ភ្នំពេញៈ ក្រុមអង្គការតស៊ូមតិ និងសិទ្ធិការងារអន្តរជាតិចំនួន ៣៥ បានចេញសេចក្តីថ្លែងការណ៍មួយកាលពីម្សិលមិញដោយទាមទារឲ្យមានការទម្លាក់ចោលបទចោទប្រកាន់ប្រឆាំងនឹងសកម្មជនសង្គមស៊ីវិលកម្ពុជា ៣ រូបដែលត្រូវបានគណបក្សនយោបាយមួយប្តឹងពាក់ព័ន្ធនឹងបទចោទថា បានកិបកេងបច្ច័យបុណ្យសពអ្នកវិភាគល្បីឈ្មោះ លោក កែម ឡី។
សេចក្តីថ្លែងការណ៍ដែលចុះហត្ថលេខាដោយសហជីពអង្គការសិទ្ធិមនុស្ស និងសិទ្ធិការងារអន្តរជាតិរួមទាំងអង្គការឃ្លាំមើលសិទ្ធិមនុស្ស និងយុទ្ធនាការសម្លៀកបំពាក់ស្អាតនេះបានសរសេរថា៖ «យើងដែលជាសហជីពសកល អង្គការសិទ្ធិកម្មករ និងសិទ្ធិមនុស្សអន្តរជាតិអំពាវនាវឲ្យមានការទម្លាក់ចោលបទចោទប្រកាន់ប្រឆាំងនឹងអ្នកការពារសិទ្ធិមនុស្សកម្ពុជាលោក មឿន តុលា ជាបន្ទាន់»។
ខណៈសេចក្តីថ្លែងការណ៍នេះផ្តោតលើលោក តុលា សេចក្តីថ្លែងការណ៍នេះក៏ជំរុញឲ្យមានការទម្លាក់បទចោទប្រកាន់សម្រាប់ «សហចុងចោទ» ពីរនាក់ទៀតរបស់លោកផងដែរ។
លោក មឿន តុលា ដែលជាសកម្មជនសិទ្ធិការងារត្រូវបានចោទប្រកាន់ពីបទ «រំលោភលើសេចក្តីទុកចិត្ត» រួមជាមួយសកម្មជនសង្ឃ ព្រះតេជគុណ ប៊ុត ប៊ុនតិញ និងអ្នកតស៊ូមតិសម្រាប់ប្រព័ន្ធផ្សព្វផ្សាយសេរី លោក ប៉ា ងួនទៀង។
អ្នកទាំង ៣ នាក់នេះត្រូវបានចោទប្រកាន់ពីបទកិបកេងលុយបច្ច័យបុណ្យសពលោក កែម ឡី ដែលជាអ្នកវិភាគនយោបាយដែលត្រូវបានគេធ្វើឃាត បើទោះបីជាអ្នកទាំង ៣ ធ្លាប់បានថ្លែងជាច្រើនលើករួចមកហើយថា ពួកគេមិនមែនជាអ្នកកាន់លុយបុណ្យសពក៏ដោយ។ ព្រះរាជអាជ្ញាបានបញ្ជាឲ្យមានការចាប់អ្នកទាំង ៣ នាក់នេះឃុំខ្លួនមុនការជំនុំជម្រះភ្លាមៗ ប៉ុន្តែពួកគេទាំងអស់នៅបរទេស។
បទចោទប្រកាន់នេះត្រូវបានរិះគន់ថា ពាក់ព័ន្ធនឹងរឿងនយោបាយហើយគ្រួសាររបស់លោក កែម ឡី បានអះអាងដដែលៗ អំពីភាពស្អាតស្អំគ្មានទោសកំហុសរបស់ពួកគេ។ ពាក្យបណ្តឹងនេះត្រូវបានដាក់ដោយលោក ពេជ្រ ស្រស់ ដែលមិនមានទំនាក់ទំនងអ្វីសោះជាមួយគ្រួសាររបស់លោក កែម ឡី ។
សេចក្តីថ្លែងការណ៍នេះបានបន្តថា៖ «គេដឹងយ៉ាងច្បាស់ថា តុលាការកម្ពុជាមិនឯករាជ្យ ប៉ុន្តែជាជាងនោះត្រូវបានជំរុញដោយអត្ថប្រយោជន៍នយោបាយរបស់គណបក្សប្រជាជនកម្ពុជា។ បទចោទប្រកាន់ទាំងនេះគឺជាការប៉ុនប៉ងបំបិទសំឡេង និងដាក់ទោសទណ្ឌទៅលើសំឡេងមួយក្នុងចំណោមសំឡេងឯករាជ្យដែលនាំមុខគេសម្រាប់សិទ្ធិកម្មករក្នុងប្រទេសកម្ពុជា»។
លោក ស្រស់ ក៏បានដាក់ពាក្យបណ្តឹងប្រឆាំងនឹងលោក កឹម សុខា មេដឹកនាំគណបក្សប្រឆាំងផងដែរពាក់ព័ន្ធនឹងអត្ថាធិប្បាយក្នុងយុទ្ធនាការ និងដាក់ពាក្យបណ្តឹងមួយប្រឆាំងនឹងគណបក្សប្រឆាំងដ៏ធំដែលក្រោយមកត្រូវបានរំលាយ។
សេចក្តីថ្លែងការណ៍បន្តថា៖ «ករណីនេះបង្ហាញពីការធ្លាក់ចុះកាន់តែខ្លាំងទៅៗចំពោះបរិយាកាសសិទ្ធិការងារ និងសិទ្ធិមនុស្សក្នុងប្រទេសកម្ពុជា»។
ប៉ុន្តែអ្នកនាំពាក្យក្រសួងយុត្តិធម៌ លោក ជិន ម៉ាលីន បានថ្លែងថាគ្មានស្ថាប័នណាអាចជ្រៀតជ្រែតជាមួយកិច្ចការផ្ទៃក្នុងរបស់តុលាការកម្ពុជាបានទេ សូម្បីតែអង្គការសហប្រជាជាតិក៏មិនអាចដែរ។
លោកបន្តថា៖ «ក្តីបារម្ភរបស់ពួកគេ និងសារនយោបាយរបស់ពួកគេនឹងមិនមានឥទ្ធិពលទៅលើនីតិវិធីរបស់តុលាការទេ»។
លោកបន្តថាអង្គការសង្គមស៊ីវិលត្រូវបានស្វាគមន៍ឲ្យជួយលើបញ្ហា «បច្ចេកទេស» ដូចជាផ្តល់ឲ្យលោក តុលា នូវក្រុមអ្នកច្បាប់។ លោក ម៉ាលីន បញ្ជាក់ថា៖ «កុំគិតអំពីច្បាប់របស់ប្រទេសអ្នកសូមមើលក្រមព្រហ្មទណ្ឌ និងនីតិវិធីព្រហ្មទណ្ឌរបស់យើង»។
លោកបានថ្លែងបន្តថាសេចក្តីថ្លែងការណ៍នេះគឺ «មានលក្ខណៈនយោបាយ» ហើយបានចោទប្រកាន់អង្គការទាំងនោះថាគាំទ្រ «គណបក្សនយោបាយនោះ» ដែលទំនងជាសំដៅទៅគណបក្សប្រឆាំងដែលត្រូវបានរំលាយកាលពីខែវិច្ឆិកា៕ PS