កំពង់ចាមៈ អាជ្ញាធរខេត្តកំពង់ចាមបានហាមឃាត់ការធ្វើដំណើរឆ្លងកាត់ជាបណ្ដោះអាសន្នក្នុងតំបន់ច្រាំងទន្លេនៅក្នុងក្រុងកំពង់ចាមដែលកំពុងរងការគំរាមកំហែងបាក់ច្រាំងធ្លាក់ចូលទៅក្នុងទន្លេ ខណៈអាជ្ញាធរកំពុងសិក្សាលើបញ្ហាដែលកំពុងបាក់ស្រុតនោះ។
ច្រាំងទន្លេមេគង្គក្នុងខេត្តកំពង់ចាមប្រវែង ៧៩ ម៉ែត្របានបាក់ស្រុតមុខកាត់ ៣ ទៅ ៤ ម៉ែត្រនៅចំណុចខាងជើងស្ពានទន្លេបិទនៅពីមុខសណ្ឋាគារចំនួន ៣ គឺសណ្ឋាគារមនោរម្យ សណ្ឋាគារអិលស៊ីអិន និងសណ្ឋាគារមេគង្គ។ ប៉ុន្តែកន្លែងដែលបាក់ខ្លាំងនៅចន្លោះពីសណ្ឋាគារមនោរម្យទៅសណ្ឋាគារ អិលស៊ីអិន។
លោក កែវ នាឫទ្ធិ អភិបាលរងខេត្តកំពង់ចាមបានថ្លែងឲ្យដឹងកាលពីថ្ងៃម្សិលមិញថា ការបាក់នេះគឺជាករណីធម្មជាតិ។
លោកបន្តថា៖ «យើងរង់ចាំការវាយតម្លៃចុងក្រោយនៅពេលទឹកស្រក ព្រោះឲ្យតែដល់ពេលទឹកស្រកគឺវាបាក់ហើយ។ អ៊ីចឹងយើងរកមូលហេតុវា ថាតើដោយសារតែទឹកហូរពីក្រោមដី ឬមកពីអ្វី?»។
លោកបានអះអាងបន្តថាដំបូងវាបាក់តិច ឥឡូវកាន់តែខ្លាំងគឺមានប្រវែង ៧៩ ម៉ែត្រគឺវាស្រុត។ ការបាក់ច្រាំងនេះគឺជារឿងធម្មជាតិ។ ខណៈទំហំច្បាស់លាស់មិនបានវាស់ទេដោយសារតែវាបាក់បន្តិចម្ដងៗ។ បាក់កន្លែងដែលខូចស្រាប់ ៥០ ម៉ែត្រ។
លោកបានបញ្ជាក់ថាកាលពីមុនក៏មានការបាក់ដែរនៅចំណុចផ្សេងហើយក្រសួងធនធានទឹកបានជួសជុលរួចហើយកាលពីឆ្នាំ ២០១៦។ លោកបានឲ្យដឹងថាកន្លែងបាក់ច្រាំងក្នុងក្រុងកំពង់ចាមមានតែ ១ កន្លែងទេ ប៉ុន្តែការបាក់ច្រាំងក៏កើតមាននៅតាមដងទន្លេនៅស្រុកកងមាស កោះសូទិន និងកំពង់សៀមផងដែរ។
លោក នាឫទ្ធិ បានឲ្យដឹងថានៅខណៈនេះមិនទាន់មានវិធានការភ្លាមៗទេដោយសារតែអាជ្ញាធរកំពុងសិក្សា និងរង់ចាំរហូតដល់ទឹកស្រក។ លោកថា ការបាក់នេះតែងកើតឡើងនៅរដូវទឹកស្រក ប៉ុន្តែមូលហេតុជាក់ស្ដែងគឺអាជ្ញាធរមិនទាន់ដឹងនៅឡើយ។
លោក នាឫទ្ធិ និយាយថានៅខណៈនេះវិធានការដោះស្រាយមាន ២ គឺ ទី ១ ត្រូវ ឃាំងហ៊ុមព័ទ្ធកន្លែងនោះ កុំឲ្យពលរដ្ឋ និងទេសចរឆ្លងកាត់។ បន្ទាប់មកអ្នកជំនាញនឹងទៅសិក្សាកន្លែងនោះដើម្បីរកមូលហេតុជាក់ស្ដែងថាតើវាអាចនឹងបាក់បន្តទៀតទេ? ក្នុងករណីវាមិនបាក់តទៅទៀតទេ អាជ្ញាធរខេត្តនឹងស្នើសុំទៅរាជរដ្ឋាភិបាលតាមរយៈក្រសួងធនធានទឹក និងខាងគ្រោះមហន្តរាយដើម្បីរកថវិកាមកជួសជុលនៅពេលទឹកស្រក។
លោកអភិបាលរងខេត្តបានបញ្ជាក់ថាការបាក់ច្រាំងនេះមិនមែនកើតឡើងដោយករណីបូមខ្សាច់ទេ ព្រោះមិនមានការបូមខ្សាច់នៅក្នុងតំបន់ដែលបាក់នោះទេ។ ប៉ុន្តែលោកថាអ្នកជំនាញធ្លាប់រកឃើញមូលហេតុថាការបាក់ច្រាំងនៅក្នុងក្រុងកំពង់ចាមគឺដោយសារតែចរន្តទឹកបុកទៅលើកោះឈ្មោះថា កោះដាច់។
លោក នាឫទ្ធិ ថ្លែងថា៖ «តាមការសិក្សារបស់អ្នកជំនាញគេថាមកពីកោះនៅខាងមុខដែលគេហៅថា កោះដាច់ គឺវារារាំងមុខទឹកធ្វើឲ្យទឹកបុកមកកំពង់ចាម។ កាលនោះយើងមានការលើកជាគំនិតមួយថាទាល់តែរំលាយកោះនោះចេញដែលគំនិតនេះផ្ដួចផ្ដើមដោយក្រសួងធនធានទឹក តែគំនិតនេះមិនទាន់ទទួលបានការគាំទ្រពីឥស្សរជនជាន់ខ្ពស់ជាអ្នកសម្រេច បន្ទាប់មកគំនិតនេះក៏ទុកសិន។ អ៊ីចឹងរឿងនេះមិនមែនរឿងបូមខ្សាច់ទេ ព្រោះនៅកន្លែងនេះអត់មានកន្លែងត្រូវបូមទេនៅក្នុងក្រុងនេះ»។
លោក ម៉ៅ ហាក់ អគ្គនាយករងកិច្ចការបច្ចេកទេសនៃក្រសួងធនធានទឹក និងឧតុនិយមបានឲ្យដឹងថា នៅពេលនេះច្រាំងទន្លេនៅក្រុងកំពង់ចាមបានបាក់ជាង ១០០ ម៉ែត្រហើយ។ លោកបញ្ជាក់ថាក្រសួង និងអាជ្ញាធរកំពុងសិក្សាមូលហេតុ និងចាត់វិធានការទៅតាមអ្វីដែលរកឃើញ។ លោកថាមូលហេតុជាលក្ខណៈធម្មជាតិគឺការប្រែប្រួលចរន្តទឹកទន្លេ។
ទោះយ៉ាងណាក៏ដោយលោក ម៉ៅ ហាក់ ថ្លែងថា៖ «កម្រិតនៃគ្រោះថ្នាក់មិនទាន់ខ្លាំងណាស់ណាទេ អាចថាធ្ងន់ធ្ងរក៏ថាបានមិនទាន់ធ្ងន់ធ្ងរក៏ថាបាន តែយើងអាចនិយាយថា វាមានការគំរាមកំហែងមួយកម្រិតហើយ»៕