ស្ទឹងត្រែងៈ អាជ្ញាធរខេត្តស្ទឹងត្រែងកំពុងធ្វើការដោះស្រាយសំណងទៅតាមដំណាក់កាលជូនប្រជាពលរដ្ឋដែលបានទទួលរងផលប៉ះពាល់ដោយការសាងសង់ទំនប់វារីអគ្គិសនីសេសានក្រោម ២ ដោយអាជ្ញាធរបានឯកភាពទាំងស្រុងទៅលើសំណើ និងលក្ខខណ្ឌរបស់សហគមន៍ភូមិក្បាលរមាស ខណៈលក្ខខណ្ឌ និងសំណើមួយចំនួនរបស់សហគមន៍ភូមិស្រែគស្ថិតក្នុងការចរចានៅឡើយ។
អ្នកនាំពាក្យសាលាខេត្តស្ទឹងត្រែងលោក ម៉ែន គង់ បានប្រាប់ភ្នំពេញប៉ុស្តិ៍កាលពីម្សិលមិញថា លក្ខខណ្ឌ ៥ ចំណុចរបស់ជនជាតិភាគតិចព្នងចំនួន ៥២ គ្រួសារក្នុងសហគមន៍ភូមិក្បាលរមាសដែលរងផលប៉ះពាល់ពីគម្រោងសាងសង់វារីអគ្គិសនីសេសានក្រោម ២ ត្រូវបានអាជ្ញាធរ និងក្រុមហ៊ុនទទួលយកតាមសំណើហើយ និងកំពុងអនុវត្តទៅតាមដំណាក់កាលនីមួយៗ ដើម្បីឈានទៅរកការបញ្ចប់ទាំងស្រុងនូវវិវាទដីធ្លីនៅក្នុងសហគមន៍នេះ។
លោកបន្តថាលក្ខខណ្ឌទាំង ៥ ចំណុចដែលសហគមន៍នេះបានស្នើសុំរួមមាន ការសុំដាក់បញ្ចូលសហគមន៍ជនជាតិដើមភាគតិចព្នងភូមិក្បាលរមាស នៅក្នុងបញ្ជីសហគមន៍ជនជាតិដើមភាគតិចជាផ្លូវការ និងមានសិទ្ធិសាងសង់លំនៅឋាននៅលើទីតាំងថ្មីដែលពួកគាត់បានជ្រើសរើសសាងសង់ផ្លូវសាលារៀន មណ្ឌលសុខភាព ស្រះទឹកស្អាតសម្រាប់ប្រើប្រាស់ក្នុងសហគមន៍ចំនួន ២។ ក្រៅពីលក្ខខណ្ឌទាំងនេះពួកគាត់មិនទាមទារសំណងអ្វីផ្សេងទៀតទេ។
លោកថា៖ «ដោយពិនិត្យឃើញថា សំណើ ឬលក្ខខណ្ឌទាំងនោះមានលក្ខណៈសមស្របអាជ្ញាធរយើងរួមទាំងភាគីក្រុមហ៊ុនវារីអគ្គិសនីសេសានក្រោម ២ ក៏បានសម្រេចឯកភាពតាមសំណើនោះហើយបច្ចុប្បន្នអាជ្ញាធរកំពុងអនុវត្តធ្វើការឈូសឆាយធ្វើផ្លូវចូលទៅទីតាំងថ្មីដែលពួកគាត់កំពុងប្រមូលផ្តុំគ្នារស់នៅ ជីកស្រះទឹក និងរៀបចំដឹកជញ្ជូនសម្ភារសម្រាប់ផ្គត់ផ្គង់ដល់ការសាងសង់សាលារៀន និងមណ្ឌលសុខភាពជូនដល់ពួកគាត់»។
ទន្ទឹមនឹងនេះលោក គង់ ឲ្យដឹងថា អាជ្ញាធរខេត្តស្ទឹងត្រែងកំពុងរៀបចំកសាងឯកសារ និងផែនទីបឋមមួយស្ដីពីទីតាំងភូមិសាស្ត្រដែលពួកគាត់កំពុងប្រមូលផ្ដុំគ្នារស់នៅថ្មីនេះ ដើម្បីចុះបញ្ជីដីធ្លីជាសមូហភាពដល់ពួកគាត់។
ដោយឡែកប្រជាពលរដ្ឋក្នុងសហគមន៍ភូមិស្រែគចាស់ប្រមាណ ៧៣ គ្រួសារដែលបដិសេធទទួលយកសំណងពីរដ្ឋនាពេលកន្លងមកក៏បានដាក់សំណើ ឬលក្ខខណ្ឌស្រដៀងគ្នានេះដែរ ប៉ុន្តែលក្ខខណ្ឌមួយចំនួននៅមិនទាន់មានការឯកភាពពីអាជ្ញាធរ និងខាងភាគីក្រុមហ៊ុនវារីអគ្គិសនីនៅឡើយទេ។
បើតាមលោក គង់ លក្ខខណ្ឌរបស់អ្នកភូមិស្រែគដែលនៅមិនទាន់ទទួលបានការឯកភាពពីអាជ្ញាធរ និងក្រុមហ៊ុននោះគឺការសុំដាក់បញ្ចូលសហគមន៍ពួកគាត់ចូលទៅក្នុងបញ្ជីសហគមន៍ជនជាតិដើមភាគតិចជាផ្លូវការ ខណៈអាជ្ញាធររកឃើញថាពួកគាត់មិនមែនជាជនជាតិដើមភាគតិចពិតប្រាកដនោះទេតែជាជនជាតិខ្មែរកាត់ឡាវ។ ម្យ៉ាងទៀតពួកគាត់បានទាមទារឲ្យអាជ្ញាធរ និងក្រុមហ៊ុនរុះរើផ្ទះដែលអាជ្ញាធរ និងក្រុមហ៊ុនបានសាងសង់សម្រាប់ការផ្លាស់ទីលំនៅរបស់ពួកគាត់ពីភូមិស្រែគចាស់ទៅកាន់ទីតាំងថ្មី (ស្រែគថ្មី) ដែលមានចម្ងាយប្រមាណ ៤ គីឡូម៉ែត្រពីភូមិចាស់នោះមកសង់ឲ្យពួកគាត់នៅលើទីតាំងថ្មីដែលពួកគាត់បានជ្រើសរើសដោយខ្លួនឯងក្នុងតំបន់ទួលស្រែត្បែងវិញ និងសុំឲ្យអាជ្ញាធរបង់សំណងខូចខាតលំនៅឋាន និងផលដំណាំរបស់ពួកគាត់នៅក្នុងភូមិចាស់ដែលបានលិចលង់ ដោយសារការបិទទ្វារទឹកទំនប់វារីអគ្គិសនីសេសានក្រោម ២ កន្លងទៅនេះដែលក្នុង ១ ខ្នងផ្ទះ មិនក្រោមពី ៥ ម៉ឺនដុល្លារនោះទេ។
លោក គង់ បញ្ជាក់ទៀតថា៖ «ទោះជាបែបណាអាជ្ញាធរយើងនៅតែបន្តធ្វើការសម្របសម្រួលរកដំណោះស្រាយជូនពួកគាត់មួយជំហានម្ដងៗ។ ក្នុងករណីពួកគាត់មិនទាមទារសំណងច្រើនហួសហេតុពេកទេនោះ»។
ពាក់ព័ន្ធករណីពលរដ្ឋក្នុងសហគមន៍ទាំង ២ ខាងលើនេះត្អូញត្អែរពីកង្វះខាតទឹកស្អាតប្រើប្រាស់ លោក ម៉ែន គង់ បានថ្លែងថាអាជ្ញាធរខេត្តបានបង្គាប់ឲ្យអាជ្ញាធរស្រុកចុះពិនិត្យ និងជួយអន្តរាគមន៍ផ្ដល់ទឹកស្អាតជូនពួកគាត់តាមភាពជាក់ស្តែងហើយ៕