.jpg)
អាជ្ញាធរកំពុងជីកប្រឡាយដើម្បីបង្ហូរទឹកទៅជួយសង្គ្រោះស្រូវ។ រូបថតគណៈកម្មាធិការគ្រប់គ្រងគ្រោះមហន្តរាយ
ភ្នំពេញៈ គ្រោះរាំងស្ងួតដែលបានអូសបន្លាយតាំងពីពាក់កណ្តាលរដូវវស្សារហូតមកដល់ពេលនេះបានបង្កផលប៉ះពាល់ដល់ដំណាំស្រូវពលរដ្ឋប្រមាណជិត ២ ម៉ឺនហិកតានៅក្នុងខេត្តចំនួន ១៣ ក្នុងនោះខេត្តកំពង់ចាមរងផលប៉ះពាល់ខ្លាំងជាងគេ។ នេះបើតាមលោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
លោក កែវ វី បានថ្លែងកាលពីម្សិលមិញថាថ្វីបើកាលពីដើមរដូវវស្សាមានភ្លៀងធ្លាក់ច្រើនរាយប៉ាយនៅទូទាំងប្រទេសដែលបង្កឲ្យតំបន់ខ្លះមានការជន់លិច ធ្វើឲ្យមានការខូចខាតផ្លូវ និងស្រូវសន្ទូងអស់ជាច្រើនពាន់ហិកតា ប៉ុន្តែចូលមកដល់ពាក់កណ្ដាលរដូវវស្សាទឹកភ្លៀងបានចុះថមថយមកវិញ និងមានភាពរាំងស្ងួតដោយកន្លែង ពិសេសនៅចុងរដូវវស្សានេះអាកាសធាតុចាប់ផ្ដើមប្រែប្រួលឡើងកម្តៅភ្លាមៗដែលធ្វើឲ្យមានការរីងហួតទឹកពីបឹងបួយ៉ាងឆាប់រហ័សបង្កឲ្យផ្ទៃដីដាំដុះដំណាំស្រូវរបស់ប្រជាកសិករសរុបជាង ១៩ ០០០ ហិកតានៅក្នុងខេត្តចំនួន ១៣ ជួបប្រឈមនឹងកង្វះទឹកស្រោចស្រព។
ក្នុងនោះខេត្តកំពង់ចាមប៉ះពាល់ច្រើនជាងគេគឺរហូតដល់ ៩០០០ ហិកតា បន្ទាប់មកខេត្តបាត់ដំបង ត្បូងឃ្មុំ និងកំពង់ធំ។ លោកបញ្ជាក់ថា៖ «មកទល់ពេលនេះក្រសួងធនធានទឹក និងមន្ទីរជំនាញពាក់ព័ន្ធកំពុងបន្តជីកស្ដារប្រព័ន្ធស្រោចស្រព និងបូមទឹកពីអាងស្តុកទឹកធំៗដើម្បីនាំទឹកទៅជួយសង្គ្រោះស្រូវដែលកំពុងជួបគ្រោះរាំងស្ងួតទាំងនោះ»។
កសិករនៅភូមិព្រៃព្រាល ឃុំឃ្លាំងមាស ស្រុកបវេល ខេត្តបាត់ដំបង អ្នកស្រី អ៊ុង សាមុត ឲ្យដឹងថាដំណាំស្រូវរបស់អ្នកស្រី និងអ្នកភូមិព្រៃព្រាលទាំងអស់ជាង ៥០០ ហិកតាដែលខ្លះកំពុងផើម ខ្លះចេញកួរស្រូវ នៅពេលនេះកំពុងខ្វះទឹកស្រោចស្រព។ អ្នកស្រីថ្លែងថា៖ «នៅពេលនេះពួកយើងបារម្ភខ្លាំងណាស់ ព្រោះបើគ្មានទឹកមកជួយស្រោចស្រពទាន់ពេលទេនោះក្នុងរយៈពេល ១០ ថ្ងៃទៀត ស្រូវរបស់ពួកយើងអាចនឹងស្កកខូចអស់ជាមិនខាន»។
បើតាមអ្នកស្រី សាមុត ក្រុមមន្ត្រីពាក់ព័ន្ធកាលពីថ្ងៃសៅរ៍បានប្រើអេស្កាវ៉ាទ័រ ទៅកាយប្រឡាយអមសងខាងផ្លូវលំ ដើម្បីបង្ហូរទឹកទៅជួយសង្គ្រោះស្រូវទាំងនោះ ប៉ុន្តែមិនដឹងថាអាចបង្ហូរទឹកទៅទាន់ពេលវេលាឬយ៉ាងណានោះទេ។
លោក ឈឹម សេរីវិចរ៉ា ប្រធានមន្ទីរកសិកម្ម ខេត្តបាត់ដំបងបានប្រាប់ភ្នំពេញប៉ុស្តិ៍ថា ក្រុមការងាររបស់លោកកំពុងរួមសហការជាមួយក្រុមមន្ត្រីជំនាញនៃមន្ទីរធនធានទឹកចុះជីកស្ដារប្រឡាយ និងបូមទឹកពីអាងស្ដុកទឹកបង្ហូរទៅជួយស្រោចស្រពស្រូវក្នុងភូមិព្រៃព្រាលនេះហើយ។ លោកបានបញ្ជាក់ថា៖ «ក្រុមការងារយើងកំពុងបង្កើនល្បឿនការងារជីកស្ដារប្រឡាយ និងបូមទឹកដោយប្រើអេស្កាវាទ័រ ៣ គ្រឿង និងម៉ាស៊ីនបូមទឹកខ្នាតយក្ស ២ គ្រឿង។ យើងរំពឹងថាយ៉ាងយូរ ២ ថ្ងៃទៀត ស្រូវទាំងអស់នឹងមានទឹកគ្រប់គ្រាន់សម្រាប់ស្រោចស្រពរហូតដល់ពេលប្រមូលផល»។
ចំណែកលោក ធីវ វណ្ណធី ប្រធានមន្ទីរកសិកម្ម ខេត្តកំពង់ធំក៏បានឲ្យដឹងដែរថា គ្រោះរាំងស្ងួតនាចុងរដូវវស្សានេះបានបង្កផលប៉ះពាល់ដល់ស្រូវជាង ២០០០ ហិកតានៅក្នុងស្រុកបារាយណ៍។ ប៉ុន្តែដោយមានកិច្ចសហការពីមន្ទីរធនធានទឹក និងអាជ្ញាធរមូលដ្ឋានបានធ្វើការបូមទឹកជួយសង្គ្រោះបានសម្រេចប្រមាណ ៨០ ភាគរយហើយពោលគឺនៅសល់តែប្រមាណពី ២០០ ទៅ ៣០០ ហិកតាទៀតប៉ុណ្ណោះគឺដោយសារកង្វះប្រព័ន្ធប្រឡាយមេទឹកដែលមិនអាចបូមបញ្ជូនទឹកទៅដល់។
លោកបានបញ្ជាក់ថា៖ «នៅពេលនេះការងារបូមទឹកបានដំឡើងម៉ាស៊ីនបូមទឹកចំនួន ៣ គ្រឿងធំៗ ដើម្បីបូមទឹកជួយដល់ដំណាំស្រូវ ហើយក្រុមការងារយើងមួយផ្នែកទៀតកំពុងរៀបចំជីកប្រឡាយមេទឹក ដើម្បីនាំទឹកទៅស្រោចស្រពដីស្រែ ២០០ ទៅ ៣០០ ហិកតានោះបន្ថែមទៀត»៕
