.jpg)
ស្ត្រីសង្ស័យបាញ់កាំភ្លើងគំរាមនិងព្រះសង្ឃរងគ្រោះ។ នគរបាល
ភ្នំពេញៈ ស្រ្តីម្នាក់ដែលប្រើកាំភ្លើងខ្លីបាញ់គំរាមព្រះសង្ឃ ១ អង្គ នៅវត្តសារាវ័ន ក្នុងខណ្ឌដូនពេញ ដោយសារតែខឹងព្រះសង្ឃអង្គនេះស្រោចទឹកធ្វើឲ្យរាសីធ្លាក់ចុះ ត្រូវបាននគរបាលខណ្ឌដូនពេញ ចាប់ឃាត់ខ្លួនបញ្ជូនទៅសាលាដំបូងរាជធានីភ្នំពេញ កាលពីរសៀលថ្ងៃទី ៩ ខែ មិថុនា។
លោក ទៀង ច័ន្ទសារ អធិការខណ្ឌដូនពេញបានឲ្យដឹងកាលពីម្សិលមិញថាស្រ្តីឈ្មោះ ហាន ស្រីលីន អាយុ ២៩ ឆ្នាំ ដែលបាញ់គំរាមព្រះសង្ឃ ១ អង្គព្រះនាម ស៊ូ ពិសិដ្ឋ អាយុ ៣២ ឆ្នាំ ត្រូវសមត្ថកិច្ចរបស់លោកចាប់ឃាត់ខ្លួន ហើយបញ្ជូនទៅសាលាដំបូងរាជធានីភ្នំពេញហើយ នៅរសៀលថ្ងៃទី ៩ មិថុនា។
លោកថា៖ «ស្រ្តីសង្ស័យខ្ញុំបានធ្វើកំណត់ហេតុដាក់ថា ប្រើប្រាស់អាវុធខុសច្បាប់ ប៉ុន្តែបទចោទបន្ថែមយ៉ាងណានោះគឺអាស្រ័យលើព្រះរាជអាជ្ញាទេ»។
បើតាមការឲ្យដឹងពីលោក ផាន សុភ័ក្ត្រ ជាគណៈកម្មការវត្តសារាវ័ន បានប្រាប់ភ្នំពេញប៉ុស្តិ៍តាមសង្ឃដីកាព្រះសង្ឃរងគ្រោះថា កាលពីល្ងាចថ្ងៃទី ៨ មិថុនា ស្រ្តីបង្កហេតុខាងលើ បានជិះម៉ូតូកង់ ៣ មកចូលក្នុងវត្តរបស់លោកហើយបានចូលទៅក្នុងកុដិព្រះសង្ឃព្រះនាម ស៊ូ ពិសិដ្ឋ។
ពេលនោះស្រ្តីរូបនោះបានជជែកជាមួយជនរងគ្រោះពីរឿងស្រោចទឹក បណ្តាលឲ្យរាសីនាងស្រុតចុះ។ ខណៈកំពុងជជែកនោះ ស្រាប់តែនារីសង្ស័យ បានដកកាំភ្លើងខ្លី ១ ដើម បាញ់ឡើងទៅលើ ២ គ្រាប់ក៏បង្កឲ្យមានការភ្ញាក់ផ្អើល បន្ទាប់មកកម្លាំងសមត្ថកិច្ចខណ្ឌដូនពេញ បានចុះមកចាប់ឃាត់ខ្លួនស្ត្រីសង្ស័យតែម្តង។
លោកថា៖ «តាមខ្ញុំស្តាប់សភាពការណ៍ក្រោយកើតហេតុហើយបើមើលទៅស្រ្តីនោះហាក់មានសតិមិនប្រក្រតីហើយនាងហាក់ជឿលើអបិយជំនឿជ្រុល»។
លោកបន្តថា បើតាមការស្តាប់សង្ឃដីការបស់ព្រះសង្ឃជាជនរងគ្រោះ ហើយតាមស្តាប់សម្តីរបស់ស្រ្តីបង្កហេតុ បានឲ្យដឹងថា កាលពីជាង ២ ឆ្នាំមុន ស្រ្តីរូបនេះជាមួយបុរសបរទេសម្នាក់ បានមកវត្តសារាវ័ន ដើម្បីពឹងព្រះសង្សរងគ្រោះឲ្យស្រោចទឹក ដើម្បីលើករាសី។ ប៉ុន្តែចាប់តាំងពីពួកគេស្រោចទឹកមកគឺការរស់នៅហាក់មិនសូវចុះសម្រុងនឹងគ្នាជាមួយបុរសបរទេសនោះទេ ចំណែកការរកស៊ីអីក៏ហាក់មិនកាក់កបដែរ។
លោកបន្តថា៖ «គាត់ទើបទៅរកគ្រូផ្សេងទៀត គ្រូគេទាយថា ព្រះសង្ឃដែលនាងរកស្រោចទឹកនោះ ធ្វើអំពើដាក់គាត់។ រឿងនេះគឺប៉ុណ្ណឹងទេហើយក៏គ្មានពាក់ព័ន្ធអ្វីផ្សេងដែរ ហើយក៏គាត់មានគំនុំគុំកួនជាមួយព្រះសង្ឃទៅ»។
លោកថា បញ្ហានេះក៏មានមតិមហាជនមួយចំនួនយល់ថា ជារឿងអ្វីផ្សេងប៉ុន្តែតាមពិតគ្រាន់តែជារឿងជឿលើគ្រូទាយផ្សេងទេ។ ចំពោះមហាជនពាក់ព័ន្ធនឹងជម្លោះក្នុងសាសនា គឺគាត់វ៉ៃប្រហារទៅលើព្រះសង្ឃទៅវិញហើយគាត់មិនបានអង្កេត ឬស្តាប់ហេតុការណ៍នោះឲ្យបានល្អិតល្អន់ទេ។
លោក លី សុផាន់ណា អ្នកនាំពាក្យសាលាដំបូងរាជធានីភ្នំពេញ មិនអាចទាក់ទងសុំអធិប្បាយបានទេ៕
