.jpg)
កុមារ កំពុងកាន់ប៊ិកសរសេរនៅក្នុងថ្នាក់រៀនមួយកន្លែងនាពេលកន្លងមក។ ហុង មិនា
ភ្នំពេញៈ រាជរដ្ឋាភិបាលស៊ុយអ៊ែត និងអង្គការយូនីសេហ្វបានចុះហត្ថលេខាលើកិច្ចព្រមព្រៀងជាមួយក្រសួងអប់រំ យុវជន និងកីឡាលើការអនុវត្តគម្រោងភាពជាដៃគូ ដើម្បីគាំទ្រដល់ការអប់រំសម្រាប់កុមារនៅកម្ពុជាប្រកបដោយគុណភាព និងបរិយាប័ន្នក្នុងទំហំថវិកា ៨,៣ លានដុល្លារអាមេរិក រយៈពេល ៤ ឆ្នាំ (២០២០ ដល់ ២០២៣)។ ការចុះកិច្ចព្រមព្រៀងនេះត្រូវបានចុះហត្ថលេខាដោយលោក Bjorn Haggmark ឯកអគ្គរាជទូតនៃប្រទេសស៊ុយអែតប្រចាំព្រះរាជាណាចក្រកម្ពុជា និងតំណាងអង្គការយូនីសេហ្វក្រោមអធិបតីភាពលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡានៅទីស្ដីការក្រសួងអប់រំ យុវជន និងកីឡាកាលពីថ្ងៃពុធ ទី ១៩ ខែកុម្ភៈនេះ។
សេចក្ដីប្រកាសព័ត៌មានរួមនៃការអនុវត្ដគម្រោងភាពជាដៃគូនេះនឹងត្រូវអនុវត្តក្នុងរយៈពេល ៤ ឆ្នាំ ដើម្បីផ្ដល់ការគាំទ្រដោយផ្ទាល់ដល់កំណែទម្រង់ជាអាទិភាព និងកម្មវិធីនានាក្នុងវិស័យអប់រំដូចដែលត្រូវបានដាក់ចេញក្នុងផែនការយុទ្ធសាស្ត្រវិស័យអប់រំ ២០១៩-២០២៣ នៃក្រសួងអប់រំ យុវជន និងកីឡា។ ភាពជាដៃគូនេះនឹងរួមចំណែកដល់ការសម្រេចគោលដៅអភិវឌ្ឍន៍ប្រកបដោយចីរភាពរបស់កម្ពុជា ដូចជាគោលដៅពាក់ព័ន្ធនឹងគុណភាពនៃការអប់រំ និងបរិយាប័ន្ន សមភាពយេនឌ័រ ក៏ដូចជាសុខភាព អាហារូបត្ថម្ភ ទឹកស្អាត អនាម័យនៅតាមសាលារៀនដែលផ្ដល់អត្ថប្រយោជន៍ដល់កុមារាកុមារី ជាពិសេសកុមារដែលកំពុងជួបការលំបាកឱ្យអាចសម្រេចសក្ដានុពលរបស់ពួកគេ។
លោក ហង់ជួន ណារ៉ុន បានថ្លែងថា វិស័យអប់រំត្រូវបានចាត់ទុកជាវិស័យមានសារៈសំខាន់ខ្ពស់ក្នុងក្របខ័ណ្ឌអាទិភាពនៃការអភិវឌ្ឍជាតិរបស់ប្រទេសកម្ពុជាដោយវិស័យអប់រំត្រូវបានចាត់ទុកជាកត្តាដ៏សំខាន់សម្រាប់ជំរុញការបង្កើនគុណភាពរបស់ធនធានមនុស្ស និងកំណើនសេដ្ឋកិច្ច។
លោករដ្ឋមន្ដ្រីបន្ថែមថា តាមរយៈភាពជាដៃគូថ្មីជាមួយនឹងប្រទេស ស៊ុយអែត និងយូនីសេហ្វនេះក្រសួងអប់រំ យុវជន និងកីឡានឹងបន្តពង្រឹងប្រព័ន្ធអប់រំ ដើម្បីអាចឆ្លើយតបកាន់តែមានប្រសិទ្ធភាពចំពោះតម្រូវការការអប់រំរបស់កុមារគ្រប់រូបនៅកម្ពុជា។
លោក Bjorn Haggmark បានទទួលស្គាល់ពីភាពជាដៃគូដ៏សំខាន់ និងមានលក្ខណៈយូរអង្វែងរវាងក្រសួងអប់រំ យុវជន និងកីឡា ប្រទេស ស៊ុយអែត និងយូនីសេហ្វ ក្នុងកិច្ចសហការគ្នា ដើម្បីលើកកម្ពស់គុណភាព និងបរិយាប័ន្ននៃការអប់រំនៅកម្ពុជា។
លោកបន្តថា៖ «ប្រទេស ស៊ុយអែត មានសេចក្ដីសោមនស្សរីករាយក្នុងការធ្វើជាដៃគូរយៈពេលវែងជាមួយនឹងយូនីសេហ្វ និងក្រសួងអប់រំ យុវជន និងកីឡា ក្នុងការកសាងឡើងវិញ និងពង្រឹងប្រព័ន្ធអប់រំនៅកម្ពុជា។ តាមរយៈការបន្តភាពជាដៃគូនេះយើងនឹងបន្តជួយដល់កុមារគ្រប់រូបនៅកម្ពុជា ជាពិសេសកុមារមកពីក្រុមជនជាតិដើមភាគតិច កុមារមានពិការភាព និងកុមារមកពីតំបន់ជនបទ និងតំបន់ក្រីក្រក្នុងទីប្រជុំជនដើម្បីឱ្យពួកគេអាចទទួលបានការអប់រំប្រកបដោយគុណភាពបរិយាប័ន្ន និងសមធម៌»។
លោកថាភាពជាដៃគូនេះក៏នឹងចូលរួមចំណែកដើម្បីជួយឱ្យប្រទេសកម្ពុជា អាចសម្រេចអាទិភាពនៃការអភិវឌ្ឍជាតិ និងគោលដៅអភិវឌ្ឍន៍ប្រកបដោយចីរភាព។
លោកស្រី គ្រីស្ទៀន ម៉ុនឌ័តេ នាយិកាយូនីសេហ្វប្រចាំប្រទេសកម្ពុជាបានឲ្យដឹងថា កុមារជាច្រើននាក់នៅកម្ពុជានៅតែបន្តទទួលបានលទ្ធផលសិក្សាទាបក្នុងសាលារៀន ដោយសារមូលហេតុជាច្រើនដូចជាបរិយាកាសបង្រៀន និងរៀននៅមានគុណភាពទាបជាដើម។ ភាពជាដៃគូនេះក៏នឹងជួយឱ្យកុមារ និងក្មេងជំទង់ដែលមានសមត្ថភាព និងមានសាវតារសង្គមខុសៗគ្នាអាចទទួលបានការអប់រំប្រកបដោយបរិយាប័ន្ន គុណភាព និងឆ្លើយតបតាមតម្រូវការដើម្បីឱ្យពួកគេអាចអភិវឌ្ឍ និងសម្រេចបានសក្ដានុពលរបស់ខ្លួនបាន៕
