.jpg)
សកម្មភាពបំបួសដើមឈើនៅព្រៃព្រះរកាកាលពីថ្ងៃទី ១២ មករា ។ រូបថត សហការី
ព្រះវិហារ: ក្រុមបណ្ដាញសហគមន៍ព្រៃព្រះរកា និងព្រះសង្ឃចំនួន ១៣២ នាក់/អង្គមកពីស្រុកចំនួន ៣ ក្នុងខេត្តព្រះវិហារបានរៀបចំពិធីបែបសាសនាបំបួសដើមឈើរាប់ពាន់ដើមនៅកណ្ដាលព្រៃព្រះរកាកាលពីថ្ងៃទី ១០-១២ ខែមករា ដើម្បីរំឭកគុណអ្នកបូជាជីវិតក្នុងការការពារព្រៃឈើ ព្រមទាំងបំផុសស្មារតីឲ្យមានកិច្ចសហការគ្នាក្នុងការថែរក្សាព្រៃព្រះរកាដែលនៅសេសសល់ឲ្យបានគង់វង្ស។
លោក ហែត ណៃ តំណាងបណ្ដាញសហគមន៍ព្រៃព្រះរកានៅស្រុកត្បែងមានជ័យបានប្រាប់ភ្នំពេញប៉ុស្ដិ៍កាលពីថ្ងៃអាទិត្យថា ពិធីបុណ្យបំបួសដើមឈើនេះត្រូវបានរៀបចំឡើងដោយពលរដ្ឋ និងសមាជិកបណ្ដាញសហគមន៍ព្រៃព្រះរកាដោយមានទាំងព្រះសង្ឃដែលរស់នៅក្នុងស្រុកចំនួន ៣ នៃខេត្តព្រះវិហារគឺស្រុកត្បែងមានជ័យ ស្រុកឆែប និងស្រុកជាំក្សាន្ត។
លោកបន្តថា បណ្ដាញសហគមន៍បានដាក់លិខិតអញ្ជើញឲ្យចូលរួមពីខាងបណ្ដាញសហគមន៍ព្រៃឡង់ មន្ត្រីពីស្ថាប័នរដ្ឋពាក់ព័ន្ធនៅក្នុងខេត្ត ដូចជា អភិបាលខេត្ត អភិបាលស្រុក អាជ្ញាធរមូលដ្ឋាន និងមន្ត្រីពីមន្ទីរបរិស្ថានខេត្ត រួមទាំងក្រុមអង្គការសង្គមស៊ីវិលមួយចំនួនផងដែរ ប៉ុន្ដែជាក់ស្ដែងការមកចូលរួមមានតែមន្ត្រីរដ្ឋបាលព្រៃឈើចំនួន ៦ នាក់ និងមន្ត្រីអង្គការសង្គមស៊ីវិលព្រមទាំងប្រជាសហគមន៍មួយចំនួនប៉ុណ្ណោះ។
លោក ណៃ បានបញ្ជាក់ថា៖ «ដើមឈើដែលត្រូវបំបួសហ្នឹងគឺមានរាប់ពាន់ដើម ទាំងតូច ទាំងធំ ដែលនៅសល់ពីជនល្មើសបានកាប់ដើម្បីការពារបានខ្លះ។ យើងថា បំផ្លាញអស់ចុះអាធំៗ ប៉ុន្តែយើងខ្លាចជនខិលខូចទៅកាប់ និងទន្ទ្រានយកដីធ្វើចម្ការយកអាតូចៗទៀត អ៊ីចឹងយើងខ្លាចអស់ទាំងអាតូចៗហ្នឹងទៀត»។
លោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារកាលពីថ្ងៃអាទិត្យបានបដិសេធធ្វើអត្ថាធិប្បាយជុំវិញការបំបួសដើមឈើនេះ ដោយលោកអះអាងថា មិនទាន់មានរបាយការណ៍ច្បាស់លាស់ពីមន្ត្រីដែលបានទៅចូលរួមក្នុងកម្មវិធីនោះ។
លោកបញ្ជាក់ថា៖ «ខ្ញុំអត់មានមតិយោបល់អ្វីទេ ចាំមន្ត្រីខ្ញុំដែលគាត់បានទៅចូលរួមកម្មវិធីនេះផ្ញើរបាយការណ៍មកខ្ញុំសិន។ ខ្ញុំក៏អត់មានរបាយការណ៍អំពីការរកឃើញបទល្មើសក្នុងព្រៃនេះកាលពីអំឡុងក្នុងឆ្នាំ ២០១៩ ដែរ»។
លោក ប៊ុន សឿង នាយកដែនជម្រកព្រៃព្រះរកានៃខេត្តព្រះវិហារបានថ្លែងពីថ្ងៃអាទិត្យដែរថា លោក និងមន្ត្រីនៃដែនជម្រកព្រៃព្រះរកា ៦ នាក់បានទៅចូលរួមក្នុងកម្មវិធីនេះ។ លោកចាត់ទុកកម្មវិធីនេះថាល្អដើម្បីពញ្ញាក់ស្មារតីពលរដ្ឋ និងយុវជនឲ្យស្រឡាញ់ដើមឈើដែលជាប្រភពធនធានធម្មជាតិ។
លោកបញ្ជាក់ថា៖ «យើងបានទៅចូលរួមជាមួយប្រជាសហគមន៍យើងច្រើន គឺកម្មវិធីហ្នឹងសប្បាយ ហើយបានដាស់ស្មារតីពលរដ្ឋ និងយុវជនជួយការពារព្រៃឈើយើងឲ្យបានគង់វង្ស។ ព្រៃព្រះរកាយើងសព្វថ្ងៃនេះ គឺមិនមានករណីកាប់បំផ្លាញព្រៃឈើទៀតទេ គឺស្ងាត់ហើយ ដោយសារយើងចូលរួមទាំងអស់គ្នា»។
លោក ឡោ ចាន់ មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តព្រះវិហារបានថ្លែងថា លោកគាំទ្រឲ្យមានកម្មវិធីនេះ ព្រោះវាក៏អាចជួយលើកទឹកចិត្តពលរដ្ឋឲ្យចូលរួមការពារព្រៃឈើ ប៉ុន្ដែលោកជំរុញឲ្យមន្ត្រីអនុវត្តច្បាប់ឲ្យបានតឹងរ៉ឹងដើម្បីទប់ស្កាត់ការបន្តបំផ្លាញព្រៃឈើទៀត។
លោកបន្តថា តំបន់ព្រៃព្រះរកាគេអាចចាត់ទុកថាជាតំបន់ព្រៃចុងក្រោយដែលនៅសេសសល់ពីក្រុមឈ្មួញខិលខូចកាប់បំផ្លាញ។ ដូច្នេះមន្ត្រីពាក់ព័ន្ធគួរសហការជាមួយប្រជាសហគមន៍ឲ្យបានជិតស្និទ្ធ ដើម្បីកុំឲ្យតំបន់ព្រៃឈើចុងក្រោយរបស់កម្ពុជារលាយហិនហោច។
លោកបញ្ជាក់ថា៖ «ការដែលពលរដ្ឋសហគមន៍គាត់នាំគ្នាបំបួសដើមឈើនេះ គឺជាការល្អម្យ៉ាងរបស់ពួកគាត់ហើយ តែអ្វីដែលត្រូវតែធ្វើឲ្យល្អជាងនេះ គឺមន្ត្រីពាក់ព័ន្ធត្រូវតែអនុវត្តច្បាប់ឲ្យបានតឹងរ៉ឹងត្រូវតែបង្ក្រាបបទល្មើសទាំងព្រៃឈើ ទាំងការកាប់រុករានដីព្រៃ ទាំងការបរបាញ់សត្វព្រៃជាដើម។ ការបំបួសនេះ គ្រាន់តែជាការរៀបចំតាមជំនឿសាសនាទេ ដោយពួកគាត់គិតថា ដើមឈើទាំងឡាយណាដែលត្រូវបានបំបួសរួច ប្រសិនមានអ្នកកាប់ អ្នកនោះនឹងជាប់បណ្ដាសា»។
គួររំឭកថា ព្រៃព្រះរកាមានទំហំ ៩ ម៉ឺនហិកតាស្ថិតក្នុងស្រុកឆែប ស្រុកត្បែងមានជ័យ និងស្រុកជាំក្សាន្ត ខេត្តព្រះវិហារត្រូវបានរដ្ឋាភិបាលប្រកាសបង្កើតជាដែនជម្រកសត្វព្រៃព្រះរកា ដើម្បីការពារធម្មជាតិ ខណៈព្រៃនេះគឺជាទីជម្រកចម្រុះដែលគាំទ្រដល់ការរស់នៅរបស់សត្វដែលរងការគំរាមកំហែងជាង ២៨ ប្រភេទដូចជា ត្រយងយក្ស និងត្រយងចង្កំកសដែលជាប្រភេទសត្វរងគ្រោះជិតផុតពូជបំផុត និងថនិកសត្វប្រភេទជិតផុតពូជ ៧ ប្រភេទផ្សេងទៀតដូចជា ទោចមកុដ រមាំង និងទន្សោង ជាដើម ៕
