.jpg)
លោក Beat Richner ក្នុងកាយវិការបីកូនភ្លោះ ៤ កន្លងមក។ រូប ហ្វេសប៊ុក
ភ្នំពេញៈ ស្ថាបនិកមន្ទីរពេទ្យ គន្ធបុប្ផា លោកវេជ្ជបណ្ឌិត Beat Richner បានទទួលមរណភាពហើយក្នុងជន្មាយុ ៧១ ឆ្នាំនៅវេលាម៉ោង ២ និង ៤៥ នាទីទៀបភ្លឺថ្ងៃទី ៩ ខែកញ្ញា ឆ្នាំ ២០១៨ នៅប្រទេសស្វ៊ីសដែលជាប្រទេសកំណើតរបស់លោក។ នេះបើតាមលោក ម៉ម ប៊ុនហេង រដ្ឋមន្ត្រីក្រសួងសុខាភិបាល។
លោក ប៊ុនហេង ថ្លែងថា៖ «ខ្ញុំសោកស្ដាយ និងក្រៀមក្រំជាទីបំផុតចំពោះមរណភាពរបស់ឯកឧត្ដមវេជ្ជបណ្ឌិត Beat Richner ដែលជាស្ថាបនិកមន្ទីរពេទ្យគន្ធបុប្ផា ហើយខ្ញុំនឹងរៀបចំពិធីគោរពវិញ្ញាណក្ខន្ធជាផ្លូវការនៅថ្ងៃស្អែក (ថ្ងៃចន្ទ) ចាប់ពីម៉ោង ៣ រសៀលទៅនៅទីស្តីការក្រសួងតែម្តង»។ «យើងមានការសោកស្ដាយជាទីបំផុតដែលយើងបាត់បង់នូវអ្នកឧបត្ថម្ភ គាំទ្រយើង ជាអ្នកជួយប្រទេសជាតិយើងដ៏ធំចំពោះការស្រោចស្រង់អាយុជីវិតដល់កុមារកម្ពុជាយើង»។
លោក Denis Laurent Biologist អនុប្រធានមូលនិធិមន្ទីរពេទ្យគន្ធបុប្ជាឲ្យដឹងថាលោកកំពុងរៀបចំប្រជុំក្រុមការងារនៅមន្ទីរពេទ្យគន្ធបុប្ផានៅថ្ងៃនេះ។ «យើងនឹងរៀបចំពិធីបុណ្យមួយនៅមន្ទីរពេទ្យគន្ធបុប្ផាតាមបែបប្រពៃណីកម្ពុជា»។
លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផាបានប្រកាសលាលែងពីតំណែងកាលពីថ្ងៃទី ២៨ ខែមីនា ឆ្នាំ ២០១៨ ដោយសារលោកធ្លាក់ខ្លួនឈឺធ្ងន់។ លោកបានប្រគល់តំណែងតួនាទីទៅឲ្យលោកវេជ្ជបណ្ឌិត Peter Studer ដែលជាអនុប្រធានមន្ទីរពេទ្យនាពេលបច្ចុប្បន្ន។ បច្ចុប្បន្នមន្ទីរពេទ្យគន្ធបុប្ផា មានបុគ្គលិកកំពុងបម្រើការងារចំនួន ២ ៥០០ នាក់។
លោក Beat Richner បានវិលត្រឡប់មកកម្ពុជាជាលើកទី ២ នៅឆ្នាំ ១៩៩១ និងបានសុំឲ្យរដ្ឋាភិបាលសាងសង់មន្ទីរពេទ្យគន្ធបុប្ផាឡើងវិញ បន្ទាប់ពីមន្ទីរពេទ្យមួយនេះរងការបំផ្លិចបំផ្លាញក្នុងសម័យខ្មែរក្រហម។ មកដល់ពេលនេះមន្ទីរពេទ្យគន្ធបុប្ជាមានអាយុកាល ២៥ ឆ្នាំហើយ ហើយបានព្យាបាលជួយសង្គ្រោះអាយុជីវិតកុមារកម្ពុជារាប់លាននាក់ដោយមិនយកប្រាក់កម្រៃ៕
