.jpg)
ការចូលរួមក្នុងសិក្ខាសាលារបស់មន្ត្រីមកពីប្រទេសក្នុងតំបន់នៅខេត្តសៀមរាបពីម្សិលមិញ។ ARMAC
សៀមរាប: ក្រសួងការបរទេស និងសហប្រតិបត្តិការអន្តរជាតិដោយគាំទ្រពីមូលនិធិជប៉ុនសម្រាប់សមាហរណកម្មអាស៊ាន (Japan-ASEAN Integration Fund-JAIF 2.0) បានរៀបចំសិក្ខាសាលាមួយក្រោមប្រធានបទ «ការលើកកម្ពស់កិច្ចប្រឹងប្រែងតាមតំបន់ដើម្បីដោះស្រាយបញ្ហាសំណល់ជាតិផ្ទុះពីសង្គ្រាមតាមរយៈវិធីសាស្ត្រចម្រុះ» ដើម្បីដោះស្រាយនិងលុបបំបាត់បញ្ហាសំណល់ជាតិផ្ទុះសល់ពីសង្គ្រាមក្នុងតំបន់ឲ្យមានប្រសិទ្ធភាព។
សិក្ខាសាលានេះ ត្រូវធ្វើឡើងរយៈពេល ២ ថ្ងៃចាប់ពីថ្ងៃទី ២២-២៣ មេសា នៅខេត្តសៀមរាប ដោយមានការចូលរួមពីឥស្សរជនសំខាន់ៗក៏ដូចជាតំណាងស្ថានទូតជប៉ុនប្រចាំកម្ពុជា នាយកប្រតិបត្តិរបស់មជ្ឈមណ្ឌល ARMAC លោកអភិបាលរងខេត្តសៀមរាប និងគណៈប្រតិភូជាង ១០០ នាក់មកពីបណ្តាប្រទេសសមាជិកអាស៊ានទាំង ១០ តំណាងមកពីមជ្ឈមណ្ឌលតំបន់អាស៊ានសម្រាប់សកម្មភាពមីន។
លោក កាន់ ផារិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិដែលជាតំណាងកម្ពុជា និងជាអនុប្រធាននៃគណៈកម្មាធិការអចិន្រៃ្តយ៍របស់មជ្ឈមណ្ឌល ARMAC បានថ្លែងថា សិក្ខាសាលានេះមានគោលបំណងជំរុញកិច្ចសហប្រតិបត្តិការតំបន់នៅក្នុងអាស៊ានដើម្បីដាក់ឲ្យដំណើរការយ៉ាងពេញលេញនៃមជ្ឈមណ្ឌល ARMAC សំដៅលើកកម្ពស់កិច្ចសហប្រតិបត្តិការក្នុងចំណោមអង្គការតំបន់ និងអន្តរជាតិពាក់ព័ន្ធនានាដោះស្រាយ និងលុបបំបាត់បញ្ហាសំណល់ជាតិផ្ទុះពីសង្គ្រាមប្រកបដោយប្រសិទ្ធភាពក្នុងតំបន់។
លោកបានបន្តថា កម្មវិធីនេះក៏ជាផ្នែកមួយក្នុងការលើកកម្ពស់ការយល់ដឹងឲ្យកាន់តែប្រសើរអំពីកិច្ចសហប្រតិបត្តិការតំបន់ស្តីពីសកម្មភាពពាក់ព័ន្ធនឹងសកម្មភាពមីន និងការផ្តល់វេទិកាសម្រាប់ការសន្ទនា និងចែករំលែកមេរៀនដែលទទួលបាន និងការអនុវត្តល្អបំផុតដើម្បីយល់ដឹងកាន់តែប្រសើរអំពីការសម្របសម្រួលក្នុងតំបន់ប្រកបដោយប្រសិទ្ធភាពក្នុង ការដោះស្រាយបញ្ហា។
លោកបញ្ជាក់ថា៖ «ខ្ញុំជឿថាប្រធានបទនៃការពិភាក្សាទាំងអស់មានជាប់ទាក់ទងយ៉ាងជ្រាលជ្រៅទៅនឹងគោលបំណងរបស់ ARMAC និងការប្តេជ្ញាចិត្តរបស់អាស៊ានក្នុងការលើកកម្ពស់សន្តិភាព មនុស្សធម៌ សន្តិសុខ និងការអភិវឌ្ឍប្រកបដោយចីរភាព»។
លោក នង សាកល អនុរដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិបានថ្លែងថា កន្លងមកនេះ រដ្ឋាភិបាលកម្ពុជាបានបង្ហាញពីសមិទ្ធផល បទពិសោធ ក៏ដូចជាកិច្ចប្រឹងប្រែងរបស់កម្ពុជាក្នុងការដោះស្រាយបញ្ហាប្រឈមនៃមីននិងសំណល់ជាតិផ្ទុះពីសង្គ្រាម។
លោកបន្តថា សិក្ខាសាលានេះ បានរួមចំណែកបន្ថែមទៀត ដើម្បីពង្រឹងនិងពង្រីកកិច្ចសហប្រតិបត្តិការយូរអង្វែងតាមរយៈការភ្ជាប់ទំនាក់ទំនងយ៉ាងសកម្មរវាងអាស៊ាននិងដៃគូអភិវឌ្ឍន៍របស់ខ្លួន។
លោក នង សាកល បញ្ជាក់ថា៖ «ខ្ញុំថា ARMAC គឺជាអង្គភាពក្នុងតំបន់ដែលត្រូវបានបង្កើតឡើងដោយមេដឹកនាំអាស៊ាន។ គ្រប់គ្នានៃរដ្ឋជាសមាជិកអាស៊ានមានកម្មសិទិ្ធរបស់ ARMAC។ ដូច្នេះខ្ញុំឆ្លៀតឱកាសនេះ ដើម្បីលើកទឹកចិត្តដល់ការចូលរួមនិងការចូលរួមយ៉ាងសកម្មរបស់រដ្ឋសមាជិកអាស៊ានទាំងអស់ និងដៃគូសន្ទនារបស់អាស៊ាននិងភាគីខាងក្រៅចំពោះបុព្វហេតុបេសកកម្មរបស់ ARMAC និងនិរន្តរភាព»។
លោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអគ្គលេខាធិការអាជ្ញាធរមីនបានថ្លែងក្នុងជំនួបពិភាក្សាការងារជាមួយលោកស្រី Cristian Munduate ប្រធានអង្គការ UNICEF ប្រចាំនៅកម្ពុជាកាលពីថ្ងៃទី ១០ ខែមេសាថា ការខិតខំប្រឹងប្រែងរបស់រាជរដ្ឋាភិបាលកម្ពុជារួមជាមួយដៃគូអភិវឌ្ឍបានឆ្លើយតបយ៉ាងសកម្មចំពោះតម្រូវការផ្នែកមនុស្សធម៌ និងការអភិវឌ្ឍដោយធ្វើការបោសសម្អាតផ្ទៃដីមានមីនជាច្រើនម៉ឺនហិកតាជូនដល់សហគមន៍មូលដ្ឋាន។
លោកបានស្នើសុំឲ្យអង្គការ UNICEF បង្កើនកិច្ចសហការបន្ថែមទៀតជាមួយអាជ្ញាធរមីនពិសេសជួយគាំទ្រផ្នែកបច្ចេកទេស និងថវិកាសម្រាប់គាំទ្រដល់ការកាត់បន្ថយគ្រោះថ្នាក់ដោយសារមីននៅកម្ពុជា។
តាមសេចក្ដីប្រកាសព័ត៌មានរបស់អាជ្ញាធរមីនចុះថ្ងៃទី ១៥ ខែ មីនា ឲ្យដឹងថា ថ្មីៗនេះអត្រាគ្រោះថ្នាក់ដែលបណ្ដាលមកពីការផ្ទុះមីន និងគ្រាប់មានការកើនឡើងគួរឲ្យកត់សម្គាល់។ ចាប់ពីខែមករា ដល់ថ្ងៃទី ៤ ខែ មេសា ឆ្នាំ ២០១៩ មានជនរងគ្រោះស្លាប់ ពិការ និងរបួសដោយសារគ្រាប់មីនសរុបចំនួន ៤៤ នាក់ ក្នុងនោះមានជនរងគ្រោះនៅខេត្តឧត្តរមានជ័យ បាត់ដំបង រតនគិរី ត្បូងឃ្មុំ និងខេត្តមួយចំនួនទៀត៕
