មណ្ឌលគិរីៈ ស្រី្តជាជនសង្ស័យម្នាក់ត្រូវបានចាប់ខ្លួន និងបញ្ជូនទៅតុលាការថ្ងៃនេះ ពាក់ព័ន្ធនឹងការបំផ្ទុះអាវុធបណ្តាលឱ្យប្តីប្រពន្ធ ២ នាក់ស្លាប់កាលពីថ្ងៃទី ៧ ខែកញ្ញានៅភូមិរវ៉ាក់ ឃុំរយ៉ ស្រុកកោះញែក ខេត្តមណ្ឌលគិរី ខណៈបុរសជនសង្ស័យជាប្តីកំពុងត្រូវបានសមត្ថកិច្ចតាមចាប់ខ្លួនពាក់ព័ន្ធនឹងការបាញ់សម្លាប់ខាងលើនេះដែលសមត្ថកិច្ចសង្ស័យថា ជារឿងគំនុំក្នុងករណីទំនាស់ដីធ្លី។
លោក សូ សុវណ្ណ ស្នងការរងទទួលផែនព្រហ្មទណ្ឌនៃស្នងការដ្ឋាននគរបាល ខេត្តមណ្ឌលគិរីប្រាប់ភ្នំពេញប៉ុស្តិ៍ពីម្សិលមិញថា ករណីស្ត្រីសង្ស័យម្នាក់ដែលពាក់ព័ន្ធការបាញ់សម្លាប់ជនរងគ្រោះនោះត្រូវបានសមត្ថកិច្ចចាប់ខ្លួនបានហើយ។ សមត្ថកិច្ចបញ្ជូនស្ត្រីសង្ស័យទៅសាលាដំបូងខេត្តមណ្ឌលគិរីនៅថ្ងៃទី ១០ កញ្ញានេះហើយដោយធ្វើទៅតាមនីតិវិធីច្បាប់។ លោកបានបញ្ជាក់ថា សមត្ថកិច្ចកំពុងតាមចាប់ខ្លួនជនសង្ស័យជាប្តីម្នាក់ទៀតក្នុងករណីបាញ់សម្លាប់នេះ។
លោកថ្លែងថា៖ «ជានីតិវិធីនៃការឃុំខ្លួនជនសង្ស័យគឺយ៉ាងយូរខ្ញុំមិនឲ្យហួសពី ៧២ ម៉ោងទេ។ រឿងនេះជារឿងគំនុំដីធ្លី»។
ដោយឡែកលោក ខ្លូត សុភា អធិការនគរបាលស្រុកកោះញែកបានឲ្យដឹងថា ជនរងគ្រោះឈ្មោះ រ៉ា ហៅ ម៉ៅ អាយុ ៣៧ ឆ្នាំ ត្រូវបានជនសង្ស័យបាញ់ចំនួន ១ គ្រាប់ ត្រូវចំក្រោមដោះខាងឆ្វេងធ្លាយចេញទៅក្រោមក្លៀកខាងស្ដាំបណ្ដាលឲ្យស្លាប់នៅនឹងកន្លែងកើតហេតុ។
ចំណែកឯប្រពន្ធឈ្មោះ អាន អុល អាយុ ៣៤ ឆ្នាំ ត្រូវបានជនសង្ស័យបាញ់ចំនួន ២ គ្រាប់ ត្រូវលើចង្កេះឆ្វេងផ្នែកខាងក្រោយ ធ្លាយចេញមកក្រោមដោះ ក្បែរចុងដង្ហើមផ្នែកខាងឆ្វេង ១ គ្រាប់ និង ១ គ្រាប់ទៀត ត្រូវចំគល់ដោះខាងឆ្វេងផ្នែកខាងក្រោមធ្លាយចេញទៅចុងដោះខាងឆ្វេង។
ជនរងគ្រោះបានស្លាប់នៅតាមផ្លូវ ខណៈក្រុមសាច់ញាតិដឹកទៅសង្គ្រោះនៅមន្ទីរពេទ្យបង្អែកខេត្តមណ្ឌលគិរី។ ពួកគេមានកូនស្រី ២ នាក់ និងកូនច្បងប្រុសម្នាក់អាយុ ៨ ឆ្នាំ។
លោកបន្តថាបើតាមសម្តីសាក្សីបានប្រាប់សមត្ថកិច្ចថា ផ្ទះរបស់ជនរងគ្រោះ និងផ្ទះជនសង្ស័យនៅទល់មុខគ្នាឆ្លងផ្លូវម្ខាងម្នាក់ ហើយគ្រួសារទាំង ២ នេះក៏ធ្លាប់មានទំនាស់រឿងដីធ្លីផងដែរ។ ដោយឡែកនៅយប់ថ្ងៃទី ៧ កញ្ញា គ្រួសារជនរងគ្រោះបានច្រៀងខារ៉ាអូខេ។ នៅពេលនោះជនសង្ស័យថ្លង់នឹងសំឡេងច្រៀងនោះ និងបានជជែកគ្នាហើយក៏មានការបាញ់ប្រហារគ្នាតែម្តងទៅ។
ចំពោះសំបកកាទូសគ្រាប់កាំភ្លើងដែលបន្សល់ទុកនៅកន្លែងកើតហេតុសមត្ថកិច្ចបានពិនិត្យឃើញ និងសន្និដ្ឋានថាមិនមែនជាគ្រាប់កាំភ្លើងកែច្នៃទេ តែជាគ្រាប់កាំភ្លើងពិត។
លោកប្រាប់ថា៖ «ឥឡូវនេះយើងមិនទាន់រកកាំភ្លើងឃើញទេ ព្រោះស្ត្រីសង្ស័យមិនព្រមប្រាប់សមត្ថកិច្ច»។
លោកអធិការឲ្យដឹងថាជនសង្ស័យជាកសិករ ប៉ុន្តែបើតាមសម្តីអ្នកភូមិបានប្រាប់សមត្ថកិច្ចថា កន្លងមកបុរសសង្ស័យបានដើរនិយាយប្រាប់គេថាខ្លួនធ្លាប់ធ្វើជាអតីតទាហានខ្មែរក្រហមផង។ ប៉ុន្តែលោកក៏មិនដឹងប្រាកដថា ជនសង្ស័យជាប្តីដែលកំពុងរត់គេចខ្លួននោះបានកាំភ្លើងមកពីណានោះទេ៕