.jpg)
មន្ត្រីក្នុងពេលចូលរួមសម្ពោធសារមន្ទីរធម្មជាតិសកល សម្ដេច ហ៊ុន សែន កាលពីព្រឹកមិញ។ រូបថតៈ ហ្វេសប៊ុក
ព្រះវិហារៈ សារមន្ទីរធម្មជាតិសកលសម្តេចតេជោហ៊ុនសែនព្រះវិហារ ដែលបង្ហាញពីវប្បធម៌ចម្រុះនៅកម្ពុជា ត្រូវបានសម្ពោធជាផ្លូវការនៅថ្ងៃនេះ ក្រោមអធិបតីភាពលោកឧបនាយករដ្ឋមន្ត្រី ប៊ិន ឈិន បន្ទាប់ពីចំណាយពេលស្ថាបនាអស់ ១០ ឆ្នាំ នៅលើផ្ទៃដី ១៧៧
ហិកតាក្នុងស្រុកជាំក្សាន្ត ខេត្តព្រះវិហារ និងមានអគារចំនួន ១១ ខ្នង ក្នុងបរិវេណនោះ ។
លោក សំ ពិសិដ្ឋ ប្រធានសារមន្ទីរនេះបានថ្លែងថា ការបង្កើតសារមន្ទីរនេះបានកើតឡើង ក្នុងអំឡុងពេលមានសង្គ្រាមជាមួយប្រទេសជិតខាង ហើយវត្ថុបំណងគឺដើម្បីបង្ហាញឲ្យពិភពលោកមើលឃើញថា កម្ពុជាមិនត្រូវការសង្គ្រាមទេ តែត្រូវការសន្តិភាព។
លោកបានបន្ដថា ក្រៅពីនេះក៏ដើម្បីអភិរក្សបេតិកភណ្ឌរបស់ជាតិ និងជាស្ពានចម្លងដែលផ្ទេរចំណេះដឹងពីអតីតកាលឲ្យទៅមហាជន តាមរយៈមកទស្សនានិងសិក្សាស្រាវជ្រាវនៅសារមន្ទីរនេះ ក៏ដូចជា អប់រំផ្សព្វផ្សាយដល់មហាជនឲ្យមានស្មារតីស្រឡាញ់មរតករបស់ខ្លួននិងផ្សព្វផ្សាយចេញទៅខាងក្រៅបន្តទៅទៀត។
បើតាមលោក ពិសិដ្ឋ សារមន្ទីរនេះមានការចូលរួមជួយផ្នែកបច្ចេកទេសពីអង្គការ UNESCO ខណៈថវិកាចំណាយដោយរាជរដ្ឋាភិបាលកម្ពុជា ពិសេសគឺថវិកាផ្ទាល់របស់លោកនាយករដ្ឋមន្ត្រី ហើយមួយចំនួនទៀតបានមកពីសប្បរសជនជាតិនិងអន្តរជាតិ។
យ៉ាងណាក្ដីលោក សំ ពិសិដ្ឋ បានថ្លែងថា លោកមិនបានដឹកពីចំនួនទឹកប្រាក់ដែលត្រូវចំណាយនោះទេ។ លោកបានបញ្ជាក់ថា៖ «ក្នុងនាមជាអ្នកគ្រប់គ្រងមួយរូបលោកមិនបានដឹងច្បាស់ពីរឿងនេះឡើយ»។
ប៉ុន្តែបើតាម លោក ប៊ិន ឈិន ដែលបានថ្លែងដោយផ្អែកលើរបាយការណ៍ក្រសួងវប្បធម៌ថា ការចំណាយបានប្រើ ថវិកា ៧៥៣ ៤២៧ ដុល្លារ។
ចំពោះដំណើរការសាងសង់មានបញ្ហាប្រឈមជាច្រើនរួមមាន បញ្ហាព្រំដែនជាមួយប្រទេសជិតខាង, កង្វះសម្ភារនិងកម្មករសំណង់និងបញ្ហាទីតាំងរបស់សារមន្ទីរនៅក្នុងតំបន់ដាច់ស្រយាលជាដើម។នេះបើតាមលោកសំ ពិសិដ្ឋ។
លោកបានបន្ថែមថា សារមន្ទីរនេះខុសប្លែកពីសារមន្ទីរដទៃនៅត្រង់វាមិនផ្តោតលើប្រធានបទតែមួយក្នុងការដាក់បង្ហាញសាធារណជនឡើយតែវានឹងមានដាក់បង្ហាញជាមួយវត្ថុជាច្រើនរួមមាន បុរាណវត្ថុ,ប្រវត្តិសាស្ត្រក្នុងតំបន់បេតិកភណ្ឌដទៃទៀតទាំងក្នុងនិងក្រៅប្រទេស,ប្រភេទសត្វនិងរុក្ខជាតិកម្រនៅក្នុងតំបន់ក៏ដូចជាវប្បធម៌និងការរស់នៅរបស់ជនជាតិភាគតិចជាពិសេសជនជាតិកួយជាដើម។
អ្នកស្រី អេននី ឡឺម៉ាយត្រេ តំណាងអង្គការ UNESCO បានថ្លែងថា នេះជាសារមន្ទីរមួយដែលបង្ហាញពីវប្បធម៌ចម្រុះនៅកម្ពុជា ហើយក៏ជាសារមន្ទីរជាតិពន្ធុសាស្ត្រទីមួយនៅកម្ពុជាផងដែរ ៕ អ៊ុក សុន្ទថារ័ត្ន
