.jpg)
ជនសង្ស័យត្រូវបានសមត្ថកិច្ចចាប់បាន កាលពីយប់ថ្ងៃទី ២២ ខែតុលា។ រូបថត សហការី
តាកែវៈ ស្ត្រីម្នាក់ត្រូវបានជនសង្ស័យប្រើកាំបិតប៉័ងតោ កាប់ស្លាប់កាលពីព្រឹកថ្ងៃទី ២២ តុលា ឆ្នាំ ២០១៩ នៅ ភូមិពោធិ៍ ឃុំស្លា ស្រុកសំរោង ខេត្តតាកែវដែលសមត្ថកិច្ចបានដាក់ការសង្ស័យថា អាចជាករណីប្រចណ្ឌ ខណៈជនសង្ស័យរត់គេចខ្លួន។
លោក មឿង សារុន អធិការ នគរបាលស្រុក សំរោង បានឲ្យដឹងកាលពីម្សិលមិញថា ស្ត្រីរងគ្រោះឈ្មោះ ហឿង សុខុន អាយុ ៣៥ ឆ្នាំ ជាស្ត្រីមេម៉ាយ រីឯជនសង្ស័យឈ្មោះ សែន ហាក់ឡី អាយុ ៣៣ ឆ្នាំ ជាបុរសពោះម៉ាយ ពួកគេរស់នៅក្នុងភូមិ-ឃុំ-ស្រុកជាមួយគ្នា ហើយស្ត្រីរងគ្រោះ និងជនសង្ស័យមានផ្ទះនៅក្បែរគ្នាក៏ជាមនុស្សរាប់អានគ្នា និងជាញឹកញាប់ជនសង្ស័យតែងចេញចូលក្នុងផ្ទះស្ត្រីរងគ្រោះផងដែរ។
លោក សារុន បានអះអាងថាពាក់ព័ន្ធករណីនេះសមត្ថកិច្ចបានស្រាវជ្រាវរកមូលហេតុនៃអំពើឃាតកម្មនេះដែរ ប៉ុន្តែមិនទាន់ដឹងថា ការសម្លាប់នេះផ្តើមឡើងដោយមូលហេតុអ្វីឲ្យពិតប្រាកដនៅឡើយទេ តែសមត្ថកិច្ចរបស់លោកក៏បានដាក់ការសង្ស័យបឋមថា ករណីប្រចណ្ឌក៏អាចជាមូលហេតុមួយដែរ ពីព្រោះថាស្ត្រីរងគ្រោះគ្មានប្តី ហើយជនសង្ស័យក៏គ្មានប្រពន្ធដែរ។
លោកថ្លែងថា៖ «ខ្ញុំសួរទៅខាងសាច់ញាតិស្ត្រីរងគ្រោះនិង ជនសង្ស័យគេប្រាប់ថា ពួកគេគ្មានទំនាក់ទំនងស្នេហាគ្នាអីទេ។ តែវាអាចសង្ស័យថា មកពីករណីប្រចណ្ឌដែរ ព្រោះជនសង្ស័យជាបុរសពោះម៉ាយ ហើយខាងស្រីជាស្ត្រីមេម៉ាយ»។
លោកថ្លែងថាតាមសាក្សីនៅកន្លែងកើតហេតុថា នៅមុនពេលកើតហេតុ វេលាម៉ោងប្រមាណជា ៥ ព្រឹកថ្ងៃទី ២២ ខែ តុលា ស្ត្រីរងគ្រោះបានជិះម៉ូតូទៅផ្សារទិញបន្លែដើម្បីយកមកលក់នៅក្នុងភូមិ។ ខណៈនោះស្ត្រីរងគ្រោះកំពុងជិះម៉ូតូចេញពីភូមិក៏ស្រាប់តែជនសង្ស័យឈ្មោះ សែន ហាក់ឡី នេះបានជិះម៉ូតូ ១ គ្រឿង តាមក្រោយហើយនៅដៃមានកាន់កាំបិតប៉័ងតោ ១ ទៅក្បែរស្ត្រីរងគ្រោះហើយកាប់ស្ត្រីរងគ្រោះតែម្តង។
ក្រោយកើតហេតុ សមត្ថកិច្ចជំនាញបានចុះដល់កន្លែងកើតហេតុ និងធ្វើកោសល្យវិច័យ ឃើញថាស្ត្រីរងគ្រោះត្រូវបានជនសង្ស័យប្រើកាំបិតប៉័ងតោកាប់ត្រូវកញ្ចឹង ក ខាងក្រោយ ១ កាំបិត និងចំត្រង់ចង្កា បណ្តាលឲ្យរបួសធ្ងន់ ហើយត្រូវបានសាច់ញាតិដឹកទៅសង្គ្រោះនៅមន្ទីរពេទ្យបង្អែកស្រុកសំរោង តែស្ត្រីរងគ្រោះបានដាច់ខ្យល់ស្លាប់ក្រោយដឹកដល់មន្ទីរពេទ្យ។ ជនសង្ស័យបានរត់គេចខ្លួនដោយមិនទុកវត្ថុតាង៕
