.jpg)
លោក ឃួង ស្រេង អភិបាលរាជធានីភ្នំពេញក្នុងកិច្ចប្រជុំពីថ្ងៃចន្ទ។ រូបថត សហការី
ភ្នំពេញៈ សាលារាជធានីភ្នំពេញបានត្រៀមកងកម្លាំង និងវិធានការផ្សេងៗទុកជាមុន ដើម្បីការពារសន្តិសុខសណ្តាប់ធ្នាប់នៅក្នុងព្រះរាជពិធីបុណ្យអុំទូក អកអំបុក បណ្តែតប្រទីប សំពះព្រះខែ ដែលគ្រោងធ្វើឡើងរយៈពេល ៣ ថ្ងៃគឺចាប់ពីថ្ងៃទី ១០ ទី ១១ និងទី ១២ ខែវិច្ឆិកាខាងមុខ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍កាលពីថ្ងៃអង្គារថា ដើម្បីឱ្យពិធីបុណ្យអុំទូកធានាបាននូវភាពឱឡារិក និងសប្បាយរីករាយ បញ្ហាសន្តិសុខក៏ត្រូវបានធានាជាមួយគ្នាដែរ ហើយក្នុងកម្រិតណានោះគឺជា «ការងារសន្តិសុខផ្ទៃក្នុង»។
លោកថ្លែងថា៖ «គឺយើងរៀបចំទាំងកងកម្លាំង ទាំងមធ្យោបាយ ដើម្បីនឹងកសាងផែនការចែកជាតំបន់ កន្លែងណាមនុស្សច្រើន។ ការពាររបៀបម៉េច? កន្លែងណាមនុស្សតិចនៅក្នុងភូមិសាស្ត្រកណ្តាលក្រុងរបៀបម៉េច? ភូមិសាស្ត្រនៅជាយក្រុងរបៀបម៉េច។ ភូមិសាស្ត្រនៅតាមច្រកសម្រាប់ចេញចូលទាំង ៦ ផ្លូវជាតិរបស់យើងទាំងសន្តិសុខផង ទាំងចរាចរណ៍ផង របៀបម៉េចៗ។ យើងកំពុងគិតគូរបញ្ហាទាំងអស់ហ្នឹងហើយ»។
លោកបានបន្តថា៖ «បងប្អូនប្រជាពលរដ្ឋយើងធានាចុះ អត់ពិបាកអីទេ។ យើងសប្បាយអបអរព្រះរាជពិធីបុណ្យអុំទូករបស់យើង ប្រពៃណីរបស់យើងទៅ»។
កាលពីថ្ងៃចន្ទលោក ឃួង ស្រេង អភិបាលរាជធានីភ្នំពេញបានដឹកនាំកិច្ចប្រជុំដើម្បីត្រៀមលក្ខណៈរៀបចំពិធីបុណ្យអុំទូកដែលមានការចូលរួមពីរដ្ឋបាលខណ្ឌទាំង ១៤ មន្ទីរអង្គភាពជំនាញ អាជ្ញាធរពាក់ព័ន្ធទាំងអស់ដើម្បីរៀបចំសណ្ដាប់ធ្នាប់សាធារណៈ និងរក្សាសន្តិសុខ និងសុវត្ថិភាពជូនប្រជាពលរដ្ឋ។ នេះបើតាមហ្វេសប៊ុកសាលារាជធានីភ្នំពេញដែលបង្ហោះកាលពីថ្ងៃចន្ទ។
លោក មាសភក្តី បន្ថែមថាក្រោយពីឧប្បត្តិហេតុរត់ជាន់គ្នានៅលើស្ពានកោះពេជ្រកាលពីឆ្នាំ ២០១០ មកអាជ្ញាធររាជធានីភ្នំពេញបានដកស្រង់បទពិសោធនេះ និងយកទៅគិតគូរបន្ថែម ដើម្បីឱ្យមានភាពកាន់តែលម្អិត និងច្បាស់លាស់ទៅលើប្រព័ន្ធ ឬផែនការការពារសន្តិសុខ សុវត្ថិភាពដល់ប្រជាពលរដ្ឋដែលមកចូលរួមសប្បាយនៅក្នុងពិធីបុណ្យនេះ។
លោកថ្លែងថា៖ «ចុះបងប្អូនរបស់យើង លោកត្រូវធ្វើយ៉ាងម៉េចក្នុងការចូលរួមលើបញ្ហាសន្តិសុខហ្នឹង។ ទី១ បើករណីមានការជួបប្រទះសង្ស័យអ្វី សមត្ថកិច្ចរបស់យើងច្រើនណាស់ដែលយើងពង្រាយនៅក្នុងពិធី។ អ៊ីចឹងលោកគ្រាន់តែជួយជូនដំណឹងមក។ សមត្ថកិច្ចលោកឃើញលោកចាត់វិធានការ»។ អ្នកនាំពាក្យរូបនេះរំពឹងថា ឆ្នាំនេះប្រជាពលរដ្ឋនឹងមកចូលរួមកម្សាន្តពិធីបុណ្យនេះគគ្រឹកគគ្រេង និងអធិកអធម។
លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពបានថ្លែងកាលពីថ្ងៃអង្គារថាបញ្ហាសណ្តាប់ធ្នាប់ និងការថែរក្សាសន្តិសុខ គឺជារឿងសំខាន់ដែលអាជ្ញាធរត្រូវតែគិតមុនគេ ហើយរឿងដែលខ្វល់ខ្វាយសំខាន់ជាងគេគឺភាពចង្អៀតណែន។ អាជ្ញាធរត្រូវតែមានវិធានការទាន់ពេលវេលា គឺត្រូវធ្វើយ៉ាងម៉េច ដើម្បីដោះស្រាយបញ្ហានេះ និងមានសមត្ថភាពក្នុងការគ្រប់គ្រងស្ថានការណ៍ជាក់ស្តែងដែលមិនធ្វើឱ្យមានចលាចល។
លោកបានបញ្ជាក់ថា៖ «កងកម្លាំងសមត្ថកិច្ចហ្នឹង ធ្វើយ៉ាងណាគឺដាក់ពង្រាយ ហើយនិងធ្វើប្រតិកម្មឱ្យបានទាន់ពេលវេលាដែរ ហើយនិងមានមេក្រូដែលអាចប្រកាសបញ្ជាក់ពីភាពអាសន្នថា អ៎! រឿងដែលកើតឡើងហ្នឹងវាអត់មានទេ។ កុំជ្រួលច្របល់អី!»។
លោក យ៉ង់ គិមអេង បន្តថាចំពោះបញ្ហាចោរលួច ចោរឆក់ ក៏ត្រូវមានកម្លាំងសមត្ថកិច្ចដើម្បីជួយឃ្លាំមើលផងដែរ ដើម្បីឱ្យប្រជាពលរដ្ឋមកចូលរួមពិធីបុណ្យនេះដោយសុខសាន្តដោយមិនមានក្តីបារម្ភ។
លោកបន្តថា ក្រៅពីនេះសមត្ថកិច្ចក៏ត្រូវឃ្លាំមើលផងដែរនូវសន្តិសុខនៅមូលដ្ឋានជាក់ស្តែង ខណៈដែលប្រជាពលរដ្ឋមិនបាននៅផ្ទះ ដោយនាំគ្នាមកចូលរួមសប្បាយក្នុងពិធីបុណ្យនេះ។ «ផ្ទះរបស់ពួកគាត់ច្រើនតែឮថាត្រូវបានចោរលួចគាស់ផ្ទះ និងកាត់សោផ្ទះជាដើម»៕
