.jpg)
សិស្សជាប់និទ្ទេស A ថតសែលហ្វីជាមួយលោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញ។ រូបថត ហ្វេសប៊ុក SPM
ភ្នំពេញៈ លោកនាយករដ្ឋមន្ត្រី ហ៊ុន សែន បញ្ជាក់ពីម្សិលមិញថាចំនួនសិស្សដែលប្រឡងជាប់ មធ្យមសិក្សាទុតិយភូមិ ឬបាក់ឌុបឆ្នាំនេះកើនឡើងជាង ១ ភាគរយ ច្រើនជាងកាលពីឆ្នាំមុននោះ គឺមិនមែនមកពីការបន្ធូរបន្ថយការប្រឡងនោះទេ។ សិស្សបានខិតខំប្រឹងប្រែងរៀនតាំងពីក្រោមទៅ មិនមែនចាំដល់ថ្ងៃជិតប្រឡងទើបពួកគេខំប្រឹងប្រែងរៀននោះទេ។
ថ្លែងនៅក្នុងពិធីជួបសំណេះសំណាល និងផ្តល់រង្វាន់លើកទឹកចិត្តដល់សិស្សនិទ្ទេស A ចំនួន ៤៤៣ នាក់ កាលពីថ្ងៃចន្ទ នាវិមានសន្តិភាព លោកនាយករដ្ឋមន្ត្រី ហ៊ុន សែន បានបញ្ជាក់ថា ការពង្រឹងគុណភាពប្រឡងបាក់ឌុបនៅតែបន្ត ហើយការកែទម្រង់ការប្រឡងបានជះឥទ្ធិពលប្រតិសកម្មយ៉ាងខ្លាំងដល់ការខិតខំប្រឹងប្រែងរបស់សិស្ស។
សិស្សប្រឡងជាប់ចំនួនជាង ៦៨ ភាគរយនេះ ច្រើនជាងឆ្នាំមុនដែលមានជាង ៦៧ ភាគរយនោះ គឺអាចចាត់ទុកថាជាការឆ្លុះបញ្ចាំងពីការខិតខំប្រឹងប្រែងរបស់គ្រូបង្រៀន មាតាបិតា អាណាព្យាបាល និងជាពិសេសសិស្សានុសិស្សផ្ទាល់។ ឪពុកម្តាយបារម្ភខ្លាចកូនរបស់ខ្លួនប្រឡងធ្លាក់ទើបជំរុញឱ្យកូនប្រឹងប្រែងរៀនសូត្រតាំងពីដើមទី។
លោក ហ៊ុន សែន ថ្លែងថា៖ «ការកើនឡើងនេះមិនមែនបានន័យថា ស្ទូចពិន្ទុនោះទេ។ ស្តង់ដាប្រឡងកម្រិតស្អីៗគឺនៅដដែល។ ក៏ប៉ុន្តែចំនួនសិស្សដែលពូកែ ហើយប្រឡងចូលដល់កម្រិតអាត្រូវជាប់នោះគឺមានចំនួនជាង ១ ភាគរយ»។
លោកបន្តថា បន្ទាប់ពីកំណែទម្រង់ប្រឡងបាក់ឌុបឆ្នាំដំបូងគឺឆ្នាំ ២០១៤ ការប្រឡងបាក់ឌុបធ្វើឡើង ២ ដង។ ការប្រឡងលើកទី ១ មានសិស្សជាប់តែ ២៥ ភាគរយ ដែលមានចំនួនតិចណាស់ ហើយប្រឡងលើកទី ២ មានអ្នកជាប់តែ ១៧ ភាគរយហើយសិស្សមាននិទ្ទេស A តែ ១១ នាក់ប៉ុណ្ណោះ។
ក្នុងឆ្នាំ ២០១៥ សិស្សប្រឡងជាប់មាន ៥៥ ភាគរយ ដែលមាននិទ្ទេស A ១០៨ នាក់។ ឆ្នាំ ២០១៦ កើនឡើងដល់ ៦២ ភាគរយដែលនិទ្ទេស A កើនដល់ ៤០៥ នាក់។ ឆ្នាំ ២០១៧ មាន ៦៣ ភាគរយ ដែលនិទ្ទេស A មាន ៤២៤ នាក់។ ប៉ុន្តែនៅឆ្នាំ ២០១៨ ដែលមាន ៦៧ ភាគរយ នៃសិស្សប្រឡងជាប់ច្រើនជាងឆ្នាំមុន បែរជាសិស្សប្រឡងជាប់និទ្ទេស A ធ្លាក់មកនៅត្រឹម ៤០៨ នាក់ទៅវិញ។
លោក ហ៊ុន សែន ក៏បានផ្តល់ជូនសិស្សនិទ្ទេស A ទាំង ៤៤៣ នាក់ ដែលក្នុងម្នាក់ៗទទួលបានថវិកា ២ លានរៀល សៀវភៅអប់រំទូន្មាន ២ ក្បាល ដែលជាសៀវភៅ ភិរម្យ អ៊ូ (ក្រម ង៉ុយ) និងបណ្ឌិត អ៊ូ ចុង iPad ១ គ្រឿង កាក់ស្លឹងខ្មែរដែលបោះពុម្ពឆ្នាំ ១៥១៤ និងបានស្រាវជ្រាវយកពីប្រទេស ហូឡង់ មកវិញចំនួន ១ និងកាក់មាសដែលជាព្រះរាជអំណោយរបស់ព្រះករុណាសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាចំនួន ១ ។ នេះបើតាមការប្រកាសក្នុង Facebook របស់លោក ហ៊ុន សែន កាលពីថ្ងៃចន្ទ។
សិស្សប្រឡងជាប់បាក់ឌុប និទ្ទេស A ចូលជួបលោក ហ៊ុន សែន ពីម្សិលមិញ នាវិមានសន្តិភាព។ រូបថត SPM
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្តិ៍កាលពីថ្ងៃចន្ទថា សិស្សនិទ្ទេស A ក៏ទទួលបានក្រដាសប្រាក់ថ្មី ១៥ ០០០ រៀល ២ សន្លឹកម្នាក់ផងដែរ។ ក្រៅពីនេះសិស្សនិទ្ទេស A បានទទួលឱកាសអាហារូបករណ៍តាមរយ:ក្រសួងអប់រំ និងប្រភពផ្សេងៗ។
លោកថ្លែងថា៖ «នៅតាមខេត្តនានាក៏មានការផ្តល់រង្វាន់លើកទឹកចិត្តទៅតាមគណៈគ្រប់គ្រងខេត្តនីមួយៗ។ ឧទាហរណ៍ ខេត្តខ្លះគាត់មានជូនម៉ូតូ។ ខេត្តខ្លះគាត់មានជូនវត្ថុអនុស្សាវរីយ៍ផ្សេងៗទៅតាមខេត្តនីមួយៗ»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានប្រាប់ភ្នំពេញប៉ុស្តិ៍កាលពីថ្ងៃចន្ទថា ថ្នាក់ដឹកនាំត្រូវតែមានតួនាទីគ្រប់បែបយ៉ាងក្នុងការលើកទឹកចិត្តដល់យុវជន និងត្រូវតែរកការងារល្អៗដល់យុវជន ហើយយុវជនត្រូវតែមានចំណេះដឹងមួយទៀត។
លោកស្រី អ៊ុក ឆាយ៉ាវី បានថ្លែងថា៖ «សំខាន់នោះត្រូវតែធ្វើយ៉ាងណាឱ្យសិស្សានុសិស្សស្រឡាញ់ប្រទេសជាតិខ្លួនឯង។ កុំឱ្យគ្រាន់តែថវិកាប៉ុណ្ណឹង គាត់អត់បានយកចិត្តទុកដាក់ដល់ប្រទេសជាតិខ្លួនឯង»។
ការប្រឡងបាក់ឌុបឆ្នាំ ២០១៩ ធ្វើឡើង ២ ថ្ងៃចាប់ពីថ្ងៃ ១៩ ដល់ ២០ ខែសីហា ដែលមានបេក្ខជនជិត ១២០ ០០០ នាក់ហើយអ្នកដែលប្រឡងជាប់មានជិត ៨០ ០០០ នាក់។ បន្ទាប់ពីប្រកាសលទ្ធផល ១ ថ្ងៃទាំងសិស្សប្រឡងធ្លាក់ និងជាប់ប្រមាណជាង ១៥០ នាក់ បាននាំគ្នាមកតវ៉ានៅក្រសួង អប់រំ ដើម្បីទាមទារឱ្យក្រសួងពិនិត្យលទ្ធផលឡើងវិញដើម្បីឱ្យបានលទ្ធផលជាប់ និងនិទ្ទេសកើនឡើង។ ក្រោយមកក្រសួងបានបញ្ចប់ការដោះស្រាយនូវការតវ៉ារបស់បេក្ខជនដោយរក្សាលទ្ធផលដូចដើម៕
