក ញឹម វណ្ណដា, លោក ស៊ុន ចាន់ថុល ,លោកឱម យ៉ិនទៀង, លោកអៀង ម៉ូលី, លោកវ៉ា គឹមហុង លោក យឹម ណុលឡា, លោក ហ៊ឹម ឆែម ,លោកជិន ប៊ុនស៊ាន ,លោកហូ សិទ្ធី ,លោកឃុន ហាំង ,លោកលី ធុជ និងលោក អូស្មាន ហាស្សាន់។
ចំណែកឯ រដ្ឋមន្ត្រីរួមមាន លោក ប៊ិន ឈិន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី, លោក ស ខេង រដ្ឋមន្ត្រីក្រសួងមហាផ្ទៃ, លោក ទៀ បាញ់ រដ្ឋមន្ត្រីក្រសួងការពារជាតិ, លោកប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ, លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ, លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ។
លោកប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម, លោកចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម, លោកស៊ុយ សែម រដ្ឋមន្ត្រីក្រសួងរ៉ែ និងថាមពល, លោកឆាយ ថន រដ្ឋមន្ត្រីក្រសួងផែនការ, លោកហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា, លោកវង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា, លោកជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់, លោក សាយ សំអាល់ រដ្ឋមន្ត្រីក្រសួងបរិស្ថាន។
លោកលឹម គានហោ រដ្ឋមន្ត្រីក្រសួងធនធានទឹក និងឧតុនិយម,លោកខៀវ កាញារីទ្ធ រដ្ឋមន្ត្រីក្រសួងព័ត៌មាន,លោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌, លោកស្រីម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច, លោកត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍, លោកម៉ម ប៊ុនហេង រដ្ឋមន្ត្រីក្រសួងសុខាភិបាល, លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។
លោកស្រីភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ, លោកថោង ខុន រដ្ឋមន្ត្រីក្រសួងទេសចរណ៍, លោកហ៊ឹម ឆែម រដ្ឋមន្ត្រីក្រសួងធម្មការ និងសាសនា, លោកស្រីអ៊ឹង កន្ថាផាវី រដ្ឋមន្ត្រីក្រសួងកិច្ចការនារី, លោកអ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ,លោក ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈ និងលោកម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល។
បើទោះណាជាសមាសភាពនេះហាក់មិនមានអ្វីខុសប្លែកពីអាណត្តិមុនៗក្ដី ប៉ុន្តែអ្នកនាំពាក្យគណៈរដ្ឋមន្ត្រីលោក ផៃ ស៊ីផាន យល់ថានឹងមានការផ្លាស់ប្ដូរជាវិជ្ជមាន។
លោកបានថ្លែងថា៖« អ្វីៗយើងយល់ឃើញថាត្រូវតែផ្លាស់ប្ដូរ ហើយភាសាផ្លាស់ប្ដូរតំណែងទាំងអស់ហ្នឹងគឺជាសារមួយវិជ្ជមានទេមិនអីទេ។ ក៏ប៉ុន្ដែបើ យើងប្រៀបធៀបលទ្ធផលនៃការបោះឆ្នោតដែលមានប្រជាពលរដ្ឋ ជាង ៧០ ភាគរយក្នុងចំណោមអ្នកបោះឆ្នោតរួមបានគាំទ្របានទទួលស្គាល់សម្ដេចតេជោ បានទទួលស្គាល់រាជរដ្ឋាភិបាល និង បានទទួលស្គាល់ផលវិជ្ជមាននៃដំណើរការបស់រាជរដ្ឋាភិបាលនេះ។ ដូច្នេះ លោកត្រូវគោរពនូវសំឡេងបោះឆ្នោតភាគច្រើនហ្នឹងឯង។ ក៏ប៉ុន្ដែលោកនៅតែមានគំនិតមួយ ដោយលោកតែងតែប្រលយពាក្យថា បើអ្នកអត់ទាន់មានឈ្មោះកុំបារម្ភបានសេចក្ដីថា ជាការទស្សន៍ទាយ និង មានការផ្លាស់ប្ដូរនៅពាក់កណ្ដាលអាណត្ដិឬយ៉ាងម៉េចនោះ ជាសិទ្ធរបស់នាយករដ្ឋមន្រ្ដីសុទ្ធសាធ»៕