.jpg)
ប្រជាសហគមន៍ពេលទទួលសម្ភារបម្រើឲ្យការចុះល្បាតព្រៃពីមន្ត្រីកសិកម្មថ្នីៗនេះ ។ រូបថត ហ្វេសប៊ុក
ព្រះវិហារៈ សហគមន៍ព្រៃឈើចំនួន ១០ ក្នុងខេត្តព្រះវិហារបានប្ដេជ្ញាបន្តចុះល្បាតការពារ និងបង្ក្រាបបទល្មើសព្រៃឈើឲ្យកាន់តែខ្លាំងក្លាឡើងថែមទៀត ពិសេសនៅក្នុងពេលមានពិធីបុណ្យធំៗនាពេលខាងមុខដែលជនល្មើសតែងតែឆ្លៀតឱកាសប្រព្រឹត្តបទល្មើសលួច ខណៈសមត្ថកិច្ចកំពុងមមាញឹកលើការងារសណ្ដាប់ធ្នាប់ និងសុវត្ថិភាពសង្គម ។
ការប្ដេជ្ញានេះបានធ្វើឡើងបន្ទាប់ពីទទួលបានការគាំទ្រ និងលើកទឹកចិត្តពីសមត្ថកិច្ចពាក់ព័ន្ធ ជាពិសេសមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារដែលកាលពីថ្ងៃសុក្រសប្ដាហ៍មុនបាននាំយកសម្ភារប្រើប្រាស់ និងថវិកាមួយចំនួនផ្ដល់ជូនដល់ពួកគេ ដើម្បីលើកទឹកចិត្តចំពោះការរួមចំណែកការពារព្រៃឈើ និងសត្វព្រៃនាពេលកន្លងមក ។
លោក ពុត ឃីម ប្រធានសហគមន៍ព្រៃឈើសំព្រាងព្រៃស្នួលបានប្រាប់ភ្នំពេញប៉ុស្តិ៍កាលពីថ្ងៃចន្ទថា ដើម្បីចូលរួមទប់ស្កាត់បទល្មើសព្រៃឈើ និងសត្វព្រៃសហគមន៍របស់លោកគ្រោងចុះល្បាតព្រៃរយៈពេលពេញ ១ សប្ដាហ៍ដោយចាប់ផ្ដើមពីថ្ងៃទី ៣ នៃពិធីបុណ្យអុំទូកខាងមុខនេះ។
លោកបានបន្តថាតាមបទពិសោធដែលសហគមន៍ជួបប្រទះកន្លងមកនៅថ្ងៃបុណ្យជាតិសំខាន់ៗ ដូចជាបុណ្យចូលឆ្នាំ និងបុណ្យអុំទូក ក្រុមជនប្រព្រឹត្តបទល្មើសតែងតែលួចឆ្មក់ចូលកាប់ឈើ និងដាក់អន្ទាក់សត្វព្រៃក្នុងព្រៃសហគមន៍ ។
លោកបានបញ្ជាក់ថា៖ «យើងមិនបណ្ដោយឲ្យក្រុមជនប្រព្រឹត្តបទល្មើសព្រៃឈើឆ្លៀតឱកាសយកថ្ងៃបុណ្យអុំទូកមកធ្វើសកម្មភាពកាប់បំផ្លាញព្រៃឈើក្នុងសហគមន៍របស់យើងបានទៀតទេ»។
លោក ឃឹម ដែលអះអាងថា ទើបនឹងទទួលបានសម្ភារសម្រាប់គាំទ្រការចុះល្បាតព្រៃពីមន្ទីរកសិកម្មខេត្តកាលពីថ្ងៃសុក្រ រួមមាន អាវភ្លៀង តង់ ពិល ស្បែកជើង សៀវភៅកំណត់ហេតុ ប៊ិក អង្រឹង ក្រមា ឧបករណ៍ GPS និងសម្ភារការិយាល័យមួយចំនួនទៀតនោះបានប្រាប់ទៀតថា បញ្ហាប្រឈមរបស់សហគមន៍គឺការប្រើប្រាស់ឧបករណ៍ GPS ក្នុងការកំណត់ទីតាំងនៃបទល្មើសដោយសារពួកគាត់នៅមិនទាន់ចេះប្រើឧបករណ៍នេះ។
ទោះជាយ៉ាងណាលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារបានថ្លែងកាលពីថ្ងៃចន្ទថា លោកនឹងបញ្ជូនមន្ត្រីជំនាញចុះជួយបង្រៀនដល់ប្រជាសហគមន៍ទាំងនោះឲ្យចេះប្រើនូវឧបករណ៍ទាំងនេះ។
លោក សុខុម បានបញ្ជាក់ថា៖ «ក្នុងអំឡុងពេលនៃការចុះល្បាតព្រៃខាងមុខនេះ មន្ត្រីរបស់យើងនឹងបង្ហាញពីរបៀបប្រើប្រាស់ឧបករណ៍ GPS ដល់ពួកគាត់នៅលើទីតាំងជាក់ស្ដែងមានន័យថា ពេលជួបប្រទះបទល្មើសយើងនឹងកត់ត្រា និងថតរូបភាពបញ្ជាក់ពីទីតាំងនៃបទល្មើសតាមប្រព័ន្ធ GPS នេះតែម្ដង»។
លោក ស័ក្ដិ ឧត្តម ប្រធានសហគមន៍ព្រៃឈើបុស្សគិរីមានជ័យបានប្រាប់ភ្នំពេញប៉ុស្តិ៍ដែរថា សម្ភារដែលទទួលបានពីមន្ទីរកសិកម្មខេត្តព្រះវិហារនោះ នៅមិនទាន់ឆ្លើយតបតាមតម្រូវការជាក់ស្ដែងរបស់សហគមន៍ទេ។
លោកថា៖ «ទោះជាបែបណាក្ដី អំណោយជាសម្ភារទាំងនោះគឺជាកម្លាំងចលករមួយក្នុងការលើកទឹកចិត្តដល់សហគមន៍របស់យើងក្នុងការពង្រឹងកិច្ចការពារព្រៃឈើឲ្យនៅគង់វង្ស សម្រាប់មនុស្សជំនាន់ក្រោយ។
គួរបញ្ជាក់ថាកាលពីថ្ងៃសុក្រលោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារបានយកថវិកា និងសម្ភារមួយចំនួនដែលគាំទ្រដល់ការចុះល្បាតព្រៃទៅជូនសហគមន៍ព្រៃឈើចំនួន ១០ ក្នុងស្រុករវៀង និងស្រុកឆែបដើម្បីលើកទឹកចិត្ត និងជំរុញដល់ពួកគេបន្តចូលរួមឲ្យកាន់តែសកម្មថែមទៀតក្នុងកិច្ចការពារធនធានធម្មជាតិនៅកម្ពុជា។
សហគមន៍ព្រៃឈើទាំងនោះរួមមាន ភ្នំដែក ចំបក់ហោះ ដីក្រហម ភ្នំរយថ្នល់កោង សំព្រាង ព្រៃស្នួល ថ្នល់កែង ត្រពាំងផ្ចឹក បុស្សគិរី និងបុស្សគិរីមានជ័យ ៕
