.jpg)
លោក កឹម សុខា អតីតប្រធានអតីតគណបក្សសង្គ្រោះជាតិ ជិះរថយន្តបន្ទាប់ពីសវនាការកាលពីថ្ងៃម្សិលមិញ។ ហេង ជីវ័ន
ភ្នំពេញៈ សាលាដំបូងរាជធានីភ្នំពេញពេញកាលពីថ្ងៃពុធម្សិលមិញបានចាប់ផ្តើមបើកសវនាការសំណុំរឿងលោក កឹម សុខា ក្រោមការចោទប្រកាន់ពីបទ «សន្ទិដ្ឋភាពជាមួយបរទេស» ដោយតុលាការបានចាក់បញ្ចាំងឃ្លីបវីដេអូដាក់បន្ទុករយៈពេល ២ នាទីតែលោក កឹម សុខា បានបដិសេធការចោទប្រកាន់ និងដាក់ភ័ស្តុតាងថ្មី។
លោក កឹម សុខា ត្រូវបានចាប់ខ្លួនកាលពីខែកញ្ញា ឆ្នាំ ២០១៧ ហើយត្រូវបានចោទប្រកាន់ពីបទក្បត់ជាតិ ឬសន្ទិដ្ឋភាពជាមួយបរទេសតាមមាត្រា ៤៤៣ នៃក្រមព្រហ្មទណ្ឌ។ លោក កឹម សុខា ប្រឈមជាប់ពន្ធនាគារអតិបរមា ៣០ ឆ្នាំបើសិនតុលាការរកឃើញថា មានទោសកំហុស។ សំណុំរឿងរបស់លោកពាក់ព័ន្ធនឹងសុន្ទរកថា ដែលលោកធ្វើឡើងកាលពីឆ្នាំ ២០១៣ នៅប្រទេស អូស្ត្រាលី។
លោក គី តិច មេធាវីរដ្ឋាភិបាលបានថ្លែងបន្ទាប់ពីសវនាការថា តុលាការបានដំណើរការសវនាការដោយរលូន។
លោកបន្តថាមានសាក្សីសរុបចំនួន ២៧ រូប ប៉ុន្តែព្រឹកម្សិលមិញមានតែ ១២ រូបទេ ដែលមានវត្តមាន ខណៈ ១៥ រូបទៀតអវត្តមានដោយគ្មានមូលហេតុច្បាស់លាស់។ លោកថាក្រុមមេធាវីការពារក្ដីរបស់លោក កឹម សុខា បានផ្ដល់ USB តូចមួយទៅតុលាការដោយសុំឲ្យចាក់វីដេអូឃ្លីបរយៈពេលជាង ១ ម៉ោង។ ការស្នើសុំនេះធ្វើឡើងបន្ទាប់ពីតុលាការបានចាក់វីដេអូឃ្លីបរយៈពេល ២ នាទីអំពីសំឡេងរបស់លោក សុខា ដែលថ្លែងនៅប្រទេសអូស្ត្រាលី។
លោក គី តិច បន្តថា៖ «លោក កឹម សុខា បានឆ្លើយនៅមុខតុលាការថា លោកទទួលស្គាល់សំឡេង និងរូបភាពថាជារបស់គាត់ពិតប្រាកដមែន។ កឹម សុខា គ្រាន់តែដាក់ឃ្លីបវីដេអូមួយផ្សេងទៀតដោយសុំឲ្យក្រុមប្រឹក្សាជំនុំជម្រះទទួល ហើយសុំឲ្យចាក់វីដេអូឃ្លីបហ្នឹងដែរ ប៉ុន្ដែ សុំបញ្ជាក់ថាគាត់គ្រាន់តែថា (វីដេអូ) នោះកាត់ជាកង់ៗ។ ប៉ុន្តែរាល់សំឡេង និងរូបភាពលោក កឹម សុខា ទទួលស្គាល់ថា ពិតជារបស់គាត់មែន»។
រថយន្តលោក កឹម សុខា ត្រូវអ្នកកាសែតតាមថត។ហុង មិនា
លោក គី តិច បញ្ជាក់ថា លោកសុំឲ្យមានការពិនិត្យជាមុនសិនទៅលើ USB របស់ក្រុមមេធាវីការពារក្ដីលោក សុខា ដើម្បីសុវត្ថិភាព ព្រោះវាអាចបង្កបញ្ហាសន្តិសុខក្នុងសវនាការ ឬប៉ះពាល់ដល់កុំព្យូទ័ររបស់តុលាការ។
ទោះយ៉ាងណាក្រុមប្រឹក្សាជំនុំជម្រះបានសម្រេចទទួលយកភ័ស្តុតាងថ្មីរបស់លោក កឹម សុខា ហើយនឹងចាក់បញ្ចាំងនៅសវនាការថ្ងៃក្រោយ។
លោកថា៖ «ដោយសារសំណុំរឿងនេះមានពាក់ព័ន្ធនឹងបរទេសគឺមានប្រទេសចំនួន ៩ ហើយក៏មានពាក់ព័ន្ធនឹងអង្គការមួយចំនួនហើយក៏ពាក់ព័ន្ធនឹងបុគ្គលបរទេសមួយចំនួនទៀត។ ក្នុងគោលបំណងការពារទំនាក់ទំនងរវាងប្រទេសកម្ពុជាយើងជាមួយបណ្ដាប្រទេសផ្សេងៗក្នុងនាមមេធាវីតំណាងរដ្ឋាភិបាលបានដាក់សំណើសុំឲ្យក្រុមប្រឹក្សាទទួលយកការដាក់តាងដោយអក្សរ»។
លោកបន្តថា តុលាការយល់ព្រមឲ្យសរសេរអក្សរកាត់ចំពោះឈ្មោះប្រទេសពាក់ព័ន្ធនៅក្នុងសាលក្រម ប៉ុន្តែអោយសរសេរឈ្មោះប្រទេសទាំងនោះពេញនៅក្នុងកំណត់ហេតុតុលាការ ព្រោះជាឯកសារផ្ទៃក្នុងដែលមិនប៉ះពាល់ដល់ទំនាក់ទំនងប្រទេសកម្ពុជា និងប្រទេសផ្សេងទៀត។
លោកបញ្ជាក់ថា ប្រទេសដែលមានឈ្មោះនៅក្នុងសំណុំរឿងនេះរួមមាន ឥណ្ឌូនេស៊ី យូហ្គោស្លាវី ស៊ែប៊ី អូស្ត្រាលី សហរដ្ឋអាមេរិក កាណាដា សហភាពអឺរ៉ុប តៃវ៉ាន់ ឥណ្ឌា និងប្រទេសអង្គការផ្សេងទៀត។ «ខ្ញុំជាមេធាវីតំណាងរាជរដ្ឋាភិបាលជាដើមបណ្តឹងរដ្ឋប្បវេណីមានភ័ស្តុតាងប្រហែលបងប្អូនយើងមិនបានយកមក យកដាក់ឡានអស់ហើយ។ យើងមានភ័ស្តុតាង ដើម្បីបញ្ជាក់បញ្ហានេះមាន ២ វាលិសធំៗ និងមានកាតាបយួរប្រហែលម្នាក់ ២ បើនិយាយរឿងភ័ស្តុតាងនេះគឺថា ដឹកទាំងគូទឡានតែម្តង។ ភ័ស្តុតាងនេះយើងនឹងតតាំងបង្ហាញជូនក្រុមប្រឹក្សាជំនុំជម្រះ សាលាដំបូងរាជធានីភ្នំពេញ ដើម្បីឲ្យការសម្រេចដោយយុត្តិធម៌ឲ្យគូភាគី»។
លោកបន្តថា៖ «ខាងយើងខ្ញុំក៏ដូចជាតំណាងអយ្យការមានភ័ស្តុតាងច្រើនសន្ធឹកសន្ធាប់ ដើម្បីបញ្ជាក់ជូនក្រុមប្រឹក្សាជំនុំជម្រះឲ្យបានដឹងថា កំហុស និងអំពើប្រព្រឹត្តរបស់លោក កឹម សុខា ត្រូវទទួលខុសត្រូវក្នុងផ្លូវច្បាប់កម្រិតណា?»។ លោកបញ្ជាក់ថាការលើកឡើងថា សំណុំរឿងនេះជារឿងនយោបាយនោះ គឺជាការអះអាងរបស់គេ ប៉ុន្តែវាជាការអនុវត្តច្បាប់ព្រហ្មទណ្ឌតាមមាត្រា ៤៤៣ នៃក្រមព្រហ្មទណ្ឌ។
លោកថា តុលាការមិនមែនកំពុងដំណើរការរឿងនយោបាយទេ។ លោកបានបញ្ជាក់ទៀតថា រយៈពេលកំណត់នៃសវនាការមិនអាចកំណត់បានទេ អាស្រ័យលើស្ថានភាពជាក់ស្ដែង ព្រោះភាគីទាំង ២ ត្រូវការដេញដោលឲ្យបានច្បាស់។
លោកស្រី ម៉េង សុភារី មេធាវីមួយរូបរបស់លោក កឹម សុខា បានប្រាប់ឲ្យដឹងថា លោក កឹម សុខា បានច្រានចោលការចោទប្រកាន់របស់តំណាងអយ្យការ។ ពាក់ព័ន្ធនឹងវីដេអូឃ្លីប ២ នាទី លោកស្រីថ្លែងថា លោក កឹម សុខា បានបដិសេធវីដេអូឃ្លីបនោះ ព្រោះវីដេអូឃ្លីបនោះត្រូវបានកាត់តជាកង់ៗ រួចហើយយកមកផ្គុំជាប់គ្នា។ «ដោយសារវីដេអូនោះមិនបានឆ្លុះបញ្ចាំងពីខ្លឹមសារពិតប្រាកដអ៊ីចឹងឯកឧត្ដម កឹម សុខា បានដាក់បញ្ចូលភ័ស្តុតាងក្នុងសវនាការ គឺវីដេអូពេញទាំងមូលដែលគាត់ថ្លែងនៅប្រទេសអូស្ត្រាលីកាលពីឆ្នាំ ២០១៣ មានរយៈពេលជាង ១ ម៉ោង»។
លោក ចាន់ ចេន មេធាវីម្នាក់ទៀតរបស់លោក កឹម សុខា បានថ្លែងថា នាពេលរសៀល តុលាការបានសាកសួរលើអង្គហេតុតែបានបែងចែកដំណាក់កាលសួរដេញដោលពីឆ្នាំ ១៩៩៣ ដល់ឆ្នាំ ២០០៧ ក្នុងនោះក៏បានសាកសួរអំពីការបង្កើតមជ្ឈមណ្ឌលសិទ្ធិមនុស្សកម្ពុជាផងដែរ។ ទោះយ៉ាងណាលោក ចាន់ ចេន បញ្ជាក់ថា សំណុំរឿងលោក កឹម សុខា គឺជារឿងនយោបាយហើយស្នើឲ្យដោះស្រាយតាមការជជែកនយោបាយ។
កាលពីម្សិលមិញលោក កឹមសុខា ក៏បានបង្ហោះសារនៅលើហ្វេសប៊ុករបស់លោកហើយបដិសេធទាំងស្រុងនូវការចោទប្រកាន់មកលើរូបលោកពីបទសន្ទិដ្ឋភាពជាមួយបរទេស។
លោកសរសេរថា៖ «ខ្ញុំមិនបាននាំរដ្ឋបរទេស ឬភ្នាក់ងារបរទេសណាមកប្រទូសរ៉ាយ ឬឈ្លានពាន ព្រះរាជាណាចក្រកម្ពុជាឡើយ។ ខ្ញុំមិនបានប្រព្រឹត្តដូចការចោទនេះទេ ជាពិសេសខ្ញុំមិនបានប្រព្រឹត្តនូវអំពើទាំងឡាយណាដែលនាំឲ្យប៉ះពាល់ដល់ផលប្រយោជន៍ប្រទេសជាតិឡើយ»។ លោកបានស្នើឲ្យតុលាការទម្លាក់ចោលបទចោទប្រកាន់ទៅលើរូបលោក។
មិនអាចសុំការបញ្ជាក់ពីមន្ត្រីតុលាការជុំវិញដំណើរការសវនាការនេះបានទេ ខណៈអ្នកកាសែតមិនត្រូវបានគេអនុញ្ញាតឲ្យចូលស្តាប់ក្នុងសវនាការឡើយ ហើយលោក កឹម សុខា ក៏ត្រូវបានសមត្ថកិច្ចរារាំងមិនឲ្យក្រុមអ្នកកាសែតជួបសម្ភាសលោកដែរនៅពេលដែលលោកចូល និងចេញពីតុលាការ។
ប៉ុន្តែបើតាមលោក គី តិច សវនាការនឹងបន្តនៅថ្ងៃនេះពេញ ១ ថ្ងៃទៀត ហើយតុលាការនឹងបន្តបើកសវនាការនៅរៀងរាល់ថ្ងៃពុធ និងថ្ងៃព្រហស្បតិ៍រៀងរាល់សប្តាហ៍ដោយមិនទាន់ដឹងពីពេលវេលាជាក់លាក់ដែលថានឹងត្រូវបិទបញ្ចប់នៅពេលណានោះឡើយ៕
វីដេអូ៖
