ភ្នំពេញៈ សាលាឧទ្ធរណ៍ប្រកាសសាលដីកាតម្កល់ទោសលើស្រ្តីជាប់ចោទម្នាក់ឲ្យជាប់ពន្ធនាគារ ៣០ ឆ្នាំ តាមអំណាចសាល ក្រមតុលាការថ្នាក់ក្រោម បន្ទាប់ពីជំនុំជម្រះកាលពីដើមខែនេះ ពាក់ព័ន្ធចាក់សម្លាប់ប្លន់យកគ្រឿងអលង្ការពីបុរសថៅកែម៉ាស្សាម្នាក់ក្នុងស្រុកអង្គស្នួលខេត្តកណ្តាលកាលពីឆ្នាំ ២០១៨។
នៅចំពោះមុខស្រ្តីជាប់ចោទក្នុងបន្ទប់សវនាការពីម្សិលមិញលោកចៅក្រមចាយ ច័ន្ទតារាវណ្ណ បានអានសាលដីកាថា ស្រ្តីជាប់ចោទឈ្មោះ ផេន ណា ហៅណា អាយុ ៣៣ ឆ្នាំ ក្រោយពីជំនុំជម្រះនិងក្រោយពីបានស្តាប់ការសន្និដ្ឋានរបស់មេធាវីការពារសិទ្ធិឲ្យជនជាប់ចោទនិងការសន្និដ្ឋានរបស់តំណាងមហាអយ្យការមក ក្រុមប្រឹក្សាជំនុំជម្រះពិចារណាឃើញថាតាមអង្គហេតុស្រ្តីជាប់ចោទមុនធ្វើសកម្មភាពចាក់សម្លាប់បុរសរងគ្រោះគឺគាត់បានរៀបចំគម្រោងរួចទៅហើយដោយស្រ្តីជាប់ចោទបានលាក់កាំបិតចិតបន្លែដាក់តាមខ្លួន។ លុះទៅដល់ផ្ទះសំណាក់ស្រ្តីជាប់ចោទបានយកកាំបិតទៅលាក់នៅក្នុងស្រោមខ្នើយ។
លោកបន្តថាពេលនោះស្រ្តីជាប់ចោទបានរួមភេទជាមួយបុរសរងគ្រោះ នួន សុភាព អាយុ ៥៨ ឆ្នាំ ហើយក៏បានដកកាំបិតចាក់ចំនួន ១៨ កាំបិត ស្លាប់តែម្តង។
លោកបញ្ជាក់ប្រាប់ស្រ្តីជាប់ចោទថា៖ «ការដែលតុលាការរាជធានីភ្នំពេញផ្តន្ទាទោសដល់ជនជាប់ចោទដាក់ពន្ធនាគារ ៣០ ឆ្នាំ នោះក្រុមប្រឹក្សាជំនុំជម្រះសាលាឧទ្ធរណ៍យល់ថាតុលាការថ្នាក់ក្រោមបានផ្តល់ស្ថានសម្រាលទោសដល់ជនជាប់ចោទហើយ។ ដូច្នេះសាលាឧទ្ធរណ៍មិនអាចសម្រាលទោសដល់ជនជាប់ចោទបានទៀតទេ»។
តាមកំណត់ហេតុតុលាការបង្ហាញថាបុរសរងគ្រោះឈ្មោះ នួន សុភាព អាយុ ៥៨ ឆ្នាំ រស់នៅភូមិស្រែអំពិល សង្កាត់ស្នោខណ្ឌពោធិ៍សែនជ័យ បានស្គាល់គ្នាជាមួយស្រ្តីជាប់ចោទ ហើយស្រ្តីជាប់ចោទបានល្បួងបុរសរងគ្រោះដឹកទៅផ្ទះសំណាក់។ លុះនៅថ្ងៃទី ២១ មករា ឆ្នាំ ២០១៨ ពួកគេបានណាត់គ្នាទៅផ្ទះសំណាក់ ដែលមានយីហោឈ្មោះ «សំណាងណាស់»។
ពេលទៅដល់ផ្ទះសំណាក់ស្រ្តីជាប់ចោទបានយកកូនកាំបិតដែលបានយកជាប់ខ្លួនទៅលាក់ទុកនៅក្រោមខ្នើយ ដោយខណៈកំពុងរួមរ័កនោះស្រ្តីជាប់ចោទបានយកកាំបិតពីស្រោមខ្នើយចាក់លើដងខ្លួនបុរសរងគ្រោះរហូត ១៨ កាំបិតស្លាប់ហើយដោះយកខ្សែកនិងលុយសរុបជាង ២ ពាន់ដុល្លារ គេចខ្លួនបាត់។
អង្គហេតុបន្តថាបន្ទាប់ពីគេចខ្លួនបាន ៣ ថ្ងៃ គឺសមត្ថកិច្ចនគរបាលខេត្តកណ្តាលបានស្រាវជ្រាវចាប់ខ្លួននៅថ្ងៃទី ២៤ ខែ មករា ឆ្នាំ ២០១៨។ កាលពីថ្ងៃចាប់ខ្លួនស្រ្តីជាប់ចោទ បានឆ្លើយប្រាប់សមត្ថកិច្ចថា មូលហេតុដែលនាងសម្លាប់ជនរងគ្រោះដោយសារតែ នាងចង់បានលុយចំនួន ២ ៥០០ ដុល្លារ យកទៅដោះលែងប្តីពីពន្ធនាគារព្រៃស៕