.jpg)
លោក សម រង្ស៊ី នៅឯព្រលានយន្តហោះអន្តរជាតិភ្នំពេញ កាលពីឆ្នាំ ២០១៥។ ហេង ជីវ័ន
ភ្នំពេញៈ សាលាដំបូងរាជធានីភ្នំពេញ កាលពីរសៀលម្សិលមិញបានប្រកាសសាលក្រមលើសំណុំរឿងចំនួន ២ ដោយសម្រេចផ្ដន្ទាទោសលោក សម រង្ស៊ី ដាក់ពន្ធនាគារកំណត់ ៤ ឆ្នាំ សម្រាប់បទល្មើសនីមួយនិងផាកពិន័យសរុប ២០ លានរៀល ព្រមទាំងបញ្ជាឲ្យសមត្ថកិច្ចចាប់ខ្លួនលោកបញ្ជូនទៅពន្ធនាគារ។
ការសម្រេចសាលក្រមនេះធ្វើឡើងដោយ លោក រស់ ពិសិដ្ឋ ចៅក្រមជំនុំជម្រះនៃសាលាដំបូងរាជធានីភ្នំពេញទៅលើសំណុំ រឿងចំនួន ២ ប្រឆាំង លោក សម រង្ស៊ី គឺបទ «ញុះញង់កុំឲ្យយោធិនស្ដាប់បង្គាប់ និងធ្វើឲ្យខូចទឹកចិត្តកងទ័ព» និងបទ «ប្រមាថចំពោះអង្គព្រះមហាក្សត្រ» ក្រោយពីបានបើកសវនាការជំនុំជម្រះកាលពីថ្ងៃទី ២២ ខែមេសាកន្លងទៅ។
លោក រស់ ពិសិដ្ឋ ថ្លែងក្នុងសវនាការថា៖ «ផ្ដន្ទាទោសឈ្មោះ សម រង្ស៊ី កើតថ្ងៃទី ១០ មីនា ១៩៤៩ ដាក់ពន្ធនាគារកំណត់ ៤ ឆ្នាំ និងពិន័យជាប្រាក់ ១០ លានរៀល ពីបទញុះញង់កុំឲ្យយោធិនស្ដាប់បង្គាប់ និងធ្វើឲ្យខូចទឹក ចិត្តកងទ័ព ប្រព្រឹត្តកាលពីថ្ងៃទី ៥ ខែ ធ្នូ ឆ្នាំ ២០១៧ តាមមាត្រា ៤៧១ និង ៤៧២ នៃក្រមព្រហ្មទណ្ឌ។ បង្គាប់ឲ្យចាប់ខ្លួន និងឃុំខ្លួនឈ្មោះ សម រង្ស៊ី មកដាក់ពន្ធនាគារ»។
ចំពោះបទចោទ «ប្រមាថចំពោះអង្គព្រះមហាក្សត្រ» លោក រស់ ពិសិដ្ឋ បានសម្រេចដូចគ្នា គឺឲ្យលោក សម រង្ស៊ី ជាប់ពន្ធនាគារ ៤ ឆ្នាំ និងផាកពិន័យជាប្រាក់ ១០ លានរៀល ព្រមទាំងបញ្ជាដល់អាជ្ញាធរមានសមត្ថកិច្ចចាប់ និងបញ្ជូនខ្លួនលោក សម រង្ស៊ី ទៅឃុំនៅពន្ធនាគារ។
ករណីញុះញង់កុំឲ្យយោធិនស្ដាប់បង្គាប់ ត្រូវបានកងយោធពលខេមរភូមិន្ទប្តឹងលោក សម រង្ស៊ី ក្រោយពេលលោកបានអំពាវនាវតាមហ្វេសប៊ុករបស់លោក ឲ្យកងកម្លាំងប្រដាប់អាវុធឈប់ស្ដាប់បង្គាប់មេដឹកនាំរបស់ពួកគេកាលពីថ្ងៃទី ៥ ធ្នូ ឆ្នាំ ២០១៧ ដោយលោកថ្លែងថា៖ «សូមកងកម្លាំងប្រដាប់អាវុធ ពលទាហាន និងនគរបាលកុំធ្វើតាមបញ្ជាពីមេដឹកនាំផ្តាច់ការបើគេបញ្ជាឲ្យបាញ់ប្រហារ និងសម្លាប់ប្រជាពលរដ្ឋស្លូតត្រង់»។
ចំពោះបទប្រមាថអង្គព្រះមហាក្សត្រវិញ ក្រសួងយុត្តិធម៌បានចេញអធិបញ្ជាឲ្យអយ្យការអមសាលាដំបូងរាជធានីភ្នំពេញចាត់វិធានការផ្លូវច្បាប់ ចំពោះការអះអាងរបស់លោក សម រង្ស៊ី ដែលថា លិខិតព្រះមហាក្សត្រ ដែលអំពាវនាវឲ្យពលរដ្ឋទៅបោះឆ្នោត គឺជាលិខិត «ក្លែងក្លាយ» ឬត្រូវធ្វើឡើង «ក្រោមការគំរាមកំហែង»។
លោក ឈុំ សុជាតិ អ្នកនាំពាក្យរបស់ក្រសួងការពារជាតិថ្លែងថា លោកមិនមានយោបល់អ្វីទេ ស្រេចតែលើតុលាការជាអ្នកសម្រេចទៅចុះ។
លោក វង្ស ភក្តី មេធាវីតំណាងដើមបណ្ដឹងគឺកងយោធពលខេមរភូមិន្ទ ក៏ដូចជា លោក សំ សុគង់ ដែល ការពារក្តីលោក សម រង្ស៊ី ក្នុងសំណុំរឿងញុះញង់កងទ័ព មិនអាចសុំការអត្ថាធិប្បាយបានទេកាលពីម្សិលមិញ។
ប៉ុន្តែកាលពីថ្ងៃទី ២២ ខែ មេសា លោក វង្ស ភក្តី បានស្នើសុំឲ្យតុលាការកាត់ទោសលោក សម រង្ស៊ី ក្នុងកម្រិតអតិបរមា ស្របពេលដែល លោក សំ សុគង់ បានស្នើសុំឲ្យតុលាការទម្លាក់បទចោទ ដោយអះអាងថា លោក សម រង្ស៊ី គ្រាន់តែអំពាវនាវឲ្យកងទ័ពកុំសម្លាប់ប្រជាពលរដ្ឋស្លូតត្រង់ប៉ុណ្ណោះ។
លោក សម រង្ស៊ី បានថ្លែងតាមអុីមែលកាលពីម្សិលមិញថា៖ «វាជាកិត្តិយសដែលត្រូវបានកាត់ទោសឲ្យជាប់ពន្ធនាគារធ្ងន់ធ្ងរក្រោមប្រទេសផ្តាច់ការចំពោះការធ្វើសកម្មភាពនយោបាយដោយសន្តិវិធី។ វាបានបង្ហាញថា អ្នកជាអ្នកប្រយុទ្ធដើម្បីសេរីភាពពិតប្រាកដ»៕
