ភ្នំពេញៈ អង្គការមូលនិធិបង្ការរបួសអាស៊ីដោយមានការគាំទ្រពីគណៈកម្មាធិការជាតិសុវត្ថិភាពចរាចរណ៍ផ្លូវគោក និងក្រសួងពាក់ព័ន្ធកាលពីម្សិលមិញបានបើកសិក្ខាសាលាបណ្ដុះបណ្តាលគ្រូបង្គោលស្ដីពីសុវត្ថិភាពចរាចរណ៍រយៈពេល ៣ ថ្ងៃ ដល់និស្សិតជាតំណាងមកពីគ្រឹះស្ថានឧត្ដមសិក្សានានានៅភ្នំពេញ ខណៈបញ្ហាគ្រោះថ្នាក់ចរាចរណ៍ផ្លូវគោកបានបណ្ដាលឲ្យមនុស្សស្លាប់ជាមធ្យមជាង ៥ នាក់ ជារៀងរាល់ថ្ងៃដែលក្នុងចំណោមនោះជាង ៤៥ ភាគរយ គឺជាយុវជន។
សេចក្ដីប្រកាសព័ត៌មានរបស់អង្គការមូលនិធិបង្ការរបួសអាស៊ី (AIP Foundation) ស្ដីពីការកសាងវប្បធម៌នៃភាពជាអ្នកដឹកនាំលើសុវត្ថិភាពចរាចរណ៍សម្រាប់យុវជនដែលប្រកាសក្នុងពេលបើកសិក្ខាសាលាបណ្ដុះបណ្ដាលដល់និស្សិតកាលពីម្សិលមិញនៅសណ្ឋាគារសាន់វ៉េបានបង្ហាញស្ថិតិរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកកាលពីឆ្នាំមុនថា ជនរងគ្រោះដោយសារគ្រោះថ្នាក់ចរាចរណ៍នៅកម្ពុជាប្រមាណ ៤៥ ភាគរយ ជាយុវជនមានអាយុចន្លោះពី ១៥ ទៅ ២៩ ឆ្នាំ។ ស្ថិតិដ៏គួរឲ្យព្រួយបារម្ភនេះបានចង្អុលបង្ហាញពីភាពងាយរងគ្រោះរបស់យុវជនថា ជាអ្នករងរបួស និងស្លាប់យ៉ាងច្រើនដោយសារគ្រោះថ្នាក់ចរាចរណ៍។
សេចក្ដីប្រកាសបញ្ជាក់ថា៖ «ក្នុងគោលបំណងធ្វើការអប់រំ និងផ្ដល់សិទ្ធិអំណាចដល់យុវជននៅគ្រឹះស្ថានឧត្ដមសិក្សាឲ្យក្លាយជាអ្នកតស៊ូមតិដ៏សកម្មផ្នែកសុវត្ថិភាពចរាចរណ៍ប្រកបដោយជំនាញ និងចំណេះដឹងអំពីសារៈសំខាន់នៃសុវត្ថិភាពចរាចរណ៍ទើប AIP Foundation រៀបចំឲ្យមានសិក្ខាសាលាបណ្ដុះបណ្ដាលគ្រូបង្គោលរយៈពេល ៣ ថ្ងៃ»។
សិក្ខាសាលានេះនឹងធ្វើការអប់រំដល់យុវជនជាអ្នកតំណាងពីគ្រឹះស្ថានឧត្ដមសិក្សាទទួលបន្ទុកផ្នែកបណ្ដុះបណ្ដាល និងអប់រំផ្សព្វផ្សាយពីបញ្ហាគ្រោះថ្នាក់ចរាចរណ៍ និងឥរិយាបថសុវត្ថិភាពចរាចរណ៍ផ្លូវគោកប្រមាណ ៣០ នាក់មកពី ៣០ គ្រឹះស្ថានឧត្ដមសិក្សានៅភ្នំពេញដើម្បីឲ្យពួកគេអាចទៅអប់រំផ្សព្វផ្សាយបន្តដល់និស្សិតនៅសាកលវិទ្យាល័យរបស់ពួកគេ និងមិត្ដភក្ដិអំពីសារៈសំខាន់នៃការធ្វើឲ្យប្រសើរឡើងនូវឥរិយាបថក្នុងការបើកបររបស់យុវជន។
សេចក្ដីប្រកាសថា៖ «ការបណ្ដុះបណ្ដាលនេះបានប្រើគំរូនៃរបៀប មិត្ដអប់រំមិត្ដ និងបណ្ដុះបណ្ដាលនិស្សិតឲ្យធ្វើជាយុវជនគំរូជាវិជ្ជមានផ្នែកសុវត្ថិភាពចរាចរណ៍នៅក្នុងគ្រឹះស្ថានឧត្ដមសិក្សា និងក្នុងសហគមន៍របស់ពួកគេដោយធ្វើឲ្យពួកគេអាចបណ្ដុះបណ្ដាលអ្នកដទៃទៀតអំពីឥរិយាបថសុវត្ថិភាពចរាចរណ៍»។
លោក គឹម បញ្ញា នាយកប្រចាំប្រទេសកម្ពុជានៃ AIP Foundation ថ្លែងថា តាមរយៈសិក្ខាសាលា ៣ ថ្ងៃនេះយុវជនជានិស្សិតនឹងបានស្វែងយល់ពីការទទួលរងគ្រោះរបស់សិក្ខាកាមដទៃទៀតដោយសារបញ្ហាគ្រោះថ្នាក់ចរាចរណ៍ក៏ដូចជាការយល់ដឹងកាន់តែស៊ីជម្រៅអំពីការពិតនៃហានិភ័យនៅលើដងផ្លូវតាមរយៈល្បែងច្នៃប្រឌិត និងលំហាត់អនុវត្ដន៍។
លោកថា ដោយសារគ្រោះថ្នាក់ចរាចរណ៍ក៏ដូចជាចំនួនអ្នកស្លាប់ និងរបួសនៅក្នុងឆ្នាំ ២០១៩ មានការកើនឡើងគួរឲ្យព្រួយបារម្ភ រហូតត្រូវបានប្រមុខដឹកនាំគណៈកម្មាធិការជាតិសុវត្ថិភាពចរាចរណ៍ផ្លូវគោកប្រកាសថា ដល់ចំណុចត្រូវប្រកាសអាសន្ន ដូច្នេះស្ថានភាពរងគ្រោះរបស់យុវជន សិស្ស-និស្សិត ក៏កាន់តែមានសភាពធ្ងន់ធ្ងរបន្ថែមទៀតដែលបញ្ហានេះពិតជាចាំបាច់ត្រូវមានវិធានការទប់ស្កាត់ និងកាត់បន្ថយប្រកបដោយប្រសិទ្ធភាពខ្ពស់ និងឲ្យបានទាន់ពេលវេលា សំដៅការពារធនធានដ៏សំខាន់សម្រាប់គ្រួសារ និងប្រទេសកម្ពុជា។
លោកថ្លែងថា៖ «យើងចាំបាច់ត្រូវមានវិធានការឲ្យបានកាន់តែខ្លាំង និងឆាប់រហ័ស ព្រោះយើងមិនអាចបន្តបណ្ដោយឲ្យអនាគតអ្នកបន្តវេនសម្រាប់គ្រួសារនីមួយៗក៏ដូចជាសង្គមកម្ពុជារបស់យើងមានត្រឹមតែចំណេះដឹង និងជំនាញសម្រាប់បំពេញការងារ ប៉ុន្ដែបែរជាមានឥរិយាបថបំពានច្បាប់ ពិសេសច្បាប់ចរាចរណ៍ និងហ៊ានប្រឈមនឹងហានិភ័យខ្ពស់ជារៀងរាល់ថ្ងៃនោះទេ»។
លោក យក់ ង៉ុយ រដ្ឋលេខាធិការក្រសួងអប់រំ យុវជន និងកីឡាបានថ្លែងក្នុងពេលបើកសិក្ខាសាលានេះកាលពីម្សិលមិញថា សិក្ខាសាលានេះពិតជាមានសារៈសំខាន់ក្នុងការបណ្ដុះបណ្ដាលយុវជនឲ្យទទួលបានចំណេះដឹង និងបទពិសោធដើម្បីយកទៅផ្សព្វផ្សាយបន្ត។
លោកថ្លែងថា៖ «កន្លងមកយើងបានជ្រាបហើយថា គ្រោះថ្នាក់ចរាចរណ៍ជាប្រធានបទមួយដែលតម្រូវឲ្យមានការយកចិត្ដទុកដាក់ និងចូលរួមទប់ស្កាត់។ ក្នុងបរិបទនេះក្រសួងអប់រំក៏បានដាក់បញ្ចូលស្ដង់ដានៃការអប់រំស្ដីពីសុវត្ថិភាពចរាចរណ៍ផ្លូវគោកនៅក្នុងកម្មវិធីសិក្សា សៀវភៅសិក្សាកម្រិតបឋម និងមធ្យមផងដែរ»។
លោកបន្ដថា ចំនួនអ្នកស្លាប់ដោយគ្រោះថ្នាក់ចរាចរណ៍កំពុងមានកំណើនគួរឲ្យព្រួយបារម្ភ និងមិនទាន់ត្រូវបានកាត់បន្ថយតាមគោលដៅដែលបានគ្រោងទុកនៅឡើយ ដែលធ្វើឲ្យមានការខាតបង់ផ្នែកសេដ្ឋកិច្ចសង្គមអស់ជាច្រើនរយលានដុល្លារក្នុង ១ ឆ្នាំៗ។ ការខាតបង់នេះបានប៉ះពាល់ដល់ផលិតភាព ការថែទាំសុខភាព និងឱកាសការងារ និងការចំណាយផ្សេងៗ។
លោក ង៉ុយ បានលើកយករបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកក្នុងឆ្នាំ ២០១៩ ដែលបង្ហាញថា ចំនួនអ្នកស្លាប់ដោយគ្រោះចរាចរណ៍មានរហូតដល់ ១ ៨៥២ នាក់ ក្នុងនោះ ៤៥ ភាគរយ ជាជនរងគ្រោះដែលមានអាយុចន្លោះពី ១៥-២៩ ឆ្នាំ។
នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកឆ្នាំ ២០១៩ និងលើកទិសដៅការងារឆ្នាំ ២០២០ កាលថ្ងៃទី ២១ ខែមករា លោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍បានប្រកាសអាសន្នពីបញ្ហាគ្រោះថ្នាក់ចរាចរណ៍ និងបានកំណត់យកឆ្នាំ ២០២០ ជាឆ្នាំសម្រាប់ប្រយុទ្ធប្រឆាំងគ្រោះថ្នាក់ចរាចរណ៍៕